ബോളിവുഡില് എന്നും എപ്പോഴും പലരുടെയും തുറന്നു പറച്ചിലുകളും നിലപാടുകളും വിവാദങ്ങള്ക്ക് കാരണമാകാറുണ്ട്. തങ്ങളുടെ മനസ്സിലുള്ള അഭിപ്രായങ്ങള് ചിലരൊക്കെ തുറന്നു പറഞ്ഞതിന്റെ പേരില് വലിയ വിവാദങ്ങള്ക്ക് തുടക്കം കുറിച്ചിട്ടുണ്ട്. ഇന്ത്യയിലെ മാസ്മരിക സംഗീതഞ്ജനായി ഏവരും അംഗീകരിച്ച സംഗീത സംവിധായകനാണ് എ.ആര്.റഹ്മാന്. എ ആർ റഹ്മാനുമായി പല അവസരങ്ങളിലും സഹകരിച്ച ഗായകനാണ് പ്രേക്ഷകരുടെ സ്വന്തം സോനു നിഗം.
എന്നാല് ഇപ്പോഴിതാ എ.ആർ റഹ്മാന്റെ ഗാനങ്ങള് ഒന്നിനും കൊള്ളില്ലെന്ന് പറഞ്ഞ് പുതിയ വിവാദത്തിനു തിരി കൊളുത്തുകയാണ് ഗായകൻ സോനു നിഗം. ഒരു മോശം ഗാനത്തെ പുകഴ്ത്താൻ തനിക്കാവില്ല എന്നും ഗായകൻ പറഞ്ഞു. അടുത്തിടെ ഒരു മാധ്യമവുമായി നടത്തിയ അഭിമുഖത്തില് 2008ല് പുറത്തിറങ്ങിയ എ.ആർ റഹ്മാൻ സംഗീതം നല്കിയ സല്മാന് ഖാന് നായകനായ യുവരാജ് എന്ന ചിത്രത്തിലെ ഗാനങ്ങളെക്കുറിച്ച് സോനുവിനോട് ചോദിച്ചപ്പോഴാണ് അതിലെ മുഴുവൻ ഗാനങ്ങളും മോശമാണെന്ന് സോനു പറഞ്ഞത്. ചിത്രത്തിനായി ഷാനോ ഷാനോ എന്ന ഗാനവും സോനു നിഗം പാടിയിട്ടുണ്ട്
‘‘പ്രെറ്റി ആവറേജ് മാത്രമാണത്. അത്ര നല്ല പാട്ടല്ല. നമുക്ക് അതിനെക്കുറിച്ച് സംസാരിക്കേണ്ട, എനിക്ക് കള്ളം പറയാൻ കഴിയില്ല. ഒരു മോശം പാട്ടിനെ പുകഴ്ത്താൻ എനിക്ക് കഴിയില്ല. ചിത്രത്തിന് വേണ്ടി പാടിയ മറ്റ് രണ്ട് ഗാനങ്ങളും, അത് മറക്കുക. എല്ലാ ഗാനങ്ങളും മോശമായിരുന്നു...’’ സോനു നിഗം പറഞ്ഞു.
അതിനിടെ, എ.ആർ റഹ്മാന്റെ ഓസ്കാർ നേടിയ 'ജയ് ഹോ' എന്ന ഗാനം ആദ്യം തന്റെ ‘യുവരാജ്’ എന്ന സിനിമക്കു വേണ്ടി നിർമ്മിച്ചതാണെന്നും അത് ഉപയോഗിച്ചില്ലെന്നും സംവിധായകൻ സുഭാഷ്ഘായ് പറഞ്ഞു. ‘‘ജയ് ഹോ ഗാനം യുവരാജിന് വേണ്ടി നിർമ്മിച്ചതാണ്. ഞങ്ങള് അത് റെക്കോർഡുചെയ്തു, പക്ഷേ റെക്കോർഡിംഗ് കഴിഞ്ഞ്, ആ സാഹചര്യത്തില് ഉപയോഗിക്കേണ്ടതില്ലെന്ന് എനിക്ക് തോന്നി. 2008ല് തന്നെ പുറത്തിറങ്ങിയ സ്ലംഡോഗ് മില്യണയർ എന്ന ചിത്രത്തിലേക്കാണ് റഹ്മാൻ ഗാനം നല്കിയത്. അത് അവന്റെ തന്നെ രചനയാണ്...’’ സുഭാഷ്ഘായ് പറഞ്ഞു.
