സാമൂഹ്യ സുരക്ഷ, ക്ഷേമനിധി പെന്ഷന് ഗുണഭോക്താക്കള്ക്ക് ഒരു ഗഡു പെന്ഷന്കൂടി അനുവദിച്ചു. ഇതിനായി 812 കോടി അനുവദിച്ചതായി ധനകാര്യമന്ത്രി കെ എന് ബാലഗോപാല് അറിയിച്ചു. 62 ലക്ഷത്തോളം പേര്ക്കാണ് 1600 രൂപവീതം ലഭിക്കുന്നത്. ഗുണഭോക്താക്കള്ക്ക് അടുത്ത ആഴ്ചയില് പെന്ഷന് ലഭിച്ചുതുടങ്ങും. 26.62 ലക്ഷം പേരുടെ ബാങ്ക് അക്കൗണ്ടില് തുക എത്തും.മറ്റുള്ളവര്ക്കും സഹകരണ ബാങ്കുകളിലൂടെ വീട്ടിലെത്തി പെന്ഷന് കൈമാറും.
പണഞെരുക്കം കാരണം കുടിശികയായ ക്ഷേമ പെന്ഷന് ഈ സാമ്പത്തിക വര്ഷവും അടുത്തസാമ്പത്തിക വര്ഷവുമായി നല്കുമെന്ന് മുഖ്യമന്ത്രി പിണറായി വിജയന് നിയമസഭയില് വ്യക്തമാക്കിയിരുന്നു. കേന്ദ്ര സര്ക്കാര് നയങ്ങള് മുലം സംസ്ഥാനത്ത് കനത്ത സാമ്പത്തിക ഞെരുക്കം തുടരുമ്പോഴും പെന്ഷന് കുടിശികയില്ലാതെ വിതരണം ചെയ്യുകയെന്ന സര്ക്കാരിന്റെ ദൃഡനിശ്ചയമാണ് നടപ്പാകുന്നത്. പെന്ഷന് വിതരണത്തിന് ആദ്യ മുന്ഗണന ഉറപ്പാക്കുന്നു.
