ഫറാ ഖാൻ തന്റെ നർമ്മബോധത്തിനും സെലിബ്രിറ്റി സുഹൃത്തുക്കളെ കളിയാക്കുന്ന നിഗൂഢമായ രീതിക്കും പേരുകേട്ട ബോളിവുഡിന്റെ സൂപ്പര്ഹിറ്റ് സംവിധായികയാണ്. വിമര്ശനങ്ങള് ചിലപ്പോഴൊക്കെ നേരിട്ടുണ്ടെങ്കിലും ഫറ തന്റെ സ്വതസിദ്ധമായ സ്വഭാവം എപ്പോഴും കാണിക്കാറുണ്ട്. അതുകൊണ്ട് തന്നെ ഫറയുടെ ചില അഭിമുഖങ്ങളും സംസാരങ്ങളുമൊക്കെ സോഷ്യല് മീഡിയയില് വൈറലാകാറുമുണ്ട്.
ഇപ്പോഴിതാ സാനിയ മിർസയുമൊത്തുള്ള തന്റെ ഏറ്റവും പുതിയ വ്ലോഗിൽ, ഉദിത് നാരായണന്റെ ചുംബന വിവാദത്തെ ഫറാ കളിയാക്കുന്നതാണ് ആരാധകര് ഏറ്റെടുക്കുന്നത്. കുറച്ചു ദിവസങ്ങള്ക്കു മുമ്പ്, ഉദിത് നാരായൺ തന്നോടൊപ്പം സെൽഫി എടുക്കുകയായിരുന്ന ഒരു ആരാധികയെ ചുണ്ടിൽ ചുംബിക്കുന്ന ഒരു വീഡിയോ സോഷ്യല് മീഡിയയില് വൈറലായിരുന്നു. അതിനെ ട്രോളിയാണ് ഫറയുടെ ഈ പുത്തന് വീഡിയോ.
തന്റെ ഉറ്റ സുഹൃത്തായ സാനിയ മിർസയുമൊത്തുള്ള ഏറ്റവും പുതിയ പാചക വ്ലോഗിലാണ് സംഭവം. വീഡിയോയില്, സാനിയയുടെ മകൻ ഇഷാൻ ഫറായുടെ കൈയിൽ നിന്ന് ഒരു പന്ത് തട്ടിയെടുക്കാൻ ശ്രമിക്കുന്നതായി കാണാം. പന്ത് വേണമെങ്കിൽ കവിളില് ഒരു ചുംബനം നൽകാൻ ഫറ കളിയായി ഇഷാനോട് ആവശ്യപ്പെടുന്നുണ്ട്. ഇതിന് ഇഷാൻ ഒഴിഞ്ഞുമാറി പന്ത് എടുക്കാൻ ശ്രമിച്ചു.
‘‘"ആദ്യം, നീ എനിക്ക് ഒരു ചുംബനം തരണം, അത് നിനക്ക് അറിയാമോ...’’ എന്നാണ് ഫറ പറയുന്നത്. അതു കേട്ട് സാനിയ മകനോട് ഒന്ന് കെട്ടിപ്പിടിക്കാനെന്നും പറയുന്നുണ്ട്. അപ്പോഴാണ് ഫറ, ‘‘വരൂ, എനിക്ക് ഒരു ഉദിത് ജി തരൂ!’’ എന്ന് ഇഷാനോട് പറയുന്നത്. ഇത് കേട്ട സാനിയ മുഖം പൊത്തി ഉച്ചത്തില് ചിരിക്കുന്നതും വീഡിയോയിലുണ്ട്.
വീഡിയോ സോഷ്യല് മീഡിയയില് വൈറലായതോടെ കമന്റുകളും നിറഞ്ഞു. ‘ഞാൻ ഇതുവരെ കണ്ടിട്ടുള്ളതിൽ വച്ച് ഏറ്റവും സ്വാഭാവികമായി തമാശക്കാരിയായ വ്യക്തിയാണ് അവർ’, എല്ലാവരും ഇത് ഒരു തമാശയായി കണക്കാക്കുമെന്ന് ഞാൻ പ്രതീക്ഷിക്കുന്നു, കാരണം അദ്ദേഹം ചെയ്തത് ഒട്ടും ശരിയല്ല’, സാനിയ ശരിക്കുമത് ആസ്വദിക്കുന്നുണ്ട്’ എന്നതടക്കമാണ് കമന്റുകള്.
