അടുത്തിടെ ഏറ്റവും കൂടുതല് വാര്ത്തകളില് നിറഞ്ഞൊരു താരവിവാഹമായിരുന്നു തെന്നിന്ത്യന് താരങ്ങളായ നാഗചൈതന്യയും ശോഭിത ധൂളിപാലയും തമ്മില് നടന്നത്. തെന്നിന്ത്യയിലും ബോളിവുഡിലും തിളങ്ങി നില്ക്കുന്ന സമാന്ത റൂത്ത് പ്രഭുവിനെയായിരുന്നു നാഗചൈതന്യ ആദ്യം വിവാഹം ചെയ്തിരുന്നത്. ദീര്ഘനാളത്തെ പ്രണയത്തിനു ശേഷം ഒന്നായ ഇവരുടെ വിവാഹമോചന വാര്ത്ത ആരാധകരെയും സഹപ്രവര്ത്തകരെയുമൊക്കെ ഞെട്ടിച്ചിരുന്നു.
കഴിഞ്ഞ വര്ഷമാണ് നാഗചൈതന്യയും ശോഭിതയും വിവാഹിതരായത്. രണ്ട് വർഷത്തോളം നീണ്ട പ്രണയത്തിന് ശേഷമാണ് ഇവർ വിവാഹിതരായത്. താരങ്ങള് പ്രണയം രഹസ്യമാക്കി വച്ചിരുന്നെങ്കിലും ആരാധകർ നേരത്തെ തന്നെ ഇവർ പ്രണയത്തിലാണെന്ന് സംശയിച്ചിരുന്നു. ശോഭിതയും നാഗ ചൈതന്യയും ആന്ധ്രപ്രദേശുകാരാണ്. ഒരേ മൂല്യങ്ങളാണ് തന്നെയും ശോഭിതയെയും അടുപ്പിച്ചതിലെ പ്രധാന ഘടകമെന്ന് നാഗ ചൈതന്യ വ്യക്തമാക്കിയിട്ടുണ്ട്.
സിനിമകളിലും സീരീസുകളിലും അർബൻ റോളുകളാണ് ശോഭിത കൂടുതല് ചെയ്തിട്ടുള്ളതെങ്കിലും യഥാർത്ഥത്തില് താരം പരമ്പരാഗത മൂല്യങ്ങള്ക്ക് പ്രാധാന്യം നല്കുന്നയാളാണ്. ആചാര പ്രകാരം വിവാഹം നടത്തണമെന്നതും കുടുംബ ജീവിതം നയിക്കണമെന്നതും ശോഭിതയുടെ വലിയ ആഗ്രഹമായിരുന്നെന്നും ശോഭിത പറഞ്ഞിട്ടുണ്ട്. ഇന്ന് അക്കിനേനി കുടുംബത്തിന് പ്രിയങ്കരിയാണ് ശോഭിത. വിവാഹ ശേഷം നാഗ ചെെതന്യയുടെ ആദ്യ സിനിമയായ തണ്ടെല് റിലീസിന് കാത്തിരിക്കുകയാണ്. സായ് പല്ലവിയാണ് നായിക. സിനിമയുടെ പ്രൊമോഷൻ തിരക്കുകളിലാണ് നാഗ ചൈതന്യ.
ഇപ്പോഴിതാ ഒരു അഭിമുഖത്തില് നാഗ ചൈതന്യ ഭാര്യ ശോഭിതയെക്കുറിച്ച് നടത്തിയ പരാമർശമാണ് ശ്രദ്ധിക്കപ്പെടുന്നത്. തണ്ടെലിലെ ഒരു ഗാനത്തിന്റെ തുടക്കത്തില് ‘ബുജ്ജി തല്ലി’ എന്ന തെലുങ്ക് വാചകം നാഗ ചൈതന്യ പറയുന്നുണ്ട്. പ്രണയാർദ്രമായി ഉപയോഗിക്കുന്ന വാക്ക് സായ് പല്ലവിയുടെ കഥാപാത്രത്തെയാണ് വിളിക്കുന്നത്. നാഗ ചൈതന്യ ഭാര്യയെ സ്നേഹത്തോടെ വിളിക്കുന്നത് ഈ വാക്കാണ്. പാട്ട് ഇറങ്ങിയപ്പോള് ഈ വാക്ക് സിനിമയില് ഉപയോഗിച്ചത് കണ്ട് ശോഭിതയ്ക്ക് അനിഷ്ടം തോന്നിയെന്നാണ് നാഗ ചൈതന്യ പറയുന്നത്.
‘‘വീട്ടിൽ ഞാൻ ശോഭിതയെ ബുജ്ജി തള്ളി എന്നാണ് വിളിക്കുന്നത്, അതുകൊണ്ട് ഞാൻ ബുജ്ജി തള്ളി ഗാനം അവൾക്ക് സമർപ്പിക്കുന്നു. സിനിമ നിർമ്മിക്കുന്നതിന് മുമ്പ് ഞാൻ ഇത് ചന്ദുവിനോട് പറഞ്ഞിരുന്നു. ബുജ്ജി തള്ളി എന്ന ഗാനം പുറത്തിറങ്ങിയപ്പോള് ശോഭിതയ്ക്ക് കുറച്ച് നീരസവും വിഷമവും തോന്നി, കാരണം അത് അവൾക്ക് മാത്രമുള്ളതാണെന്ന് അവൾക്ക് തോന്നി, പക്ഷെ സിനിമയില് എനിക്കത് ഉപയോഗിക്കേണ്ടി വന്നു...’’ നാഗ ചൈതന്യ പറയുന്നു.
തണ്ടെല് റിലീസ് ചെയ്യുന്നത് ഫെബ്രുവരി ഏഴിനാണ്. നാഗ ചൈതന്യയും സായ് പല്ലവിയും ഒരുമിച്ച് അഭിനയിക്കുന്ന രണ്ടാമത്തെ സിനിമയാണിത്. ഇവര് ഒരുമിച്ചെത്തിയ ലൗ സ്റ്റോറി എന്ന സിനിമയില് ഇരുവരുടെയും കെമിസ്ട്രി ഏരെ ശ്രദ്ധ നേടിയിരുന്നു. താരങ്ങള് വീണ്ടും ഒരുമിച്ചെത്തുമ്പോള് ആരാധകർക്ക് പ്രതീക്ഷകളേറെയാണ്.
ആദ്യ വിവാഹ ബന്ധം പിരിഞ്ഞ ശേഷമാണ് നാഗ ചൈതന്യ ശോഭിത ധുലിപാലയെ വിവാഹം ചെയ്തത്. ശോഭിത-ചൈതന്യ വിവാഹ വാർത്തയ്ക്ക് പിന്നാലെ സോഷ്യല് മീഡിയയില് ഏരെ ചർച്ചയായത് സമാന്തയാണ്. വിവാഹബന്ധം പിരിയേണ്ടി വന്നത് സമാന്തയെ ഏറെ വിഷമിപ്പിച്ചിരുന്നു. വിവാഹ ജീവിതത്തില് തന്റെ നൂറ് ശതമാനം നല്കിയെങ്കിലും മുന്നോട്ട് പോയില്ലെന്നാണ് ഒരിക്കല് സമാന്ത ഇതിനെക്കുറിച്ച് പറഞ്ഞത്.
