കോട്ടയം: പരാതിക്കാരിയെ ലൈംഗികബന്ധത്തിനു ക്ഷണിക്കുകയും മദ്യക്കുപ്പി കൈക്കൂലിയായി വാങ്ങുകയും ചെയ്തെന്ന പരാതിയില് എ.എസ്.ഐ. വിജിലന്സ് പിടിയില്. ഗാന്ധിനഗര് പോലീസ് സ്റ്റേഷനിലെ ഗ്രേഡ് എ.എസ്.ഐ. ബിജുവാണു പിടിയിലായത്. കഴിഞ്ഞ ദിവസമാണു സംഭവങ്ങളുടെ തുടക്കം. താന് മുന്പു പരാതി നല്കിയ കേസില് പുനരന്വേഷണം ആവശ്യപ്പെട്ടാണു പരാതിക്കാരി ഗാന്ധിനഗര് സ്റ്റേഷനില് എത്തിയത്.
എസ്.എച്ച്.ഒ. അവധി ആയതിനാല് ഗ്രേഡ് എ.എസ്.ഐ. ആയ ബിജുവിനെയാണു പരാതിക്കാരി കണ്ടത്. എന്നാല്, ഇയാള് ലൈംഗിക ബന്ധത്തിനു ക്ഷണിക്കുകയും മദ്യക്കുപ്പി കൈക്കൂലിയായി ആവശ്യപ്പെടുകയും ചെയ്തെന്നാണു പരാതി.
യുവതി പരാതിയുമായി കോട്ടയം വിജിലന്സ് സംഘത്തെ സമീപിച്ചു. തുടര്ന്നു വിജിലന്സ് സംഘം നിര്ദേശിച്ചതനുസരിച്ചു പരാതിക്കാരി മദ്യക്കുപ്പിയുമായി മാങ്ങാനം ഭാഗത്തു കാത്തുനിന്നപ്പോഴാണു പ്രതി എത്തിയത്. മദ്യക്കുപ്പി സഹിതം വിജിലന്സ് സംഘം പിടികൂടി. ഇന്നലെ വൈകിട്ട് എട്ടുമണിയോടുകൂടിയാണ് ഇയാളെ വിജിലന്സ് സംഘം പിടികൂടിയത്.
