സെലിബ്രിറ്റികള്ക്കിടയില് വിവാഹവും വിവാഹമോചനങ്ങളും രണ്ടാം വിവാഹവുമൊക്കെ ഒരു സാധാരണ വാര്ത്തയാണ്. ആദ്യ വിവാഹത്തിലുള്ള മക്കളുമായി അര്ദ്ധ സഹോദരങ്ങള് നല്ല ബന്ധം കാത്തുസൂക്ഷിക്കുന്നത് ചിലര്ക്കിടയില് മാത്രമാണ്. അത്തരത്തില് അടുത്തിടെ വന്ന ഒരു വാര്ത്തയായിരുന്നു നടൻ പ്രതീക് ബബ്ബറും സുഹൃത്തായിരുന്ന പ്രിയ ബാനർജിയും വിവാഹിതരായപ്പോള് പ്രതീകിന്റെ അച്ഛനും മുതിർന്ന നടനുമായ രാജ് ബബ്ബറിനെയും അർധസഹോദരങ്ങളെയും വിവാഹത്തിന് ക്ഷണിച്ചില്ലെന്നുള്ളത്. പ്രതീകിന്റെ അർധസഹോദരനും നടനുമായ ആര്യ ബബ്ബർ തന്നെയാണ് ഇക്കാര്യം ഒരു അഭിമുഖത്തില് വെളിപ്പെടുത്തിയത്. പ്രതീകിന്റെ അമ്മ സ്മിത പാട്ടീലിന്റെ മുംബൈയിലെ വസതിയില് നടന്ന വിവാഹചടങ്ങില് അടുത്തബന്ധുക്കളും സുഹൃത്തുക്കളും മാത്രമാണ് പങ്കെടുത്തത്.
ഇപ്പോഴിതാ അതിനു പിന്നാലെ കുടുംബത്തിലെ രണ്ടാംവിവാഹങ്ങളെ തമാശരൂപത്തില് പരാമർശിച്ചിരിക്കുകയാണ് ആര്യ ബബ്ബർ. അച്ഛൻ രാജ് ബബ്ബറും സഹോദരൻ പ്രതീക് ബബ്ബറും സഹോദരിയും ഉള്പ്പെടെയുള്ളവർ രണ്ടുവിവാഹങ്ങള് കഴിച്ചതിനെയാണ് ആര്യ ബബ്ബർ തന്റെ സ്റ്റാൻഡപ്പ് കോമഡിയില് പരാമർശിച്ചത്.
‘‘ഞാൻ സമ്മതിക്കുന്നു, എന്റെ അച്ഛൻ രണ്ടുതവണ കല്യാണം കഴിച്ചു. എന്റെ സഹോദരിയും രണ്ടുകല്യാണം കഴിച്ചു. ഇപ്പോള് എന്റെ സഹോദരനും രണ്ടാമത് കല്യാണം കഴിക്കുകയാണ്. എന്റെ വളർത്തുനായ ഹാപ്പിക്ക് പോലും രണ്ട് ഗേള്ഫ്രണ്ട്സുണ്ട്. അതുകൊണ്ട് രണ്ടാമത് കല്യാണം കഴിക്കുന്നതില് എനിക്ക് പ്രശ്നമില്ല. പക്ഷേ, വിവാഹമോചനത്തിന്റെ സങ്കീർണതകള് കൈകാര്യംചെയ്യാൻ എനിക്ക് മടിയാണ്...’’ ആര്യ ബബ്ബർ പറഞ്ഞു. നിമിഷങ്ങള്ക്കുള്ളില് തന്നെ ആര്യ ബബ്ബറിന്റെ ഈ പരാമർശം സോഷ്യല് മീഡിയയില് ചര്ച്ചയായി.
സഹോദരന്റെ വിവാഹത്തിന് ക്ഷണിക്കാത്തതുമായി ബന്ധപ്പെട്ട് താൻ അച്ഛന്റെ ഉപദേശം തേടിയിരുന്നതായും ആര്യ ബബ്ബർ വെളിപ്പെടുത്തി. മാധ്യമങ്ങളുടെ ചോദ്യങ്ങളോട് എങ്ങനെ പ്രതികരിക്കണമെന്നാണ് അച്ഛനോട് ചോദിച്ചതെന്നും ‘പുരുഷന്മാർ വിവാഹം കഴിച്ചുകൊണ്ടിരിക്കുമെന്ന് അവരോട് പറയൂ...’ എന്നാണ് അച്ഛൻ ഇതിന് മറുപടി നല്കിയതെന്നും ആര്യ ബബ്ബർ പറഞ്ഞു.
പ്രതീക് ബബ്ബർ തന്നെയോ ബബ്ബർ കുടുംബത്തെയോ വിവാഹത്തിന് ക്ഷണിച്ചിട്ടില്ലെന്ന് ആര്യ ബബ്ബർ നേരത്തെ ഒരു അഭിമുഖത്തില് തുറന്നുപറഞ്ഞിരുന്നു. ‘‘അവനെ മറ്റാരൊക്കെയോ സ്വാധീനിക്കുന്നുണ്ട്, പ്രതീക് ഒറ്റയ്ക്കാണ് ഈ തീരുമാനമെടുത്തതെന്ന് ഞാന് കരുതുന്നില്ല...’’ ആര്യ ബബ്ബർ പറഞ്ഞു.
മുതിർന്ന നടനും കോണ്ഗ്രസ് നേതാവുമായിരുന്ന രാജ് ബബ്ബറിന്റെയും രണ്ടാംഭാര്യ സ്മിത പാട്ടീലിന്റെയും മകനാണ് പ്രതീക് ബബ്ബർ. വിവാഹം കഴിഞ്ഞ് മൂന്നുവർഷത്തിന് ശേഷമാണ് നടിയായ സ്മിത പാട്ടീല് അന്തരിച്ചത്. നാദിറ ബബ്ബറാണ് രാജ് ബബ്ബറിന്റെ ആദ്യഭാര്യ. ഈ ബന്ധത്തിലുള്ള മക്കളാണ് ആര്യ ബബ്ബറും ജൂഹി ബബ്ബറും.
സിനിമ നിർമാതാവായ സന്യ സാഗറിനെയാണ് പ്രതീക് ബബ്ബർ ആദ്യം വിവാഹം കഴിച്ചത്. പിന്നീടിവര് വിവാഹമോചിതരായി. അതിനു ശേഷമാണ് സുഹൃത്തായ പ്രിയ ബാനർജിയുമായി പ്രതീക്കിന്റെ വിവാഹനിശ്ചയം കഴിഞ്ഞു. ഇക്കഴിഞ്ഞ വാലന്റൈൻസ് ഡേയിലായിരുന്നു ഇരുവരുടെയും വിവാഹം.
