മൂവാറ്റുപുഴ: വലിയ കമ്പനികളുടെ സി.എസ്.ആര്. ഫണ്ട് ഉപയോഗിച്ച് പകുതി വിലയ്ക്കു ടു വീലര് നല്കാമെന്നു പറഞ്ഞ് സംസ്ഥാനത്തുടനീളം കോടിക്കണക്കിന് രൂപയുടെ തട്ടിപ്പ് നടത്തിയ കേസില് മുഖ്യപ്രതി പിടിയില്. ഇടുക്കി തൊടുപുഴ കുടയത്തൂര് കോളപ്ര ചക്കലത്ത് കാവ് ക്ഷേത്രത്തിന് സമീപം ചൂരകുളങ്ങര വീട്ടില് അനന്ദു കൃഷ്ണനെ(26)യാണ് മുവാറ്റുപുഴ പോലീസ് അറസ്റ്റ് ചെയ്തത്.
മൂവാറ്റുപുഴയില് മാത്രം ഒമ്പതു കോടിയോളം രൂപ തട്ടിയെടുത്തെന്നു പോലീസ് പറഞ്ഞു. മുവാറ്റുപുഴ പോലീസ് രജിസ്റ്റര് ചെയ്ത മൂന്ന് തട്ടിപ്പ് കേസി ലാണ് അറസ്റ്റ്. സംഭവം അറിഞ്ഞെത്തിയ നൂറോളം സ്ത്രീകള് ഇന്നലെ പോലീസില് പരാതി നല്കി. സംസ്ഥാനത്ത് ആകെ 800 കോടി രൂപ യുടെ തട്ടിപ്പ് നടന്നതായാണു വിവരം. അറസ്റ്റിലായ അനന്ദുവില് നിന്ന് ഉന്നത രാഷ്ട്രീയ നേതാക്കള് പണം പറ്റിയതായി പോലീസിന് വിവരം ലഭിച്ചിട്ടുണ്ട്. മുവാറ്റുപുഴ സോഷ്യോ ഇക്കണോമിക് ഡവലപ്പ്മെന്റ് സൊസൈറ്റി എന്ന പേരില് മുവാറ്റുപുഴ ബ്ലോക്കിന് കീഴില് പ്രതി ഒരു സൊസൈറ്റി യുണ്ടാക്കി. സൊസൈറ്റി അംഗങ്ങളെ കൊണ്ട് തന്റെ കണ്സല്ട്ടന്സിയിലേക്ക് ടു വീലര് നല്കാമെന്നു പറഞ്ഞുകൊണ്ട് പണം നിക്ഷേപിപ്പിക്കുക യായിരുന്നു. സംസ്ഥാനത്തെ എല്ലാ ബ്ലോക്കിനു കീഴിലും പ്രതി ഇത്തരം സൊസൈറ്റികള് ഉണ്ടാക്കിയിട്ടുണ്ട്. 62 സീഡ് സൊസൈറ്റികള് മുഖേന പണപ്പിരിവ് നടത്തി. പ്രതിക്കെതിരേ എറണാകുളം റൂറല് ജില്ല പോലീസ് മേധാവി വൈഭവ് സക്സേനയ്ക്ക പരാതികള് ലഭിച്ചിരുന്നു.
വിവിധ കമ്പനികളുടെ സി.എസ്.ആര്. ഫണ്ട് ലഭിക്കുമെന്നു വാഗ്ദാനം നല്കിയാണ് വലിയ തട്ടിപ്പ് നടത്തിയത്. അന്വേഷണത്തില് പല കമ്പനി കള്ക്കും ഇക്കാര്യത്തെ ക്കുറിച്ച് അറിവില്ലെന്നാണു വ്യക്തമായത്. സ്കൂട്ടര്, ഹോം അപ്ലൈന്സ്, വാട്ടര് ടാങ്ക്, ഫേര്ട്ടിലൈ സെര്സ്, ലാപ്ടോപ്, തയ്യല്മെഷീന് എന്നിവ 50% ഇളവില് നല്കുമെന്നു പ്രചരിപ്പിച്ച് 2022 മുതല് സംസ്ഥാനത്ത് ഉടനീളം തട്ടിപ്പുനടത്തിയതായി പോലീസ് പറഞ്ഞു. സന്നദ്ധസംഘടനകളെയും മറ്റ് സീഡ് സൊസൈറ്റികളെയും സ്വാധീനിച്ചായിരുന്നു തട്ടിപ്പ്.
സ്വന്തം പേരില് വിവിധ കണ്സല്ട്ടന്സികള് രൂപീകരിച്ച് അതിന്റെ പേരിലാണ് ഇടപാടുകള് നടത്തിയത്. സോഷ്യല് ബീ വെന്ച്ചുവേര്സ് തൊടുപുഴ, സോഷ്യല് ബീ വെന്ച്ചുവേര്സ് ഇയാട്ടുമുക്ക് എറണാകുളം, പ്രഫഷണല് സര്വീസ് ഇന്നോവഷന് കളമശ്ശേരി, ഗ്രാസ്റൂട്ട് ഇന്നോവഷന് കളമശ്ശേരി എന്നീ കമ്പനികളുടെ അക്കൗണ്ടുകള് അനന്ദു കൃഷ്ണന് സ്വന്തം പേരിലാണ് കൈകാര്യം ചെയ്തിരുന്നത്. നാഷണല് എന്.ജി.ഒ. ഫെഡറേഷന് എന്ന സംഘടനയുടെ നാഷണല് കോര്ഡിനേറ്റര് ആണെന്നും ഇന്ത്യയിലെ വിവിധ കമ്പനികളുടെ സി.എസ്.ആര്. ഫണ്ട് കൈകാര്യം ചെയ്യാന് തന്നെയാണു ചുമതലപെടുത്തിയിരിക്കുന്നതെന്നും അവകാശപ്പെട്ടു.
ഇതുവരെ ഒരു കമ്പനിയില് നിന്നും സി.എസ്.ആര്. ഫണ്ട് ലഭ്യമായിട്ടില്ലെന്ന് പ്രതി സമ്മതിച്ചു. പ്രതിക്കെതിരേ അടിമാലി പോലീസ് സ്റ്റേഷനില് ഉണ്ടായിരുന്ന സമാന തട്ടിപ്പ് കേസില് റിമാന്ഡ് ചെയ്തിരുന്നു.
