തമിഴകത്തിന്റെ പ്രിയ താരമായ ജയം രവി മലയാളികള്ക്കും ഏറെയിഷ്ടമുള്ള താരങ്ങളില് ഒരാളാണ്. അടുത്തിടെ ജയം രവി വാര്ത്തകളില് നിറഞ്ഞത് സൂപ്പര്ഹിറ്റായ ഒരു സിനിമയുടെ പേരിലല്ല, മറിച്ച് തന്റെ സ്വകാര്യ ജീവിതത്തിലെ ചില പ്രശ്നങ്ങള് കാരണമാണ്. ഭാര്യ ആരതിയുമായുള്ള 15 വര്ഷത്തെ ദാമ്പത്യജീവിതം അവസാനിപ്പിച്ചുവെന്നും വളരെയധികം വേദനയോടെ എടുത്ത തീരുമാനമാണ് ഇതെന്നുമാണ് എക്സില് പങ്കുവെച്ച കുറിപ്പിലൂടെ ജയം രവി വ്യക്തമാക്കിയതു പിന്നാലെയാണ് വിവാദങ്ങള് തുടങ്ങിയത്. ഇതിനു പിന്നാലെ ആരതി വിവാഹബന്ധം വേര്പെടുത്തതില് താത്പര്യമില്ലെന്ന് അറിയിച്ചു. അതോടെ താരങ്ങളുടെ കുടുംബജീവിതവും അതിലെ പ്രശ്നങ്ങളും വാര്ത്തകളില് നിറഞ്ഞു.
ഏതായാലും ഒരുപാട് വാദപ്രതിവാദങ്ങള്ക്ക് അവസാനം താരം തന്റെ വിവാഹജീവിതം അവസാനിപ്പിച്ചു. പുതിയ തുടക്കമെന്നുള്ള രീതിയില് താരം തന്റെ സോഷ്യല് മീഡിയയിലൂടെ പുതിയ യാത്രാചിത്രങ്ങളടക്കം പങ്കിടാനും തുടങ്ങി.
ഇപ്പോഴിതാ തന്റെ പേര് മാറ്റിയതായി സോഷ്യല് മീഡിയയിലൂടെ അറിയിക്കുകയാണ് ജയം രവി. ആദ്യമായി നായക വേഷം ചെയ്ത സിനിമയുടെ പേര് സ്വന്തം പേരിനൊപ്പം ചേർക്കപ്പെട്ട താരമാണ് ജയം രവി. ജയം ആയിരുന്നു താരത്തിന്റെ ആദ്യ സിനിമ. ആ സിനിമയുടെ റിലീസിനുശേഷമാണ് താരം ജയം രവി എന്ന് അറിയപ്പെട്ട് തുടങ്ങിയത്. ലോക സിനിമയില് തന്നെ ഒരു ജയം രവി മാത്രമെയുള്ളു.
എന്നാല് ആളുകളുടെ മനസില് പതിഞ്ഞുപോയ പേര് ഇപ്പോള് മാറ്റിയിരിക്കുകയാണ് താരം. തന്നെ ഇനി മുതല് ജയം രവിയെന്ന് വിളിക്കരുതെന്ന് പുതിയ സോഷ്യല്മീഡിയ പോസ്റ്റിലൂടെ താരം അറിയിച്ചു. ജയം രവി പേര് മാറ്റി രവി മോഹന് എന്നാക്കിയിരിക്കുകയാണ് താരം.
‘‘പ്രിയപ്പെട്ട ആരാധകരേ, സുഹൃത്തുക്കളേ, മാധ്യമ പ്രവര്ത്തകരേ, പൊതുജനങ്ങളേ, പ്രതീക്ഷയും അനന്തമായ സാധ്യതകളും നിറഞ്ഞ ഒരു പുതുവര്ഷത്തിലേക്ക് നാം ചുവടുവെക്കുമ്പോള്... എന്റെ യാത്രയിലെ ഒരു പുതിയ അധ്യായത്തെ അടയാളപ്പെടുത്തുന്ന ഒരു തീരുമാനം ഞാന് ആവേശത്തോടെ പങ്കുവെക്കുകയാണ്. സിനിമ എല്ലായ്പ്പോഴും എന്റെ ഏറ്റവും വലിയ അഭിനിവേശവും എന്റെ കരിയറിന്റെ അടിത്തറയുമാണ്. ഇന്ന് ഞാന് ആരാണെന്നത് രൂപപ്പെടുത്തിയ ലോകമാണ് സിനിമ. എന്റെ യാത്രയെക്കുറിച്ച് ചിന്തിക്കുമ്ബോള് സിനിമയും നിങ്ങളും എനിക്ക് നല്കിയ അവസരങ്ങള്ക്കും സ്നേഹത്തിനും പിന്തുണയ്ക്കും ഞാന് വളരെയധികം നന്ദിയുള്ളവനാണ്. എനിക്ക് ജീവിതവും സ്നേഹവും ലക്ഷ്യവും നല്കിയ വ്യവസായത്തിന് എന്റെ പിന്തുണ നല്കാന് ഞാന് ആഗ്രഹിക്കുന്നു.
