യുവാക്കളുടെ ഹരമാണ് ബോളിവുഡിന്റെ സ്വന്തം ഹീറോയായ കാര്ത്തിക് ആര്യന്. ബോളിവുഡിലെ യുവതാരങ്ങളുടെ നിരയിൽ ഏറെ ശ്രദ്ധ നേടിയിട്ടുള്ള താരം ഒരുപാട് മികച്ച ചിത്രങ്ങളുടെയും ഭാഗമായിട്ടുണ്ട്. ഒമ്പതുകോടി രൂപ പ്രതിഫലം നല്കാമെന്നുള്ള പാൻ മസാല കമ്പനിയുടെ വാഗ്ദാനം നിരസിച്ചത് ഉൾപ്പടെ, തന്റെ നിലപാടുകളിലും അഭിപ്രായങ്ങളിലും എപ്പോഴും താരം ഉറച്ചു നില്ക്കാറുണ്ട്.
തന്റെ ബോളിവുഡ് കരിയറിന്റെ തുടക്കത്തില് ഒരു മുഖ്യധാരാ നടനായി ആരംഭിച്ച താരമല്ല കാര്ത്തിക് ആര്യന്. തന്റെ ആദ്യ കുറച്ച് ചിത്രങ്ങളിൽ ഒരു എ-ലിസ്റ്ററിനൊപ്പം താരം ജോടിയായിട്ടുമില്ല. എന്നാൽ തന്റെ കഠിനാധ്വാനവും തിരക്കഥകളുടെ തിരഞ്ഞെടുപ്പും കൊണ്ട് താരം പെട്ടെന്ന് തന്നെ ബോളിവുഡില് വ്യക്തിമുദ്ര പതിപ്പിച്ചു. ഇന്ന് എല്ലാ പ്രമുഖ സംവിധായകരോടും പ്രൊഡക്ഷൻ ഹൗസുകളോടും ഒപ്പം പ്രവർത്തിക്കുന്നുണ്ട് താരം.
ഇപ്പോഴിതാ നെപ്പോട്ടിസത്തെക്കുറിച്ചും നെപ്പോ കിഡ്സ് കാരണം അവസരങ്ങള് കുറയുന്നതിനെക്കുറിച്ചും തുറന്നു പറയുകയാണ് കാര്ത്തിക് ആര്യന്. സ്റ്റാർ കിഡ്സ് കാരണം പല അവസരങ്ങളും തനിക്ക് നഷ്ടമായിട്ടുണ്ടെന്ന് കാർത്തിക് ആര്യൻ ഒരു ദേശീയ മാധ്യമത്തിന് നല്കിയ അഭിമുഖത്തില് തുറന്നു പറയുകയാണ്.
‘‘ഒരുപക്ഷേ, താരകുടുംബത്തിൽ നിന്നോ മറ്റെന്തെങ്കിലുമോ ആരെങ്കിലുമോ എന്നതിലുപരി എനിക്ക് അവസരം ലഭിക്കേണ്ടതായിരുന്നു. എനിക്ക് അവസരം ലഭിക്കണമെന്ന് ഞാൻ വിചാരിച്ച അവസരങ്ങളില്, അതല്ലെങ്കില് എനിക്ക് ലഭിക്കേണ്ടിയിരുന്ന പല അവസരങ്ങളും നഷ്ടമായിട്ടുണ്ട്. എന്നാല് അത് അവരുടെ കുറ്റമല്ല. ഞാൻ അതിനോടെല്ലാം പൊരുത്തപ്പെട്ടു കഴിഞ്ഞു. ഞാനും സിനിമാകുടുംബത്തിലായിരുന്നു ജനിച്ചിരുന്നതെങ്കില് അവർക്ക് ലഭിച്ചത് പോലെ എനിക്കും ആ അവസരങ്ങള് കിട്ടുമായിരുന്നു...’’ കാർത്തിക് ആര്യൻ പറഞ്ഞു.
നെപോട്ടിസത്തിനെക്കുറിച്ചുള്ള ചർച്ചകള് വളരെക്കാലമായി സിനിമാമേഖലയില് നിന്ന് ഉയർന്നുകേള്ക്കുന്ന ഒന്നാണ്. നെപ്പോ കിഡ്സ് കാരണം അവസരങ്ങള് കുറയുന്നതിനെപ്പറ്റി പല അഭിനേതാക്കളും പലപ്പോഴായി തുറന്നു പറഞ്ഞിട്ടുണ്ട്. ഏതായാലും കാര്ത്തിക് ആര്യന്റെ ഈ വാക്കുകള് വീണ്ടും ചര്ച്ചകള്ക്ക് ഇടം കൊടുത്തിട്ടുണ്ട്.
ഭൂല് ഭുലയ്യ 3 ആണ് ഏറ്റവും ഒടുവില് പുറത്തിറങ്ങിയ കാർത്തിക് ആര്യൻ ചിത്രം. സമ്മിശ്ര പ്രതികരണം നേടിയ സിനിമ ബോക്സ് ഓഫീസില് മികച്ച പ്രകടനമായിരുന്നു കാഴ്ചവെച്ചത്. 400 കോടിക്ക് മുകളിലായിരുന്നു സിനിമ ആഗോള കളക്ഷൻ നേടിയത്. കാർത്തിക് ആര്യന്റെ കരിയറിലെ ഏറ്റവും ഉയർന്ന കളക്ഷൻ നേടിയ സിനിമ കൂടിയാണിത്. ഡിസംബർ 27 മുതല് ചിത്രം നെറ്റ്ഫ്ലിക്സില് സ്ട്രീമിങ് ആരംഭിച്ചിരുന്നു. കാർത്തിക്കിനൊപ്പം വിദ്യ ബാലൻ, മാധുരി ദീക്ഷിത്ത്, തൃപ്തി ഡിമ്രി, സഞ്ജയ് മിശ്ര, രാജ്പാല് യാദവ്, അശ്വിനി കല്സേക്കർ, വിജയ് റാസ്, മനീഷ് വാധ്വ, രാജേഷ് ശർമ്മ എന്നിവരാണ് ചിത്രത്തിലെ മറ്റ് കഥാപാത്രങ്ങളെ അവതരിപ്പിക്കുന്നത്. ഭൂല് ഭുലയ്യ ഫ്രാഞ്ചൈസിയിലെ മൂന്നാം ചിത്രം കൂടിയാണ് ഇത്.
2025, 2026 വർഷങ്ങളിലേക്കുള്ള കാര്ത്തിക്കിന്റെ പ്രോജക്ട് ലൈനപ്പും വളരെ ആവേശകരമാണ്. കരൺ ജോഹറിനൊപ്പം തു മേരി മെ തേരാ മെ തേരാ തു മേരി, അനുരാഗ് ബസുവിനൊപ്പം ആഷിഖി 3 എന്നിവയാണത്.
