മലയാളത്തിന്റെ പ്രിയ ഹാസ്യ സാമ്രാട്ട് ജഗതി ശ്രീകുമാറിന്റെ തിരിച്ചുവരവിനായി കാത്തിരിക്കാത്ത സിനിമാസ്വാദകരില്ല. വലിയൊരു അപകടത്തിന് ശേഷം സിനിമാലോകത്തേക്ക് തിരിച്ചു വരാത്ത ചികിത്സയുമായി മാറി നില്ക്കുകയാണ് ജഗതി ശ്രീകുമാര്. അഞ്ച് പതിറ്റാണ്ടിലേറെ മലയാളികളെ പൊട്ടിച്ചിരിപ്പിച്ച ഹാസ്യ സാമ്രാട്ട് 73-ാം പിറന്നാളിന്റെ നിറവിലാണ്. പിറന്നാള് ദിനത്തില് തന്നെ മലയാള സിനിമാപ്രേക്ഷരെ ഏറെ സന്തോഷിപ്പിച്ച് ജഗതി വീണ്ടും സിനിമയിലേക്ക് വലിയൊരു തിരിച്ചു വരവ് നടത്തുന്നു എന്ന് സോഷ്യല് മീഡിയയിലൂടെ ആരാധകരറിഞ്ഞു.
ഈ സന്തോഷം നടന് അജു വര്ഗീസാണ് സോഷ്യല് മീഡിയയിലൂടെ പങ്കിട്ടത്. ജഗതിയെ ആരാധിക്കുന്ന ഒരുപാട് കലാകാരന്മാരില് മുന്പന്തിയിലാണ് അജു. അത് പലപ്പോഴും അജു തന്നെ തുറന്നു പറഞ്ഞിട്ടുമുണ്ട്.
‘‘കോമഡിയുടെ മാസ്റ്റർ തിരിച്ചെത്തി...ഇതിഹാസതാരം ജഗതി ശ്രീകുമാറിന് ജന്മദിനാശംസകൾ. പ്രൊഫസർ അമ്പിളി, അങ്കിൾ ലൂണാർ ആയി വാലയിലെ അദ്ദേഹത്തിന്റെ ഐതിഹാസികമായ തിരിച്ചുവരവിന് സാക്ഷ്യം വഹിക്കാൻ തയ്യാറാകൂ. മറ്റൊരുതരത്തിലുള്ള ഒരു തിരിച്ചുവരവിന് കളമൊരുങ്ങി...’’ എന്ന ക്യാപ്ഷനൊപ്പമാണ് ‘വല’ എന്ന ചിത്രത്തിലെ ജഗതിയുടെ ക്യാരക്ടര് പോസ്റ്റര് അജു പങ്കിട്ടിരിക്കുന്നത്.
വിഖ്യാതനായ ബ്രിട്ടിഷ് ഭൗതികശാസ്ത്രജ്ഞനും പ്രപഞ്ച ശാസ്ത്രജ്ഞനുമായ സ്റ്റീഫൻ ഹോക്കിങിനെ അനുസ്മരിപ്പിക്കുന്ന വിധത്തില് ചക്രകസേരയിലിരിക്കുന്ന ജഗതിയെ പോസ്റ്ററില് കാണാം. പ്രൊഫസര് അമ്പിളി അഥവാ അങ്കിള് ലൂണാർ എന്നാണ് ചിത്രത്തില് ജഗതിയുടെ കഥാപാത്രത്തിന്റെ പേര്. ലോകത്തെ തന്റെ കൈവെള്ളയില് നിയന്ത്രിക്കുന്ന ഒരു മാസ്റ്റർ മൈൻഡ് ശാസ്ത്രജ്ഞന്റെ റോളാണ് ജഗതിയുടേത് എന്ന് തോന്നിപ്പിക്കും വിധമുള്ള വ്യത്യസ്തമായ അവതരണമാണ് പോസ്റ്ററിലേത്.
മലയാളികളെ ഏറെ ചിരിപ്പിച്ച ജഗതി ശ്രീകുമാര് ഒരു അപകടത്തെ തുടര്ന്ന് സിനിമ രംഗത്ത് നിന്നും പൂര്ണമായും വിട്ടു നില്ക്കുകയായിരുന്നു. 2022 ല് പുറത്തിറങ്ങിയ സിബിഐ 5 എന്ന ചിത്രത്തില് മാത്രമാണ് താരം ഇതിനിടെ പ്രത്യക്ഷപ്പെട്ടത്.