ഈ ദിവസം മുതല് എന്റെ വ്യക്തിപരവും തൊഴില്പരവുമായ ലക്ഷ്യങ്ങളുമായി ആഴത്തില് പ്രതിധ്വനിക്കുന്ന രവി/രവി മോഹന് എന്ന പേരിലാണ് ഞാന് അറിയപ്പെടുക. ഈ പുതിയ അധ്യായത്തിലേക്ക് ഞാന് നീങ്ങുമ്പോള് എന്റെ വ്യക്തിത്വത്തെ എന്റെ കാഴ്ചപ്പാടുകളുമായും മൂല്യങ്ങളുമായും സംയോജിപ്പിച്ച് എന്നെ ഈ പേരില് അഭിസംബോധന ചെയ്യാന് ഞാന് എല്ലാവരോടും അഭ്യര്ത്ഥിക്കുന്നു. ഈ പേരിൽ എന്നെ ഇനി മുതൽ അഭിസംബോധന ചെയ്യണമെന്ന് എല്ലാവരോടും ഞാൻ അഭ്യർഥിക്കുന്നു....ഇന്ന് മുതല് ജയം രവി എന്ന് ഞാന് അറിയപ്പെടില്ല. ഇത് എന്റെ വ്യക്തിപരമായ കുറിപ്പും വിനീതമായ അഭ്യര്ത്ഥനയുമാണ്...’’ ജയം രവി കുറിച്ചു.
മോഹന് സ്റ്റുഡിയോസ് എന്ന നിര്മാണ സ്ഥാപനം ആരംഭിക്കുന്നതായും താരം കത്തിൽ കുറിച്ചു. വളര്ന്നുവരുന്ന പ്രതിഭകളെ പരിപോഷിപ്പിക്കുന്നതിനും ആഴമേറിയതും അര്ത്ഥവത്തായതുമായ കഥകള് സിനിമയിലേക്ക് കൊണ്ടുവരുന്നതിനുമുള്ള സംരംഭമായാണ് താരം നിർമാണ കമ്പനിയെ പരിഗണിക്കുന്നത്.
‘‘സിനിമയോടുള്ള എന്റെ അചഞ്ചലമായ അഭിനിവേശം പിന്തുടരുന്നതിനായി ലോകമെമ്പാടുമുള്ള പ്രേക്ഷകരെ പ്രചോദിപ്പിക്കുകയും ആകര്ഷിക്കുകയും പ്രതിധ്വനിപ്പിക്കുകയും ചെയ്യുന്ന ആകര്ഷകമായ ആഖ്യാനങ്ങള് കണ്ടെത്തുന്നതിനും വിജയിക്കുന്നതിനുമായി സമര്പ്പിച്ചിരിക്കുന്ന രവി മോഹന് സ്റ്റുഡിയോസ് എന്ന നിര്മാണ സ്ഥാപനത്തിന്റെ സമാരംഭം പ്രഖ്യാപിക്കുന്നതിലും ഞാന് സന്തുഷ്ടനാണ്.
