തെന്നിന്ത്യയില് മാത്രമല്ല ബോളിവുഡിലടക്കം തിളങ്ങി നില്ക്കുന്ന താരമാണ് സമാന്ത റൂത്ത് പ്രഭു. വ്യക്തി ജീവിതത്തില് പ്രശ്നങ്ങളുണ്ടായപ്പോഴും അതിനെയൊക്കെ ആത്മവിശ്വാസത്തോടെ നേരിട്ടാണ് സമാന്ത വെള്ളിത്തിരയില് തിളങ്ങി നില്ക്കുന്നത്. വിവാഹമോചനവും, ആരോഗ്യ പ്രശ്നങ്ങളും എല്ലാം സമാന്ത ചിരിയോടു കൂടി നേരിട്ടു. തന്റെ ആദ്യ സീരീസായ സിറ്റാഡലിന്റെ പ്രൊമോഷനിലായിരുന്നു അടുത്തിടെയില് താരം. സിറ്റാഡെലിന്റെ ഇന്ത്യൻ പതിപ്പായ സിറ്റാഡെല് ഹണിബണ്ണിയില് വരുണ് ധവാനൊപ്പം സാമന്തയാണ് പ്രധാന കഥാപാത്രത്തെ അവതരിപ്പിച്ചത്.
രാജും ഡികെയും ചേർന്ന് സംവിധാനം ചെയ്ത സിറ്റാഡൽ: ഹണി ബണ്ണി 1990 കളുടെ പശ്ചാത്തലത്തില് ഒരുക്കിയ സ്പൈ ത്രില്ലരായിരുന്നു. വരുൺ അവതരിപ്പിക്കുന്ന ബണ്ണി എന്ന സ്റ്റണ്ട്മാനെയും സാമന്ത അവതരിപ്പിച്ച ഹണി എന്ന കഷ്ടപ്പാട് അനുഭവിക്കുന്ന നടിയെയും ചുറ്റിപറ്റിയാണ് സീരിസ് പോകുന്നത്. ഈ ചിത്രം റിലീസായതിനുപിന്നാലെ സാമന്തയും സംവിധായകൻ രാജ് നിഥിമൊറുവും തമ്മില് പ്രണയത്തിലാണെന്ന അഭ്യൂഹങ്ങള് കേള്ക്കാന് തുടങ്ങിയിട്ട് കുറച്ചു നാളുകളായി.
ഇപ്പോഴിതാ അത് ശരിയാണെന്ന സൂചന നല്കുകയാണ് സമാന്തയുടെ ഒരു അഭിമുഖം. ഒരു യൂട്യൂബ് ചാനലിന് നല്കിയ അഭിമുഖത്തിനിടെ പ്രിയപ്പെട്ട കൂട്ടുകാരെല്ലാം സാമന്തയ്ക്ക് മെസ്സേജ് അയച്ചു. അക്കൂട്ടത്തില് രാജും ഉണ്ടായിരുന്നു. ‘‘സാമന്തയ്ക്ക് ഹിന്ദിയില് പ്രാവീണ്യം കുറവായതിനാല് ഈ കഥാപാത്രം ചെയ്യാനാകുമോ എന്ന സംശയമുണ്ടായിരുന്നു, എന്നാല് എല്ലാവരുടേയും ധാരണ തിരുത്തുന്ന പ്രകടനമാണ് അവർ പുറത്തെടുത്തത്...’’ സന്ദേശത്തില് രാജ് പറയുന്നു. വളരേയധികം കഠിനാധ്വാനം ചെയ്യുന്ന വ്യക്തിയാണ് അവരെന്നും അതിന് അഭിനന്ദനം അർഹിക്കുന്നു, എല്ലാ തയ്യാറെടുപ്പുകളും നടത്തിയിട്ട് ഒന്നും ചെയ്യാത്ത വ്യക്തിയെപ്പോലെയാണ് സാമന്ത പെരുമാറുക...’’ എന്നും രാജ് കൂട്ടിച്ചേർക്കുന്നു. രാജിന്റെ ഓഡിയോ മെസ്സേജ് കേട്ട് സാമന്ത ലജ്ജാവതിയായി എന്നാണ് വീഡിയോ കാണുന്നവരുടെ അഭിപ്രായം. ഇടയ്ക്കിടെ ചിരിച്ചും നാണിച്ചും സീരിയസ്സായി ഇരുന്നും സന്തോഷത്തോടെ സന്ദേശം ആസ്വദിച്ചും ഇരിക്കുന്ന സമാന്തയെ വീഡിയോയില് കാണാം.
2017-ലാണ് സാമന്തയും നടൻ നാഗ ചൈതന്യയും വിവാഹിതരായത്. എന്നാല് 2021-ല് ഇരുവരും വേർപിരിഞ്ഞു. അതിനുശേഷം കഴിഞ്ഞ വർഷം നാഗചൈതന്യ നടി ശോഭിതയും വിവാഹം ചെയ്തു.
