ജന്മം കൊണ്ട് ഉത്തരേന്ത്യക്കാരിയാണെങ്കിലും ബോളിവുഡിലും മലയാളത്തിലും ഒരുപോലെ തിളങ്ങി നിന്ന താരമാണ് സറീന വഹാബ്. ഒരു കാലത്ത് മലയാളത്തിലെ മികച്ച താരങ്ങള്ക്കൊപ്പം സറീന അഭിനയിച്ച് പ്രേക്ഷകശ്രദ്ധ പിടിച്ചു പറ്റിയിരുന്നു. അതോടൊപ്പം തന്നെ ബോളിവുഡിലും താരം നായികയായി തിളങ്ങി നിന്നിരുന്നു. ഇപ്പോഴും അമ്മ വേഷങ്ങളില് താരം നിറഞ്ഞു നില്ക്കുന്നുണ്ട്.
കരിയറില് തിളങ്ങി നില്ക്കുമ്പോഴും ജീവിതത്തില് സംഘർഷഭരിതമായ സാഹചര്യങ്ങള് സറീനയ്ക്ക് നേരിടേണ്ടി വന്നിട്ടുണ്ട്. ഭർത്താവ് ആദിത്യ പഞ്ചോളി വലിയ വിവാദങ്ങളില് അകപ്പെട്ടപ്പോഴും സറീന ഒരിക്കലും അദ്ദേഹത്തെ തള്ളിപ്പറഞ്ഞിട്ടില്ല. ആദിത്യയേക്കാള് ഏഴ് വയസ് കൂടുതലായ സറീന 1986 ലാണ് ആദിത്യ പഞ്ചോളിയെ വിവാഹം ചെയ്തത്. ആദിത്യ പഞ്ചോളിയുടെ അമ്മ ഈ ബന്ധത്തെ എതിർത്തെങ്കിലും കടുത്ത പ്രണയത്തിലായ ഇരുവരും വിവാഹിതരായി. എന്നാല് വിവാഹം കഴിഞ്ഞ് കുറച്ച് വർഷങ്ങള്ക്കുള്ളില് തന്നെ ആദിത്യക്ക് വിവാഹേതര ബന്ധങ്ങളുണ്ടായി.
പൂജ ബേഡിയുമായി ആദിത്യയ്ക്ക് ഉണ്ടായ ബന്ധം ബോളിവുഡില് വലിയ ചർച്ചയായതാണ്. ഇരുവരും ഇക്കാര്യം മറച്ച് വെച്ചിരുന്നില്ല. സറീന വഹാബും ഈ ബന്ധത്തില് പരസ്യമായി എതിർപ്പ് പ്രകടിപ്പിച്ചില്ല. എന്നാല് ഒരു ഘട്ടത്തില് പൂജ ബേഡി ആദിത്യ പഞ്ചോളിക്കെതിരെ തിരിഞ്ഞു. ആദിത്യ ലൈംഗികാതിക്രമം നടത്തിയെന്ന് പൂജയുടെ ജോലിക്കാരി ആരോപിച്ചു. പൂജ ബേഡി ആദിത്യക്കെതിരെ കേസ് കൊടുക്കുകയും ചെയ്തു. പിന്നീട് നടി കങ്കണ റണൗത്തുമായി ആദിത്യ പഞ്ചോളിക്കുണ്ടായ ബന്ധവും ബോളിവുഡില് പരസ്യമായിരുന്നു. 2019 ല് കങ്കണ ആദിത്യക്കെതിരെ പരാതിപ്പെട്ടു. തന്നെ ശാരീരികമായി ഉപദ്രവിച്ചു എന്നായിരുന്നു പരാതി. അന്നും ഭർത്താവിനെ തള്ളിപ്പറയാൻ സറീന വഹാബ് തയ്യാറായില്ല.
ഇപ്പോഴിതാ ഇതേക്കുറിച്ച് സംസാരിക്കുകയാണ് സറീന വഹാബ്. ഭർത്താവിന്റെ മറ്റ് ബന്ധങ്ങളെ ഉള്ക്കൊള്ളാൻ താൻ മാനസികമായി തയ്യാറെടുത്തിരുന്നെന്ന് സറീന വഹാബ് പറയുകയാണ്.
‘‘എനിക്ക് നിർമലിന്റെ ( ആദിത്യയുടെ യഥാർത്ഥ പേര്) ബന്ധങ്ങളെക്കുറിച്ച് അറിയാമായിരുന്നു. ഒരിക്കലും അത് ചോദ്യം ചെയ്തിട്ടില്ല. അദ്ദേഹം വീട്ടിലുള്ളപ്പോള് എന്നോട് എങ്ങനെ പെരുമാറുന്നു എന്ന് മാത്രമേ ഞാൻ നോക്കിയിട്ടുള്ളൂ. ചോദ്യങ്ങള് ഞാൻ ചോദിച്ചില്ല. കാരണം അതൊരുപക്ഷെ അദ്ദേഹത്തിന്റെ ഭയം ഇല്ലാതാക്കിയേക്കാം.
ഒരിക്കലും ഉപദ്രവിക്കുന്ന ഭർത്താവ് ആയിരുന്നില്ല അദ്ദേഹം. സ്വീറ്റ്ഹാർട്ടാണ്. അദ്ദേഹത്തിന്റെ കാമുകിമാർ ആരോപണം ഉന്നയിക്കാൻ കാരണം അവർക്ക് ആവശ്യമുള്ളത് ലഭിക്കാത്തത് കൊണ്ടാണ്. കങ്കണയോട് ഞാനെപ്പോഴും നല്ല രീതിയിലാണ് പെരുമാറിയത്. ഇടയ്ക്കിടെ അവള് വീട്ടിലേക്ക് വരുമായിരുന്നു. അദ്ദേഹവും നല്ല രീതിയിലാണ് അവളോട് പെരുമാറിയത്.
എന്താണ് സംഭവിച്ചതെന്ന് എനിക്കറിയില്ല. ഭർത്താവിന് കാണാൻ പറ്റാത്തത് ഞാൻ മുൻകൂട്ടി കണ്ടു. പിന്നീട് അത് തന്നെ സംഭവിച്ചു. നല്ല ഭർത്താവും നല്ല പിതാവുമാണ് ആദിത്യ പഞ്ചോളി. ഒരു കാര്യത്തിലും എന്നെ തടഞ്ഞിട്ടില്ല. സിനിമകള് ചെയ്യുന്നതിലോ യാത്രകളിലോ യാത്രകളിലോ ഒരിക്കലും ആദിത്യ എതിർപ്പ് പറഞ്ഞിട്ടില്ല...’’ സറീന തുറന്നു പറഞ്ഞു. സന പഞ്ചോളി, സൂരജ് പഞ്ചോളി എന്നിവരാണ് സറീനയുടെയും ആദിത്യ പഞ്ചോളിയുടെയും മക്കള്.
