കഴിഞ്ഞ ദിവസമാണ് ജയറാമിന്റെയും പാര്വ്വതിയുടെയും മകനും അഭിനേതാവുമായ കാളിദാസ് ജയറാമിന്റെ മോഡലായ താരിണി കലിംഗരായരുടെ വിവാഹം നടന്നത്. സഹതാരങ്ങളും സുഹൃത്തുക്കളും ബന്ധുക്കളും പങ്കെടുത്ത വിപുലമായ വിവാഹത്തിന്റെ വീഡിയോകളും ഫോട്ടോകളും ഇപ്പോഴും സോഷ്യല് മീഡിയയില് തരംഗമാണ്. വിവാഹത്തിന് പങ്കെടുത്തവരില് മുഖ്യരായിരുന്നു സുരേഷ് ഗോപിയും കുടുംബവും. കാളിദാസും സുരേഷ് ഗോപിയുടെ മകനും അഭിനേതാവുമായ ഗോകുല് സുരേഷും തമ്മില് ഒരു നല്ല സൗഹൃദമുണ്ട്. അതുകൊണ്ട് കാളിദാസിന്റെ വിവാഹത്തില് സജീവമായി ഗോകുലുമുണ്ടായിരുന്നു.
ഇപ്പോഴിതാ വിവാഹച്ചടങ്ങുകള്ക്കിടെ മാധ്യമങ്ങളോട് തന്റെ പുതിയ സിനിമയെക്കുറിച്ചും വിവാഹത്തെക്കുറിച്ചും തുറന്നു പറയുകയാണ് ഗോകുല്. മമ്മൂട്ടിയ്ക്കൊപ്പമാണ് ഗോകുല് സുരേഷിന്റെ ഏറ്റവും പുതിയ സിനിമ. ‘ഡൊമിനിക് ആന്ഡ് ദി ലേഡീസ് പഴ്സ്’ എന്ന ഡിറ്റക്റ്റീവ് കോമഡി ത്രില്ലറായി ഒരുങ്ങുന്ന ചിത്രത്തിന്റേതായി അടുത്തിടെ പുറത്തിറങ്ങിയ ടീസർ ഏറെ ശ്രദ്ധനേടിയിരുന്നു. ടീസറില് ഗോകുലും മമ്മൂട്ടിയുമാണ് ഉണ്ടായിരുന്നത്. അതുകൊണ്ടു തന്നെ മമ്മൂട്ടിയ്ക്കൊപ്പമുള്ള അനുഭവത്തെക്കുറിച്ചാണ് മാധ്യമങ്ങള് ഗോകുലിനോട് സംസാരിച്ചത്.
‘‘ഷൂട്ട് കഴിഞ്ഞിട്ട് രണ്ടു മാസമായി. അതിന്റെ പോസ്റ്റ് പ്രൊഡക്ഷന് വര്ക്കുകള് നടന്നു കൊണ്ടിരിക്കുകയാണ്. ഹ്യൂമറിന്റെ പശ്ചാത്തലത്തിലുള്ള ഒരു ഇന്വസ്റ്റിഗേഷന് ത്രില്ലറാണ്. മമ്മൂക്കയുടെ വേറിട്ട ഒരു പെര്ഫോമന്സായിരിക്കും. നല്ലൊരു അനുഭവമായിരുന്നു, ഫണ്ണായിരുന്നു. അദ്ദേഹത്തിന്റെ അഭിനയത്തിന്റെ രീതികളൊക്കെ കാണാന് കഴിഞ്ഞത് വലിയൊരു എക്സ്പീരിയന്സായിരുന്നു. മമ്മൂക്കയെ രണ്ടടി മാറിനിന്ന് പഠിക്കാനുള്ള ഭാഗ്യം കിട്ടി. ലാലേട്ടനുമൊത്തുള്ള അച്ഛന്റെ സിനിമ വരും...’’ മമ്മൂട്ടിയ്ക്കൊപ്പമുള്ള സിനിമയെക്കുറിച്ചുള്ള അനുഭവം പങ്കിട്ട് കൊണ്ട് ഗോകുല് സുരേഷ് പറഞ്ഞു. ഗൗതം വാസുദേവ് മേനോൻ സംവിധാനം ചെയ്യുന്ന സിനിമയില് സുഷ്മിത ഭട്ട്, വിജി വെങ്കിടേഷ്, വിനീത്, വിജയ് ബാബു തുടങ്ങിയവരടക്കം മികച്ച താരങ്ങളും അണിനിരക്കുന്നുണ്ട്.
ഇതിനിടെ വിവാഹത്തെ കുറിച്ചും ഗോകുല് സുരേഷ് പറയുന്നുണ്ട്. വിവാഹം ഉടനെ ഉണ്ടാകില്ലെന്നും സമയമെടുക്കുമെന്നും ഗോകുല് പറയുന്നു. ഒരു പ്രണയിനി ഉണ്ടെന്ന തരത്തിലും ഗോകുല് സംസാരിക്കുന്നുണ്ട്.
‘‘വിവാഹം ഉടനെ ഒന്നും ഉണ്ടാകില്ല. കുറച്ച് സമയമെടുക്കും. അങ്ങനെ വലിയ ധൃതിയൊന്നും ഇല്ല. നിലവില് ഒരു പ്ലാനും ഇല്ല. പ്രണയമൊക്കെ എല്ലാവർക്കും ഉള്ളതല്ലേ. പ്രണയം നല്ലതല്ലേ. അയാളെ തന്നെ കല്യാണം കഴിക്കണമെന്നാണ് ആഗ്രഹം. പക്ഷേ വലിയ ധൃതിയൊന്നും ഇല്ല. എല്ലാം വളരെ സാവകാശത്തിലും സമാധാനത്തിലും മതി. വളരെ ലോ പ്രൊഫൈലില് മതി. നിങ്ങളാരും അറിയില്ല...’’ ഗോകുല് പറയുന്നു.