വളര്ന്നുവരുന്ന പ്രതിഭകളെ പരിപോഷിപ്പിക്കുന്നതിനും ആഴമേറിയതും അര്ത്ഥവത്തായതുമായ കഥകള് സിനിമയിലേക്ക് കൊണ്ടുവരുന്നതിനുമുള്ള എന്റെ പ്രതിബദ്ധതയെ ഈ സംരംഭം പ്രതിനിധീകരിക്കുന്നു. എന്നെ പിന്തുണച്ച ആളുകള്ക്കും കമ്മ്യൂണിറ്റികള്ക്കും തിരികെ നല്കുന്നതിനായി, എന്റെ എല്ലാ ഫാന് ക്ലബ്ബുകളെയും രവി മോഹന് ഫാന്സ് ഫൗണ്ടേഷന് എന്ന പേരില് ഒരു ഘടനാപരമായ സംഘടനയാക്കി മാറ്റുകയാണ്. സഹായം ആവശ്യമുള്ള എല്ലാവരെയും സഹായിക്കുന്നതിനും നമ്മുടെ സമൂഹത്തില് നല്ല സ്വാധീനം ചെലുത്തുന്നതിനും ഈ ഫൗണ്ടേഷന് പ്രവര്ത്തിക്കും. എനിക്ക് ലഭിച്ച സ്നേഹവും പിന്തുണയും ഏറ്റവും ആവശ്യമുള്ളവരിലേക്ക് എത്തിക്കുന്ന സംഭാവനകളിലേക്ക് നയിക്കാനുള്ള എന്റെ ഹൃദയംഗമമായ ശ്രമമാണിത്. തമിഴ് ജനതയുടെ അനുഗ്രഹത്തോടെ, മുകളില് സൂചിപ്പിച്ചതുപോലെ എന്നെ അഭിസംബോധന ചെയ്യാനും ഈ പുതിയ സംരംഭത്തില് എന്നെ പിന്തുണയ്ക്കാനും എന്റെ എല്ലാ ആരാധകരോടും മാധ്യമങ്ങളോടും എല്ലാവരോടും ഞാന് അഭ്യർഥിക്കുന്നു...’’ ജയം രവി കുറിച്ചു.
എന്നാല് താരം പേര് മാറ്റിയതിനോട് ആരാധകർക്ക് വിയോജിപ്പാണ്. ജയം രവിക്കുള്ള ഭംഗി രവി മോഹനില്ലെന്നാണ് ആരാധകരുടെ പക്ഷം. ചില രസകരമായ കമന്റുകളും നടന്റെ പുതിയ പോസ്റ്റിന് താഴെ പ്രത്യക്ഷപ്പെട്ടിട്ടുണ്ട്. ശശി എന്ന പേര് ഗസറ്റില് കൊടുത്ത് മാറ്റി സോമനാക്കിയത് പോലെ, വളരെ മോശം തീരുമാനം, ജയം രവിയാണ് എന്നും മികച്ചത് എന്നിങ്ങനെയാണ് പലരുടെയും കമന്റുകള്. എന്നാല് ഒരു കൂട്ടം പ്രേക്ഷകര് ഈ പേരുമാറ്റത്തെ സ്വീകരിക്കുകയും ചെയ്യുന്നുണ്ട്.
സിനിമയില് എത്തിയശേഷം പുതിയ പേര് സ്വീകരിക്കുന്നതും പേരില് ന്യൂമറോളജി അനുസരിച്ച് മാറ്റം വരുത്തുന്നതുമെല്ലാം സെലിബ്രിറ്റികള്ക്കിടയില് സ്വാഭാവികമായി സംഭവിക്കുന്ന ഒന്നാണ്. ലെന, ദിലീപ് അടക്കം തെന്നിന്ത്യയിലേയും മലയാളത്തിലേയും നിരവധി താരങ്ങള് ഭാഗ്യം വരാൻ വേണ്ടി പേരില് പുതിയ ലെറ്ററുകള് ചേർക്കുകയും മാറ്റം വരുത്തുകയുമെല്ലാം ചെയ്തിട്ടുണ്ട്. നടിമാരാകട്ടെ അട്രാക്ടീവും വ്യത്യസ്തവുമായ പുതിയ പേരുകള് സ്വീകരിക്കാറുമുണ്ട്. ഭാവന, ഗോപിക, നയൻതാര തുടങ്ങിയവരെല്ലാം സിനിമയിലെത്തിയശേഷം പുതിയ പേര് സ്വീകരിച്ചവരാണ്. അതുപോലെ സ്ക്രീനില് ചെയ്ത ചില കഥാപാത്രങ്ങളുടെ പേര് കൂടി ചേർത്ത് അറിയപ്പെടുന്ന താരങ്ങളും ഇന്ത്യൻ സിനിമയിലുണ്ട്. മണിയൻപിള്ള രാജു, ഇടുവേള ബാബു, അപ്പാനി ശരത്ത്, ചിയാൻ വിക്രം തുടങ്ങിയവർ അക്കൂട്ടത്തില് ചിലരാണ്. പക്ഷേ ഈ പേരുകളെല്ലാം ആരാധകര് നിറഞ്ഞ കൈയടിയോടെ സ്വീകരിച്ചിട്ടുണ്ട്. ആദ്യമായിട്ടാണ് ഒരു പേരു മാറ്റത്തില് ആരാധകര് വിയോജിപ്പ് പ്രകടിപ്പിക്കുന്നത്.
