തിരുവനന്തപുരം: നെയ്യാറ്റിന്കര ആറാലുംമൂട് കാവുവിളാകം വീട്ടില് ഗോപന് സ്വാമി എന്നറിയപ്പെടുന്ന ഗോപന്റെ(81) സമാധിയുമായി ബന്ധപ്പെട്ട് സമഗ്രമായ അനേ്വഷണം നടത്താന് പോലീസ് പ്രത്യേകസംഘത്തെ നിയോഗിച്ചു. എ.ഡി.ജി.പി. മനോജ് ഏബ്രഹാമിന്റെ മേല്നോട്ടത്തില് റൂറല് എസ്.പി: സുദര്ശനാണ് അനേ്വഷണച്ചുമതല. ഗോപനെ ജീവനോടെയാണോ അതോ മരണശേഷമാണോ സമാധിയിരുത്തിയത് എന്നുള്ള കാര്യമാണ് പോലീസ് അനേ്വഷിക്കുക. മക്കളുടെയടക്കം മൊഴികളിലുള്ള വൈരുധ്യം കേസിന്റെ ദുരൂഹത വര്ധിപ്പിക്കുന്നുണ്ട്.
പോസ്റ്റ്മോര്ട്ടം റിപ്പോര്ട്ടും നിര്ണായകമാകും. കല്ലറ തുറന്നുള്ള പരിശോധനയ്ക്ക് ജില്ലാ കലക്ടറുടെ അനുമതി വേണം. അടുത്ത ദിവസം അത് കിട്ടിയേക്കും. അതിന് ശേഷം ആര്.ഡി.ഒയുടെ നിരീക്ഷണത്തില് കല്ലറ പൊളിക്കും. മരണസമയത്ത് മകന് രാജസേനന് ആയിരുന്നു ഗോപന്റെ കൂടെ ഉണ്ടായിരുന്നത്. സമാധിക്ക് സമയമായി എന്നു പറഞ്ഞ് പിതാവ് അറയില് ഇരുന്ന് മരിച്ചുവെന്നാണ് ഇയാളുടെ മൊഴി. രാവിലെ പത്തോടെ അറയിലേക്കു നടന്നു പോയി പത്മാസനത്തില് ഇരുന്ന പിതാവിനു വേണ്ടി പുലര്ച്ചെ മൂന്നുവരെ പൂജകള് ചെയ്തതായാണ് രാജസേനന് പോലീസിനോട് പറഞ്ഞത്. മരണം സംഭവിച്ച ശേഷം കുളിപ്പിച്ച് സമാധി ഇരുത്തിയെന്നും മൊഴിയുണ്ട്.
അതേസമയം, വ്യാഴാഴ്ച 10.30ന് ഗോപന് സ്വാമിയെ കാണുമ്പോള് അദ്ദേഹം ഗുരുതരാവസ്ഥയില് കിടപ്പിലായിരുന്നു എന്ന് വീട്ടിലെത്തിയ അടുത്ത ബന്ധു പോലീസിന് മൊഴി നല്കിയിട്ടുണ്ട്. അതിന് ശേഷം അര മണിക്കൂര് കഴിഞ്ഞ് നടന്നു പോയി പീഠത്തില് ഇരുന്നെന്ന വാദമാണ് ആശയക്കുഴപ്പമുണ്ടാക്കുന്നത്. 'ഗോപന് സ്വാമി സമാധിയായി' എന്ന പോസ്റ്റര് മക്കള് വീടിനു സമീപത്തെ മതിലുകളില് പതിപ്പിച്ചപ്പോഴാണു സംഭവം നാട്ടുകാര് അറിഞ്ഞത്. മരണത്തില് ദുരൂഹതയുണ്ടെന്ന ആരോപണം ഉയര്ന്നതു മുതല് മക്കളും ഭാര്യയും പോലീസ് നിരീക്ഷണത്തിലാണ്.
ഗോപന് വീട്ടുവളപ്പില് ശിവക്ഷേത്രം നിര്മിച്ചു പൂജ നടത്തിയിരുന്നു. ഇതിനടുത്തു തന്നെ സമാധി അറ നിര്മിച്ചതും ഗോപന് തന്നെയാണെന്നാണ് ഭാര്യയും മക്കളും വിശദീകരിക്കുന്നത്. മരണശേഷം ദൈവത്തിന്റെ അടുക്കല് പോകണമെങ്കില് മൃതദേഹം വീട്ടുകാരല്ലാതെ മറ്റാരെയും കാണിക്കരുതെന്നും സമാധി ഇരുത്തണമെന്നും ഗോപന് നിര്ദേശം നല്കിയിരുന്നതായാണ് മക്കളുടെ മൊഴി. ഗോപനെ കാണാനില്ലെന്ന പരാതിയാണ് നിലവില് പോലീസിന് മുന്നിലുള്ളത്. കല്ലറ തുറക്കുമ്പോള് മൃതദേഹമുണ്ടെങ്കില് പോസ്റ്റ്മോര്ട്ടം നടത്താനാണു നീക്കം.
അയല്വാസി നല്കിയ പരാതിയുടെ അടിസ്ഥാനത്തിലാണ് നിലവില് കേസെടുത്തിരിക്കുന്നത്. ഗോപന് സ്വാമിയുടെ മരണത്തില് ദുരൂഹതയുണ്ടെന്നാണ് പ്രദേശവാസികളുടെ ആരോപണവും പരാതിയും. ആറാലുംമൂട് ചന്തയിലെ മുന് ചുമട്ടുതൊഴിലാളിയായിരുന്നു ഗോപന്. സംഭവത്തില് പ്രാഥമിക അനേ്വഷണ റിപ്പോര്ട്ട് കഴിഞ്ഞദിവസം കലക്ടര്ക്ക് സമര്പ്പിച്ചിരുന്നു. ഇതില് സമാധിയില് പരാതി ഉയര്ന്ന സാഹചര്യത്തില് കല്ലറ പൊളിക്കണമെന്നു ചൂണ്ടിക്കാട്ടിയിട്ടുണ്ട്.
