അടുത്തിടെയായി മലയാളത്തിന്റെ സ്വന്തം മെഗാസ്റ്റാര് തെരഞ്ഞെടുക്കുന്ന ചിത്രങ്ങള്ക്കും പ്രത്യേകതകളുണ്ട്. കാമ്പുള്ള കഥാപാത്രങ്ങളാണ് ഇപ്പോഴിറങ്ങുന്ന മമ്മൂട്ടി ചിത്രങ്ങളുടെ പ്രത്യേകത. മലയാളത്തില് മാത്രമല്ല തമിഴിലും താരം വളരെ സെലക്ടീവായിട്ടാണ് സിനിമകള് തെരഞ്ഞെടുക്കുന്നത്. തിയേറ്ററില് മികച്ച പ്രതികരണം നേടുകയാണ് മമ്മൂട്ടിയുടെ ഏറ്റവും പുതിയ ചിത്രമായ ഡൊമിനിക് ആൻഡ് ദി ലേഡീസ് പഴ്സ്. സിനിമയിലെ ആദ്യ പകുതിയിൽ ‘ഈ രാത്രി’ എന്ന് തുടങ്ങുന്ന ഒരു ഫൺ മൂഡിലുള്ള ഗാനത്തിൽ രസകരമായ ചില സിംപിള് ഡാൻസ് സ്റ്റെപ്പുകൾ മമ്മൂട്ടി ചെയ്യുന്നുണ്ട്. തിയേറ്ററുകളിൽ ആ ഗാനരംഗത്തിനും നൃത്തത്തിനും മികച്ച കൈയടിയും ലഭിക്കുന്നുണ്ട്.
ഇപ്പോഴിതാ ആആ ഡാൻസ് സ്റ്റെപ്പുകളെക്കുറിച്ചുള്ള മമ്മൂട്ടിയുടെ പ്രതികരണം ശ്രദ്ധിക്കപ്പെടുകയാണ്. സിനിമയുടെ വിജയത്തിന് പിന്നാലെ നടന്ന വാർത്താസമ്മേളനത്തിലാണ് മമ്മൂട്ടി ഇക്കാര്യം സംസാരിച്ചത്. ആ ഡാൻസ് സ്റ്റെപ്പുകളെക്കുറിച്ച് ചോദ്യം വന്നപ്പോൾ തനിക്ക് ഡാൻസ് അറിയില്ലെന്നായിരുന്നു മമ്മൂട്ടിയുടെ മറുപടി. കേട്ടിരുന്നവര്ക്ക് ചിരി പടര്ത്തിയ മറുപടിയ്ക്കൊപ്പം മമ്മൂട്ടി അതിനെക്കുറിച്ച് വിശദീകരിച്ചു. ‘‘സ്വാഭാവികമായും ഈ ഡാൻസിനോട് അത്ര പരിചയമുള്ള ആളല്ല ഞാൻ. ഞാൻ ഡാൻസ് ഒന്നും പഠിച്ചിട്ടില്ല. കലാമണ്ഡലത്തിലും പോയിട്ടില്ല. അതുകൊണ്ട് പൊതുവെ മടിയാണ്. സാർ ധൈര്യം തന്നു, പിന്നെ എന്തോ ആവട്ടെ പെട്ടുപോയല്ലോ എന്ന് വിചാരിച്ച് അങ്ങ് ചെയ്തുപോയതാ. അതിന്റെ മൂന്ന് ഇരട്ടിയുണ്ടായിരുന്നു. അത് ഇറങ്ങി ഇറങ്ങി ഇറങ്ങി പുറകോട്ട് വന്നതാ. അത് എത്രത്തോളം മോശമായിട്ടുണ്ടോ അത്രത്തോളം ഉത്തരവാദിത്തം ഞാൻ ഏറ്റടുക്കുന്നു...’’ മമ്മൂട്ടി പറഞ്ഞു.
മമ്മൂട്ടിയെക്കൊണ്ട് ആ ഡാൻസ് ചെയ്യിപ്പിച്ചതിന് പിന്നിലെ രസകരമായ കാരണം ഗൗതം മേനോനും വ്യക്തമാക്കി. ‘‘അതൊരു ഫാൻ ബോയ് മൊമെന്റ് ആണ് എന്റെ. പ്ലസ് സിനിമയിൽ ഒരു ഡയലോഗുണ്ട് ഡാൻസ് എന്റെ വീക്ക്നെസ് ആണെന്ന്. അതുകൊണ്ട് വേണമെന്ന് പറഞ്ഞത്...’’ ഗൗതം മേനോന് പറഞ്ഞു.
