ഈ ക്രിസ്തുമസ് ഉണ്ണി മുകുന്ദന് തൂക്കി എന്നാണ് അറിയുന്നത്. അത്രയും വലിയ സ്വീകരണമാണ് മാര്ക്കോ എന്ന നടന്റെ പുതിയ സിനിമയ്ക്ക് ലഭിക്കുന്നത്. ഇന്ത്യയിലെ ഏറ്റവും വയലന്റ്സ് മൂവി എന്ന വിശേഷണമുണ്ടായിട്ടും തിയേറ്ററില് വന് സ്വീകരണം തന്നെ ലഭിക്കുന്നു.
മാളികപ്പുറം എന്ന ചിത്രത്തില് അയ്യപ്പന് സമാനമായ റോളിലെത്തിയ ഉണ്ണിയുടെ തീര്ത്തും വ്യത്യസ്തമായ ഒരു സിനിമയാണ് മാര്ക്കോ എന്നാണ് തിയേറ്റര് പ്രതികരണങ്ങള്.
ഉണ്ണിയുടെ ഈ വിജയത്തില് അഭിമാനിക്കുന്ന ഒത്തിരി സുഹൃത്തുക്കളും സഹപ്രവര്ത്തകരും ഇതിനോടകം നടന് പ്രശംസകളുമായി സോഷ്യല് മീഡിയിയല് എത്തിക്കഴിഞ്ഞു. പ്രിയപ്പെട്ട സുഹൃത്തിന്റെ വിജയത്തില് അഭിമാനിക്കുന്നു എന്ന് നടി അദിതി രവിയും പറയുന്നു.
‘എന്റെ നല്ല സുഹൃത്ത്, നിന്നെ കുറിച്ച് എനിക്ക് വളരെ അധികം അഭിമാനമുണ്ട്, നിന്റെ ഈ വിജയത്തില് അതിയായ സന്തോഷവും. നിന്റെ പോരാട്ടങ്ങള് യഥാര്ത്ഥമാവുന്നു, ഒരു യോദ്ധാവിനെ പോലെ നീ ഉയര്ന്നിരിക്കുന്നു. നീ എപ്പോഴും ജെനുവിന് ആയിട്ടുള്ള, സൗഹൃദത്തിന് വില നല്കുന്ന, ഒരിക്കലും രണ്ട് മുഖങ്ങളുള്ള വ്യക്തിയല്ല.
അതാണ് നിന്നില് ഞാന് ഏറ്റവുമധികം അഡ്മയര് ചെയ്യുന്നത്. ഒരുപക്ഷേ നിന്റെ സത്യസന്ധയും, സ്ട്രെയ്റ്റു - ഫോര്വേഡ് എന്ന രീതിയും ആവാം ഈ വിജയം ഇത്രയും വൈകിപ്പിച്ചത്. പക്ഷേ നീ അത് ഏറ്റവും കൂടുതല് അര്ത്ഥമുള്ളതാക്കി. നീ ശരിക്കുമൊരു പ്രചോദനമാണ്. കഷ്ടപ്പാടിന്റെ ഫലം’ എന്നാണ് അദിതി രവി ഇന്സ്റ്റഗ്രാമില് കുറിച്ചത്.
ഉണ്ണി മുകുന്ദന് മാത്രമല്ല, സിനിമയ്ക്ക് പിന്നില് പ്രവൃത്തിച്ചവരെ അഭിനന്ദിക്കാനും അദിതി മറന്നില്ല. മാര്ക്കോയുടെ വന് വിജയത്തിന് ഉണ്ണി മുകുന്ദന് അഭിനന്ദനങ്ങള്. ഒപ്പം നമ്മുടെ തൃശ്ശൂര്ക്കാരന് ഷരീഫ് മുഹമ്മദിനും, വിപിന് ചേട്ടനും. നിങ്ങളുടെ ആത്മാര്ത്ഥ പരിശ്രമത്തിന് അഭിന്ദനങ്ങള്, നിങ്ങളില് വളരെ അധികം സന്തോഷിക്കുന്നു- അദിതി പറഞ്ഞു
അദിതി രവിയും ഉണ്ണി മുകുന്ദനും ജോഡികളായി ഇതുവരെ ഒരു സിനിമയും ചെയ്തിട്ടില്ല. അതേസമയം മോഹന്ലാല് നായകനായ ജീത്തു ജോസഫ് ചിത്രമായ ട്വല്ത്ത് മാനില് ഇരുവരും ഒന്നിച്ച് അഭിനയിച്ചിട്ടുണ്ട്. ആ സിനിമയില് ഒന്നിച്ച അനുശ്രീ, അനുസിത്താര, അനു മോഹന്, ലിയോണ ലിയോഷി തുടങ്ങിയവരെല്ലാമായി നല്ല സൗഹൃദം സൂക്ഷിക്കുന്ന നടിയാണ് അദിതി രവി.
