ചങ്ങനാശേരി: സ്വകാര്യബസ് ഓടിക്കുന്നതിനിടയില് ഡ്രൈവര്ക്ക് ഹൃദയാഘാതം, നിയന്ത്രണംവിട്ട ബസ് ഡിവൈഡറില് ഇടിച്ചുകയറിനിന്നു. വാഴൂര് റോഡില് കുരിശുംമൂട് ജങ്ഷനില് ഇന്നലെ രാവിലെ 7.05നാണ് അപകടം.
ഡ്രൈവര് വെള്ളാവൂര് സ്വദേശി മുണ്ടപ്ലാക്കല് പ്രദീപ് ആര് നായ(49)രെ ചെത്തിപ്പുഴ സെന്റ് തോമസ് ആശുപത്രി അത്യാഹിത വിഭാഗത്തില് പ്രവേശിപ്പിച്ചു. യാത്രക്കാര്ക്ക് ആര്ക്കും പരിക്കില്ല. ചുങ്കപ്പാറയില് നിന്നും ചങ്ങനാശേരിയിലേക്കു സര്വീസ് നടത്തുന്ന സ്വകാര്യബസാണ് ബസാണ് അപകടത്തില്പ്പെട്ടത്.
തിരക്കില്ലാതിരുന്ന സമയമായിരുന്നതിനാല് വന് അപകടം ഒഴിവായി. ഹൃദയാഘാതത്തെത്തുടര്ന്നു, ഡ്രൈവര് പ്രദീപിന്റെ കൈയില് നിന്നു നിയന്ത്രണംവിട്ട ബസ് ഡിവൈഡറില് ഇടിച്ചുകയറി പരസ്യബോര്ഡിന്റെ തൂണും ഇടിച്ചുതകര്ത്താണ് നിന്നത്.
തൊട്ടടുത്ത് ഹോട്ടലും ഓട്ടോ സ്റ്റാന്ഡില് നിരവധി ഓട്ടോകളും ബസ്സ്റ്റോപ്പില് യാത്രക്കാരും ഉണ്ടായിരുന്നു. ബസ് ഡിവൈഡറില് ഇടിച്ചു നിന്നതിനാല് വന് ദുരന്തം ഒഴിവാകുകയായിരുന്നുവെന്നു നാട്ടുകാര് പറഞ്ഞു.
അപകടത്തെ തുടര്ന്ന് ചങ്ങനാശേരി മുതല് തെങ്ങണവരെ ഗതാഗതക്കുരുക്കുണ്ടായി. ചങ്ങനാശേരി, തൃക്കൊടിത്താനം പോലീസ് സ്റ്റേഷനുകളിലെ പോലീസ് എത്തി ദീര്ഘനേരം പണിപ്പെട്ടാണ് ഗതാഗതക്കുരുക്കഴിച്ചത്. അപകടത്തില്പ്പെട്ട ബസും നീക്കം ചെയ്തു.
