ഒരിക്കല് കളിയാക്കവര്ക്കും പരിഹസിച്ചവര്ക്കം മുന്നില് തന്റെ കഴിവും ഭാഗ്യവും കൊണ്ട് തിളങ്ങിയ താരങ്ങള് അപൂര്വ്വമാണ്. അക്കൂട്ടത്തില് എടുത്തു പറയാവുന്ന ഒരാളാണ് യുവതലമുറയുടെ ഹരമായി മാറിയ ടൊവിനോ തോമസ്. സഹതാരമായും മറ്റും മലയാള സിനിമയില് തുടക്കം കുറിച്ച ടൊവിനോ ഇന്ന് മലയാള സിനിമയിലെ എണ്ണമറ്റ നായകന്മാരില് മുന്നിരയിലാണ്. താരത്തിന്റെ സിനിമകള്ക്കായി വലിയ ആവേശത്തോടെയാണ് പ്രേക്ഷകരിന്ന് കാത്തിരിക്കുന്നത്.
ഇക്കഴിഞ്ഞ വര്ഷം റിലീസ് ചെയ്ത ചിത്രങ്ങളില് പ്രേക്ഷകര് ഇരുകൈയും നീട്ടി സ്വീകരിച്ച, മികച്ച വിജയം നേടിയ സിനിമയായിരുന്നു ടൊവിനോ തോമസിനെ നായകനാക്കി നവാഗതനായ ജിതിൻ ലാല് സംവിധാനം ചെയ്ത് ‘അജയന്റെ രണ്ടാം മോഷണം’. 100 കോടി ക്ലബ്ബില് ഇടം പിടിച്ച നടന്റെ രണ്ടാമത്തെ വലിയ വിജയമാണ് ഈ ചിത്രം.
ഇപ്പോഴിതാ ഈ സിനിമയുടെ ഭാഗമായി പ്രവർത്തിച്ചിട്ടുള്ള ആരെയെങ്കിലും വാക്കുകൊണ്ടോ നോട്ടം കൊണ്ടോ വേദനിപ്പിച്ചിട്ടുണ്ടെങ്കില് മാപ്പു ചോദിച്ചിരിക്കുകയാണ് ടൊവിനോ. ചിത്രത്തിന്റെ വിജയാഘോഷ ചടങ്ങില് സംസാരിക്കുന്നതിനിടയിലായിരുന്നു താരത്തിന്റെ പ്രതികരണം.
‘‘ഞാൻ ആളുകളോട് പിണങ്ങുന്നത് ചിലപ്പോള് നിസാര കാര്യങ്ങള്ക്ക് ആവാം. അത് അത്രയും നിസാര പിണക്കങ്ങള് ആയി തന്നെ കണക്കാക്കേണ്ടതാണെന്ന് ഇതിനാല് അറിയിച്ചുകൊള്ളുന്നു. ഞാൻ ഒരു ദിവസം രണ്ടു ദിവസം കഴിഞ്ഞാല് എന്തിനാ പിണങ്ങിയതെന്ന് മറന്നു പോകും. പിണക്കങ്ങള് ഒന്നും സ്ഥിരമല്ല. സിനിമകള് വിജയിക്കുമ്പോള് അത് മറക്കണം. ഈ സിനിമയുടെ ഭാഗമായി പ്രവർത്തിച്ചിട്ടുള്ള ആരെയെങ്കിലും ഒരു വാക്കുകൊണ്ടോ നോട്ടം കൊണ്ടോ വേദനിപ്പിച്ചിട്ടുണ്ടെങ്കില് എല്ലാവരോടും മാപ്പ് അപേക്ഷിക്കുകയാണ്. ഈ സിനിമയുടെ ഭാഗമല്ലാതിരുന്നിട്ടും കൂടെ നിന്നവരോട് നന്ദി പറയുന്നു...’’ വികാരഭരിതനായി ടൊവിനോ പറഞ്ഞു.
