ബോളിവുഡിൽ മാത്രമല്ല ഇന്ത്യയൊട്ടാകെ ആരാധകരുള്ള കുടുംബമാണ് ബച്ചൻ കുടുംബം. ബിഗ് ബി അമിതാഭ് ബച്ചൻ, ഭാര്യ ജയ ബച്ചൻ, മകൻ അഭിഷേക് ബച്ചൻ, മരുമകൾ ഐശ്വര്യറായ്, കൊച്ചുമകൻ അഗസ്ത്യ നന്ദ എന്നിങ്ങനെ വെള്ളിത്തിരയിൽ തിളങ്ങി നിൽക്കുന്ന താരങ്ങൾ ഒരുപാടുണ്ട് ബച്ചൻ കുടുംബത്തിൽ.
ബിഗ് സ്ക്രീനിൽ തിളങ്ങിയില്ലെങ്കിൽ കൂടി ബച്ചൻ കുടുംബത്തോട് ഒരു പ്രത്യേക സ്നേഹവും ആരാധനയും പ്രേക്ഷകർക്കുണ്ട്. ഐശ്വര്യ റായിയെ വിവാഹം ചെയ്തത് കൊണ്ട് തന്നെ അഭിഷേക് ബച്ചൻ എന്ന താരത്തിന് ആരാധകർ കൂടിയിട്ടുണ്ട്.
ഇപ്പോഴിതാ വ്യക്തി ജീവിതത്തിലും കരിയറിലും കുടുംബം സ്വാധീനിച്ചിട്ടുണ്ടെന്ന് അഭിഷേക് ബച്ചൻ പറയുകയാണ്. മാതാപിതാക്കളെ കണ്ടാണ് കുട്ടികള് വളരുന്നതെന്നും അതിനാല് രക്ഷിതാക്കള് ജീവിതത്തില് ചില മൂല്യങ്ങള് മുറുകെ പിടിക്കേണ്ടതുണ്ടെന്നും താരം പറഞ്ഞു.
"എന്റെ കുടുംബപേരില് ഏറെ അഭിമാനിക്കുന്നുണ്ട് ഞാൻ. എന്റെ മകള് ഉള്പ്പെടുന്ന അടുത്ത തലമുറ അതിനെ ബഹുമാനിക്കണമെന്ന് ആഗ്രഹിക്കുന്നു.
എന്റെ വ്യക്തി ജീവിതത്തിലും കരിയറിലും കുടുംബം നിർണ്ണായകമായ പങ്കുവഹിച്ചിട്ടുണ്ട്. ഇന്നത്തെ എന്റെ വളർച്ചക്ക് കാരണം കുടുംബമാണ്. അവരുടെ അഭിപ്രായമാണ് എനിക്ക് ഏറ്റവും പ്രധാനം.
എന്റെ മുത്തച്ഛനില് നിന്ന് കിട്ടിയ കുടുംബപ്പേരില് ഞാൻ അഭിമാനിക്കുന്നു. അത് നിലനിർത്താൻ വേണ്ടിയാണ് ഞാൻ ജോലി ചെയ്യുന്നത്. അതുപോലെ എന്റെ മകള് ഉള്പ്പെടുന്ന അടുത്ത തലമുറ ആ പേര് കാത്തുസൂക്ഷിക്കുകയും ബഹുമാനിക്കുകയും വേണം. അങ്ങനെ ചെയ്യുമെന്നാണ് ഞാൻ പ്രതീക്ഷിക്കുന്നത്.
മാതാപിതാക്കള് കുട്ടികള്ക്ക് മികച്ച അധ്യപകരാണോയെന്ന് എനിക്ക് അറിയില്ല. പക്ഷേ രക്ഷിതാക്കള് ചില മൂല്യങ്ങള് മുറുകെപിടിക്കേണ്ടതുണ്ട്. എന്റെ മാതാപിതാക്കള് ഇങ്ങനെ ചെയ്യുന്നത് കണ്ടാണ് ഞാന് വളര്ന്നത്. എന്റെ മകളെയും ഇത്തരത്തില് സമീപിക്കാനാകുമെന്നാണ് ഞാന് പ്രതീക്ഷിക്കുന്നത്... " അഭിഷേക് ബച്ചൻ പറഞ്ഞു.
