വിഷപ്പാമ്പുകൾ നിറഞ്ഞ കൊടുംകാട്ടിൽ കുഞ്ഞിന് ജന്മം നൽകിയ കുഞ്ഞിന് സുനാമി എന്ന് പേരിട്ടത് ഓർത്തെടുത്ത് അമ്മ. 20 വർഷം മുൻപ്, അതായത് 2004ൽ ഇതേ ദിനം സുനാമിത്തിരകൾ ആഞ്ഞടിച്ചപ്പോഴാണ് ഈ സംഭവം.
ആൻഡമാൻ നിക്കോബാർ ദ്വീപിലെ ഹട്ട് ബേ ഐലൻഡിൽ തന്റെ വീടിനെ വിഴുങ്ങിയ തിരമാലകൾ ആഞ്ഞടിച്ചപ്പോൾ 26 വയസ്സായിരുന്നു നമിത റോയ്ക്ക്- "ആ ദിവസം ഓർക്കാൻ ഞാൻ ആഗ്രഹിക്കുന്നില്ല. ഞാൻ ഗർഭിണിയായിരുന്നു. വീട്ടു ജോലികൾ ചെയ്യുകയായിരുന്നു. പെട്ടെന്ന് തീരത്ത് നിന്ന് കിലോമീറ്ററുകൾ അകലെ കടൽ പിൻവാങ്ങുന്നത് കണ്ട് ഞെട്ടി. പിന്നാലെ ഹട്ട് ബേ ദ്വീപിലേക്ക് വലിയ ഉയരത്തിൽ തിരമാലകൾ ആർത്തലച്ചുവന്നു. ആളുകൾ നിലവിളിച്ചു കൊണ്ടോടി.ഞാൻ ബോധം കെട്ടു വീണു"- നമിത റോയ് പറഞ്ഞു.
ബോധം വീണപ്പോൾ കൊടുംകാട്ടിലായിരുന്നു താനെന്ന് നമിത പറഞ്ഞു. അവിടെ ഭർത്താവിനെയും മകനെയും കണ്ടപ്പോൾ ആശ്വാസമായി. രാത്രി 11.49 ന് പ്രസവ വേദന അനുഭവപ്പെട്ടു. സഹായത്തിനായി കരഞ്ഞു. വൈദ്യസഹായം ലഭിക്കുന്ന സാഹചര്യമായിരുന്നില്ല. അതേ കാട്ടിലേക്ക് ഓടിക്കയറിയ ചില സ്ത്രീകളുടെ സഹായത്തോടെ കുഞ്ഞിന് ജന്മം നൽകി. അവന് സുനാമിയെന്ന് പേരിട്ടു. ആ കുഞ്ഞിന് ഇന്ന് 20 വയസ്സായി.
കടലിനെ പേടിച്ച് കാട്ടിൽ നിന്ന് പുറത്തുവരാൻ ധൈര്യമില്ലായിരുന്നുവെന്ന് നമിത പറയുന്നു. അതിനിടയിൽ അമിതമായ രക്തനഷ്ടം മൂലം ആരോഗ്യനില വഷളാകാൻ തുടങ്ങി. കാട്ടിൽ നാല് രാത്രി കഴിഞ്ഞു. പിന്നീട് രക്ഷാപ്രവർത്തകരെത്തി പോർട്ട് ബ്ലെയറിലെ ആളുപത്രിയിൽ തന്നെയും കുഞ്ഞിനെയും പ്രവേശിപ്പിച്ചെന്ന് നമിത റോയ് പറയുന്നു.