വല എന്ന ചിത്രത്തിലൂടെയാണ് ജഗതി തിരിച്ചുവരുന്നത്. ഗഗനചാരി എന്ന ചിത്രത്തിലൂടെ മലയാള സിനിമയ്ക്ക് ഒരു ജോണര് പരിചയപ്പെടുത്തിക്കൊടുത്ത സംവിധായകന് അരുണ് ചന്തുവിന്റെ അടുത്ത ചിത്രമാണ് വല. സയന്സ് ഫിക്ഷന് മോക്യുമെന്ററിയായ ഗഗനചാരിക്ക് ശേഷം എത്തുന്ന ചിത്രം പുതുമയുള്ള പ്രമേയവും കഥാപശ്ചാത്തലത്തിലുമാണ് സോംബികളുമായാണ് വല എന്ന പുതിയ ചിത്രമെത്തുന്നത്. ഭൂമിയില് നിന്നും പുറത്തേക്ക് വളര്ന്ന നിലയിലുള്ള ചുവപ്പന് പേശികളുമായുള്ള വലയുടെ ഫസ്റ്റ് ലുക്ക് പോസ്റ്റര് ഏവരും ഏറ്റെടുത്തിരുന്നു. സിനിമയുടെ അനൗണ്സ്മെന്റ് വിഡിയോയും രസകരമായിരുന്നു. ഗോകുല് സുരേഷ്, അജു വര്ഗീസ് എന്നിവര്ക്കൊപ്പം അനാര്ക്കലി മരിക്കാര്, കെ ബി ഗണേഷ് കുമാര്, ജോണ് കൈപ്പള്ളില്, അര്ജുന് നന്ദകുമാര് എന്നിവരും ചിത്രത്തില് അഭിനയിക്കുന്നുണ്ട്.
മാധവ് സുരേഷും ഭഗത് മാനുവലും ചിത്രത്തില് പ്രധാന വേഷങ്ങളിലെത്തുന്നുണ്ട്. സുരേഷ് ഗോപിയുടെ മക്കളായ ഗോകുല് സുരേഷും മാധവ് സുരേഷും ആദ്യമായി ഒരുമിച്ചഭിനയിക്കുന്നു എന്ന പ്രത്യേകതയും വലയ്ക്ക് ഉണ്ട്. കോമഡി കൂടി കലര്ന്നായിരിക്കും മലയാളത്തിന്റെ സോംബികള് എത്തുക എന്ന സൂചനയായിരുന്നു ഈ വിഡിയോനല്കിയിരുന്നത്. ഇപ്പോഴിതാ പുതിയ ക്യാരക്ടർ പോസ്റ്ററും ഏവരും നെഞ്ചോടുചേർത്തിരിക്കുകയാണ്.
‘ഗഗനചാരി’യുടെ തുടര്ച്ചയാണോ, വ്യത്യസ്തമായ ചിത്രമാണോ, അതോ പുതിയ യൂണിവേഴ്സിന് തുടക്കമാണോ, എന്നെല്ലാമാണ് ചിത്രത്തെക്കുറിച്ച് ആരാധകര് നല്കുന്ന കമന്റുകള്.
മരിച്ചിട്ടും മരിക്കാതെ തുടരുന്ന മനുഷ്യരെയും ജീവികളെയുമാണ് സയന്സ് ഫിക്ഷന് ലോകത്ത് സോംബികളെന്ന് വിളിക്കുന്നത്. ഇവരുടെ ആക്രമണത്തില് പെടുന്നവരും സോംബികളായി മാറുന്നതാണ് പൊതുവെ ഫിക്ഷനില് കണ്ടുവരാറുള്ളത്. ഹോളിവുഡ് അടക്കമുള്ള വിദേശ ഭാഷകളില് നിരവധി ചിത്രങ്ങള് വന്നിട്ടുണ്ടെങ്കിലും ഇന്ത്യന് ഭാഷകളില് സോംബികള് സ്ക്രീനില് എത്തിയിട്ടുള്ളത് വളരെ കുറവാണ്. 2025 തിയേറ്ററിലെത്താനൊരുങ്ങുന്ന മലയാളത്തിലെ ആദ്യ സോംബി ചിത്രങ്ങളിലൊന്നായിരിക്കും വല.
