ബഡായി ബംഗ്ലാവ് എന്ന ഷോയിലൂടെ പ്രേക്ഷകരുടെ മനസ്സ് കീഴടക്കിയ താരമാണ് ആര്യ ബാബു. ആര്യ ബാബു എന്നതിനെക്കാള്, ആര്യ ബഡായി എന്ന് പറയുമ്പോഴാണ് ആളുകള്ക്ക് പെട്ടെന്ന് മനസ്സിലാവുന്നത്. ബഡായി ബംഗ്ലാവ് എന്ന ഷോ അത്രയേറെ ആര്യയെ ജനങ്ങളുമായി അടുപ്പിച്ചിട്ടുണ്ട്. അതിന് ശേഷം നിരവധി സീരിയലുകളിലും ബിഗ് ബോസ് അടക്കമുള്ള ഷോകളുടെയും ഭാഗമായ ആര്യ സിനിമകളിലും തന്റെ സാന്നിധ്യം അറിയിച്ചു.
അവതാരകയായും അഭിനേത്രിയായുമൊക്കെ തിളങ്ങി നില്ക്കുന്ന ആര്യ ബിഗ് ബോസ് മലയാളത്തില് മത്സരാര്ത്ഥിയായിട്ടും പ്രേക്ഷകമനസ്സിലിടം നേടിയിരുന്നു. ഏറെ പ്രേക്ഷക ശ്രദ്ധ ലഭിച്ച മത്സരാർത്ഥി ആര്യ തന്നെയായിരുന്നു. ബിസിനസ്സ് വിമണായും ആര്യ തിളങ്ങി നില്ക്കുകയാണിപ്പോള്. കാഞ്ചീപുരം സാരികളുടെ ബിസിനസ് നടത്തുന്ന ആര്യയുടെ ബ്രാൻഡ് ഇന്ന് സെലിബ്രിറ്റി ലോകത്തിനും പ്രിയങ്കരമാണ്.
സോഷ്യല് മീഡിയയിലും സജീവമാണ് ആര്യ. വിവാഹമോചിതയാണെങ്കിലും മകള്ക്കും കുടുംബത്തിനും സുഹൃത്തുക്കള്ക്കുമൊപ്പമുള്ള ഓരോ നിമിഷവും ആസ്വദിക്കാറുണ്ട് താരം.
ഇക്കഴിഞ്ഞ ദിവസം മകൾ ഖുഷിയുടെ 13-ാം പിറന്നാൾ ദിനത്തിൽ ഹൃദയത്തിൽ തൊടുന്ന കുറിപ്പും ബര്ത്ത്ഡേ സെലിബ്രേഷന് വീഡിയോയും ആര്യ പങ്കിട്ടിരുന്നു. സുന്ദരിയായ ഒരു പെണ്കുട്ടിയുടെ അമ്മയായിട്ടുള്ള 13 വര്ഷത്തെ എന്റെ യാത്രയ്ക്കൊപ്പം, കാഞ്ചീവരം ഡോട്ട് ഇന് എന്ന എന്റെ രണ്ടാമത്തെ കുട്ടിയുടെ കൊച്ചി എഡിഷന് രണ്ട് വര്ഷവും തികയുന്നു എന്നാണ് ആര്യ കുറിച്ചത്.
ഇപ്പോഴിതാ താന് പങ്കിട്ട ബര്ത്ത്ഡേ സെലിബ്രേഷന് വീഡിയോയ്ക്ക് താഴെ മോശമായി കമന്റിട്ട ആളിന് കിടിലന് മറുപടി നല്കിയിരിക്കുകയാണ് ആര്യ. തന്റെ മകളുടെ ബര്ത്ത്ഡേ പാര്ട്ടിയുടെ റീലിന് താഴെയാണ് ഒരാള് മോശമായി കമന്റിട്ടിരിക്കുന്നതിന്റെ സ്ക്രീന്ഷോട്ട് പങ്കിട്ടാണ് ആര്യയുടെ വീഡിയോ. ‘‘എന്റെ മകളുടെ ബര്ത്ത്ഡേ പാര്ട്ടിയുടെ ഒരു വീഡിയോ റീല് ഞാന് ഇന്സ്റ്റയില് പങ്കിട്ടിരുന്നു. ആ റീല് ഇപ്പോഴും എന്റെ അക്കൗണ്ടിലുണ്ട്. അതിന്റെ താഴെ വന്ന ‘അതിമനോഹരമായ’ ഒരു കമന്റിന്റെ സ്ക്രീന്ഷോട്ടാണ് ഞാന് പങ്കിട്ടിരിക്കുന്നത്. മിഥുനം 2.0 എന്നാണ് പ്രൊഫൈല്. ഫേക്ക് അക്കൗണ്ടാണോ റിയല് ആണോ എന്നെനിക്കറിയില്ല. ഞാന് നോക്കിയപ്പോള് പ്രൈവറ്റ് അക്കൗണ്ടാണെന്ന് മനസ്സിലായി. സര് ആണോ മാഡം ആണോ ഇതെന്ന് അറിയില്ല.
എന്തായാലും അങ്ങനെയൊരു ബര്ത്ത്ഡേ റീലിന് താഴെ ഇങ്ങനെയൊരു കമന്റ് ഇട്ടത് എന്തിനാണെന്ന് മനസ്സിലായില്ല. ചിലപ്പോള് ഒരു മനസുഖത്തിന് വേണ്ടിയായിരിക്കും. എന്നാല് പിന്നെ മനഃസുഖം ഇത്തിരി കൂടിക്കോട്ടെ എന്നു കരുതിയാണ് ഈ വീഡിയോ ഞാന് പങ്കുവച്ചിരിക്കുന്നത്. ആവശ്യത്തിന് മനഃസുഖം അദ്ദേഹത്തിന് കിട്ടിയെന്ന് ഞാന് വിശ്വസിക്കുന്നു. എന്തായാലും ഇങ്ങനെയൊരു വീഡിയോ പങ്കിടുന്നതില് എനിക്കൊരു മനഃസുഖം കിട്ടുന്നുണ്ട് കേട്ടോ. ഒരു പാലമിട്ടാല് അങ്ങോട്ടും ഇങ്ങോട്ടും എന്നല്ലേ. അപ്പം തനിക്കുമൊരു മനഃസുഖം, എനിക്കും മനഃസുഖം. ബാക്കിയൊക്കെ വരുന്നയിടത്തു വച്ചു കാണാം...’’ എന്ന് പറഞ്ഞാണ് ആര്യ തന്റെ വീഡിയോ അവസാനിപ്പിക്കുന്നത്. സൈബര് അബ്യൂസ്, വെര്ബര് അബ്യൂസ്, സോഷ്യല് മീഡിയ ബുള്ളിയിംഗ് എന്നിങ്ങനെയുള്ള ഹാഷ് ടാഗുകള്ക്കൊപ്പമാണ് ആര്യ വീഡിയോ പങ്കിട്ടിരിക്കുന്നത്. ഒപ്പം മോശമായ കമന്റിട്ട ആളിനെ ടാഗും ചെയ്തിട്ടുണ്ട് താരം.
ഈ വീഡിയോയ്ക്ക് താഴെ പലരും ആര്യയെ പിന്തുണച്ചും കൈയടിച്ചും കമന്റുകള് കുറിക്കുന്നുണ്ട്.
