ഒരേ സമയം സംവിധായകനായും അഭിനേതാവായും തിളങ്ങി നിൽക്കുന്ന താരമാണ് ബേസിൽ ജോസഫ്. താരത്തിന്റെ ചിത്രങ്ങൾ പോലെ തന്നെ ട്രോൾ വീഡിയോകൾക്കും ആരാധകർ ഏറെയാണ്.
അടുത്തിടെയാണ് ബേസില് ജോസഫ് തുടക്കം കുറിച്ച 'ഷെയ്ക്ക് ഹാൻഡ് യൂണിവേഴ്സ്' സിനിമാലോകത്ത് ട്രെൻഡായി മാറിയത്.
ഷെയ്ക്ക് ഹാൻഡ് നല്കാൻ കൈ നീട്ടി ചമ്മിപ്പോകുന്ന അവസ്ഥയ്ക്ക് സോഷ്യല് മീഡിയ നല്കിയ ചെല്ലപ്പേരാണ് 'ഷെയ്ക്ക് ഹാൻഡ് യൂണിവേഴ്സ്'. ബേസിലിനെയാണ് ഈ ക്ലബ്ബിന്റെ അംബാസിഡറായി സോഷ്യല് മീഡിയ നിയമിച്ചിരിക്കുന്നത്.
ബേസില് ജോസഫിന്റെ കൈകൊടുക്കലോടെയാണ് ഇത് ട്രെൻഡായത്. ഫോഴ്സ കൊച്ചിയുടെ ഉടമസ്ഥനായ പൃഥ്വിരാജിനൊപ്പം കാലിക്കറ്റ് എഫ്സിയുടെ ബ്രാൻഡ് അംബാസിഡർ ആയ ബേസിലും എത്തിയ വേദിയിൽ താരം ഒരു കളിക്കാരന് നേരെ കൈ നീട്ടിയെങ്കിലും അതുകാണാതെ ആ പ്ലെയർ പൃഥ്വിരാജിനു കൈകൊടുക്കുകയായിരുന്നു.
മുൻപ് സമാനമായ അനുഭവം ടൊവിനോയ്ക്ക് ഉണ്ടായപ്പോള്, ടൊവിനോയെ കളിയാക്കി ബേസില് ചിരിച്ചതിനു കിട്ടിയ പണിയാണിത് എന്നായി ട്രോളന്മാരുടെ കണ്ടെത്തല്. എന്തായാലും 'ബേസിലിന്റെ കൈകൊടുക്കല്' ട്രോളുകള് അതോടെ സോഷ്യല് മീഡിയപേജുകളില് നിറഞ്ഞു.
ടൊവിനോയ്ക്കും ബേസിലിനും പിന്നാലെ മെഗസ്റ്റാർ മമ്മൂട്ടിയും വിദ്യാഭ്യാസ മന്ത്രി വി. ശിവൻകുട്ടിയും സുരാജ് വെഞ്ഞാറമൂടും രമ്യ നമ്പീശനും ഉള്പ്പെടെ നിരവധി താരങ്ങള് ക്ലബ്ബിലെത്തി.
ഇപ്പോഴിതാ പുതിയൊരാളും 'ഷെയ്ക്ക് ഹാൻഡ് ' യൂണിവേഴ്സിൽ മെമ്പറായി. നടി ചാന്ദിനിയാണ് ക്ലബ്ബിലേക്കുള്ള പുതിയ എൻട്രി.
ബേസിലിന് കൈകൊടുത്തപ്പോൾ ചാന്ദിനിക്ക് അമളിപറ്റി. ചാന്ദിനിയുടെ ചമ്മൽ കണ്ട് ചിരിക്കുന്ന ബേസിലിനെയും സൗബിനെയും വിഡിയോയിൽ കാണാം. ഏതായാലും ഇതിന്റെ വീഡിയോ സോഷ്യല് മീഡിയയില് വൈറലാകുകയാണ്.
വീഡിയോ വൈറൽ ആയിതോടെ പലരും രസകരമായ കമന്റുകളും കുറിക്കുന്നുണ്ട്.
ബേസിലില് നേരിട്ട് അംഗത്വം നല്കി, "ഇപ്പോ മൂപ്പര് നേരിട്ടാണ് മെമ്പർഷിപ്പ് കൊടുക്കല്,"യൂണിവേഴ്സ് ഉടമ നേരിട്ട് മെമ്ബർഷിപ് കൊടുത്തു,"വീണ്ടും ഒരാള്ക്ക് കൂടെ പുതിയ മനയിലേക്ക് സ്വാഗതം," കമന്റുകള് ഇങ്ങനെ നീളുകയാണ്.
