മലയാളികള്ക്ക് മാത്രമല്ല തെന്നിന്ത്യയിലും ബോളിവുഡിലുമൊക്കെ നിറയെ ആരാധകരുള്ള താരമാണ് പ്രിയാമണി. റിയാലിറ്റി ഷോയില് ജഡ്ജായും തിളങ്ങിയിട്ടുള്ള താരത്തിന്റെ കൈയില് ഏതൊരു കഥാപാത്രവും ഭദ്രമാണെന്ന് സിനിമയിലുള്ളവര്ക്കും ആരാധകര്ക്കും ഉറപ്പുണ്ട്. നാടന് കഥാപാത്രമായാലും മോഡേണ് കഥാപാത്രമായാലും തന്റേതായൊരു കൈയ്യൊപ്പിലൂടെ പ്രിയാമണി രസകരമാക്കാറുണ്ട്.
താരത്തിന്റെ ഏറ്റവും പുതിയ സിനിമ ജിത്തു അഷറഫ് സംവിധാനം ചെയ്ത കുഞ്ചാക്കോ ബോബനൊപ്പമുള്ള ‘ഓഫീസര് ഓണ് ഡ്യൂട്ടി’. ക്രൈം ത്രില്ലര് വിഭാഗത്തിലൊരുക്കിയിരിക്കുന്ന ചിത്രം മികച്ച പ്രതികരണം നേടി മുന്നേറുകയാണ്. ഗീത എന്ന കഥാപാത്രമായി എത്തുന്ന പ്രിയാമണിക്കും കൈയടി നേടുന്നുണ്ട്. സിനിമയുടെ പ്രൊമോഷന് തിരക്കുകളിലാണ് താരം.
ഇപ്പോഴിതാ സിനിമയുടെ പ്രൊമോഷന്റെ ഭാഗമായിട്ടുള്ള അഭിമുഖത്തില് വിവാഹത്തിനു പിന്നാലെ താന് നേരിട്ട വിദ്വേഷ പരാമര്ശങ്ങളെ കുറിച്ച് മനസു തുറക്കുകയാണ് പ്രിയാമണി. വിവാഹ വിവരം പങ്കുവച്ചതു മുതല് സോഷ്യല് മീഡിയയില് അടക്കം അനാവശ്യമായി വിദ്വേഷ പരാമര്ശങ്ങള് നേരിട്ടതായും, വിവാഹം ലവ് ജിഹാദ് ആണെന്ന് പോലും പലരും പറഞ്ഞുവെന്നും പ്രിയാമണി പറഞ്ഞു.
‘‘എന്നെ ആത്മാര്ത്ഥമായി സ്നേഹിക്കുന്ന ആളുകളുമായി എന്റെ സന്തോഷകരമായ നിമിഷം പങ്കിടാന് ആഗ്രഹിച്ചതുകൊണ്ടാണ് വിവാഹനിശ്ചയ വിവരം എല്ലാവരുമായും പങ്കുവച്ചത്. പക്ഷെ അനാവശ്യമായ വിദ്വേഷമാണ് നേരിടേണ്ടി വന്നത്. വിവാഹം ലവ് ജിഹാദ് ആണെന്ന് ചിലര് പറഞ്ഞു. നാളെ ഞങ്ങള്ക്ക് കുട്ടികളുണ്ടാകുമ്പോൾ അവര് ഇസ്ലാമിക് സ്റ്റേറ്റില് (ഐഎസ്ഐഎസ്) ചേരുമെന്ന് പോലും പറഞ്ഞു...
യാതൊരു ബന്ധവുമില്ലാത്ത കാര്യങ്ങളില്, എന്തിനാണ് ആളുകള് ഇങ്ങനെ മറ്റുള്ളവരെ ആക്രമിക്കുന്നത്. എന്തിനാണ് രണ്ട് മതത്തിലുള്ളവര് തമ്മിലുള്ള വിവാഹം മോശമായി കാണുന്നത്. ആ സമയത്ത് ധാരാളം മെസേജുകളാണ് എനിക്ക് ലഭിച്ചത്. രണ്ടു മുന്ന് ദിവസത്തേക്ക് അത് എന്നെ വളരെയധികം ബാധിച്ചിരുന്നു. ഇപ്പോഴും, ഭര്ത്താവിനൊപ്പം എന്തെങ്കിലും പോസ്റ്റ് പങ്കുവച്ചാല്, അതില് വരുന്ന പത്തു കമന്റുകളില് ഒമ്പതും മതത്തെക്കുറിച്ചോ ജാതിയെക്കുറിച്ചോ ആയിരിക്കും...
മോശം കമന്റുകളോട് പ്രതികരിച്ച് എരിതീയില് എണ്ണയൊഴിക്കാന് ഞാന് ആഗ്രഹിക്കുന്നില്ല. അത്തരക്കാര്ക്ക് പ്രധാന്യം നല്കാനില്ല...’’ പ്രിയാമണി പറഞ്ഞു. പ്രിയാ മണിയും മുസ്തഫ രാജും 2017-ലാണ് വിവാഹിതരായത്. ആ സമയത്ത് സോഷ്യല് മീഡിയയില് അടക്കം നേരിട്ട മോശം കമന്റുകള് തന്നെ മാനസികമായും വൈകാരികമായും ബാധിച്ചിരുന്നുവെന്നും പ്രിയാമണി കൂട്ടിച്ചേര്ത്തു.
ജോസഫ്, നായാട്ട്, ഇലവീഴാപൂഞ്ചിറ എന്നീ ചിത്രങ്ങള്ക്ക് ശേഷം ഷാഹി കബീര് തിരക്കഥയൊരുക്കിയിരിക്കുന്ന ചിത്രമാണ് ഓഫീസര് ഓണ് ഡ്യൂട്ടി. നായാട്ട് , ഇരട്ട എന്നീ ചിത്രങ്ങളിലെ അഭിനയത്തിലൂടെ പ്രേക്ഷക ശ്രദ്ധ ആകർഷിച്ച നടനായ ജിത്തു അഷ്റഫാണ് ഓഫീസർ ഓണ് ഡ്യൂട്ടിയുടെ സംവിധായകൻ.
