ഇന്ത്യന് സിനിമാലോകത്തെ ലേഡി സൂപ്പര്സ്റ്റാറായി പ്രേക്ഷകര് അന്നുമിന്നും അംഗീകരിച്ചിട്ടുള്ള താരമാണ് ശ്രീദേവി കപൂര്. ബോളിവുഡ് നിര്മ്മാതാവായ ബോണി കപൂറിനെ വിവാഹം ചെയ്ത താരം പിന്നീടും സിനിമാലോകത്തെ താരറാണിയായിരുന്നു. അകാലത്തിലുള്ള താരത്തിന്റെ വേര്പാട് ആരാധകരെയും സഹതാരങ്ങളെയുമടക്കം എല്ലാവരെയും ഞെട്ടിച്ചിരുന്നു. ബോണി കപൂറും മക്കളായ ജാന്വി കപൂറും ഖുഷി കപൂറും ഈയൊരു നൊമ്പരത്തില് നിന്ന് കരകയറാന് ഒരുപാട് സമയമെടുത്തു.
ശ്രീദേവിയുടെ മൂത്ത മകള് ജാന്വി അമ്മയുടെ പാത പിന്തുടര്ന്ന് മുന്പു തന്നെ സിനിമാലോകത്ത് തന്റെ സ്ഥാനം ഉറപ്പിച്ചിരുന്നു. ഫാഷന് സെന്സിലും മുന്നിലായ ജാന്വി സോഷ്യല് മീഡിയയിലും സജീവമായ താരമാണ്. ചേച്ചിക്കു പിന്നാലെ ഖുഷിയും വെള്ളിത്തിരയില് തന്റെ അരങ്ങേറ്റം കുറിച്ചു. സഹോദരിമാര് രണ്ടുപേരും തങ്ങളുടെ എല്ലാ സന്തോഷങ്ങളും റീല്സ് വീഡിയോകളും അതിലൂടെ പങ്കിടാറുമുണ്ട്.
ഇപ്പോഴിതാ താരപുത്രിമാര് തങ്ങളുടെ ഇന്സ്റ്റാ പേജിലൂടെ ഷുഗറും സ്പൈസിയുമായ ഒരു റീല്സ് വീഡിയോ പങ്കിട്ടിരിക്കുകയാണ്. കപൂർ സഹോദരിമാർ ലവ്യാപയിലെ ടൈറ്റിൽ ഗാനത്തിന് നൃത്തം ചെയ്യുമ്പോള് ഒപ്പം അച്ഛനായ ബോണി കപൂറും കൂടുന്നതാണ് വീഡിയോ. ജാൻവിയും ഖുഷി കപൂറും അവരുടെ ഹൃദയം നിറഞ്ഞ താളങ്ങൾക്കൊത്ത് നൃത്തം ചെയ്യുന്നതാണ് വീഡിയോയുടെ തുടക്കം. കുറച്ച് നിമിഷങ്ങൾക്ക് ശേഷം, ബോണി കപൂറും ബാക്ക്ഗ്രൗണ്ടില് പ്രത്യക്ഷപ്പെടുന്നത് വീഡിയോയില് കാണാം. ‘‘പ്രണയിക്കാനാണ് വന്നത്, പക്ഷേ പാപ്പ വന്നു...’’എന്ന ക്യാപ്ഷനൊപ്പമാണ് ഖുഷി വീഡിയോ പങ്കിട്ടിരിക്കുന്നത്. ലവ്യാപ എന്ന ഹാഷ് ടാഗും ഖുഷി നല്കിയിട്ടുണ്ട്. ആമിര് ഖാന്റെ മകന് ജുനൈദ് ഖാനൊപ്പം ലവ്യാപ എന്ന ചിത്രത്തില് ഖുഷി കപൂറാണ് എത്തുന്നത്.
വീഡിയോ കണ്ട് ആരാധകരടക്കം കമന്റുകള് കുറിക്കുന്നുണ്ട്. അർജുൻ കപൂർ എഴുതിയത്, ‘‘എക്കാലത്തെയും മികച്ച ആലാപ്പ്...’’ എന്നാണ്. വരുൺ ധവാനും മഹിമ ചൗധരിയും കമന്റില് ഇമോജികള് കുറിച്ചിട്ടുണ്ട്.
