ആരാധകരെ നേരിട്ടുകണ്ട് സംവദിക്കാനൊരുങ്ങി നടന് ജൂനിയര് എന്ടിആര്. ഇതിനായി പ്രത്യേക സംവാദ പരിപാടി സംഘടിപ്പിക്കാനാണ് താരം തീരുമാനിച്ചിരിക്കുന്നത്. കുറച്ചുനാളായി സിനിമാ പ്രമോഷനുകളുടെയും പ്രീ റിലീസ് പരിപാടികളുടെയും തിരക്കിലായിരുന്നു ജൂനിയര് എന്ടിആര്. ഇതിനിടെ ആരാധകരെ കാണാനോ സംവദിക്കാനോ താരത്തിന് അവസരം ലഭിച്ചിരുന്നില്ല. തുടര്ന്നാണ് ഇത്തരമൊരു പരിപാടി സംഘടിപ്പിക്കാന് ജൂനിയര് എന്ടിആര് തീരുമാനിച്ചത്.
ആരാധകരുടെ സ്നേഹത്തിനും പിന്തുണയ്ക്കും നന്ദി അറിയിക്കുക എന്നതാണ് സംവാദ പരിപാടിയിലൂടെ താരം ലക്ഷ്യമിടുന്നത്. പരിപാടി നടത്തുന്ന സ്ഥലവും തീയതിയും പിന്നീട് പ്രഖ്യാപിക്കുമെന്ന് അറിയിച്ചിട്ടുണ്ട്. പോലീസിന്റെ അനുമതി ലഭിച്ച ശേഷമായിരിക്കും പരിപാടിയെക്കുറിച്ചുളള വിവരങ്ങള് പങ്കുവെക്കുന്നത്.
പരിപാടിയില് കനത്ത സുരക്ഷാ സംവിധാനങ്ങള് ഉണ്ടായിരിക്കുമെന്ന് നടന് പുറത്തുവിട്ട പ്രസ്താവനയില് പറയുന്നു. ആരാധകരുടെ അകമഴിഞ്ഞ സ്നേഹത്തിന് എന്നും കടപ്പെട്ടിരിക്കുന്നു ആരാധകരുമായി നേരിട്ട് സംവദിക്കാന് ഞാന് തീരുമാനിച്ചിരിക്കുകയാണ്. പോലീസില് നിന്നും മറ്റ് അധികാരികളില് നിന്നും ആവശ്യമായ എല്ലാ അനുമതികളും ലഭിച്ച ശേഷം പരിപാടിയെ കുറിച്ച് വിപുലമായി പ്ലാന് ചെയ്യും. ക്ഷമയോടെ എല്ലാവരും കാത്തിരിക്കണമെന്നും താരം പറഞ്ഞു.
കഴിഞ്ഞ സെപ്റ്റംബറില് 'ദേവര' എന്ന ചിത്രത്തിന്റെ പ്രീ റിലീസ് പരിപാടിയില് പതിനായിരക്കണക്കിന് ആളുകള് ഒത്തുകൂടിയിരുന്നു. എന്നാല് സുരക്ഷാ കാരണങ്ങളാല് പരിപാടി റദ്ദാക്കുകയായിരുന്നു.
