ബോളിവുഡ് സിനിമാതാരങ്ങളുടെ എയർപോർട്ട് ലുക്കും പെരുമാറ്റവും ഒക്കെ എപ്പോഴും സോഷ്യൽ മീഡിയയിൽ തരംഗമായി മാറാറുണ്ട്. ക്യാമറകള് കൊണ്ട് സെലിബ്രിറ്റികളെ പൊതിയുന്ന പാപ്പരാസികള് സോഷ്യൽ മീഡിയയിൽ സ്ഥിരം കാഴ്ചയാണ്.
ഇപ്പോഴിതാ മുംബൈ വിമാനത്താവളത്തില് നിന്നുള്ള നടി രവീണ ടണ്ടന്റെ വീഡിയോയാണ് സോഷ്യൽ മീഡിയയിൽ ശ്രദ്ധിക്കപെടുന്നത്.
മുംബൈ വിമാനത്താവളത്തിന്റെ ചെക്ക്-ഇൻ പോയിന്റില് മകള് റാഷയ്ക്കൊപ്പം എത്തിയതായിരുന്നു രവീണ. ഇതിനിടെ കപില് കരാന്ദേ എന്നയാള് രവീണ ധരിച്ചിരിക്കുന്ന സ്വർണക്കമ്മല് നന്നായിട്ടുണ്ടെന്ന് അഭിപ്രായപ്പെട്ടു. ഉടൻ ഏത് കമ്മല് എന്ന് താരം തിരിച്ച് ചോദിച്ചു. തുടർന്ന് തന്റെ ഇടതു ചെവിയിലെ സ്വർണക്കമ്മല് അഴിച്ച് കപിലിന് സമ്മാനമായി നല്കുകയും ചെയ്തു രവീണ. അമ്മയുടെ ഈ പ്രവൃത്തി കണ്ട് അക്ഷരാർത്ഥത്തില് അത്ഭുതപ്പെട്ട് നില്ക്കുകയായിരുന്നു മകള് റാഷ. ഇതാദ്യമായല്ല ഇത്തരം പെരുമാറ്റം കൊണ്ട് രവീണ ആരാധകഹൃദയം കവരുന്നത്. പലതവണ തന്റെ നല്ല പെരുമാറ്റം കൊണ്ട് രവീണ ആരാധകരുടെ ഗുഡ് ബുക്കിൽ ഇടം നേടിയിട്ടുണ്ട്. ഈ വീഡിയോ അതു കൊണ്ടു തന്നെ ആരാധകർ മികച്ച കമന്റുകൾ നൽകി ഏറ്റെടുക്കുന്നുണ്ട്.
രവീണയ്ക്കും റാഷയ്ക്കുമൊപ്പമുള്ള ചിത്രങ്ങളും കപില് പിന്നീട് സോഷ്യല് മീഡിയയില് പോസ്റ്റ് ചെയ്തു. കഴിഞ്ഞ മാസം ഒരു സമൂഹവിവാഹച്ചടങ്ങില് പങ്കെടുക്കവേ ഒരു വധുവിനും വരനും തന്റെ കയ്യിലെ വളകള് താരം ഊരി നല്കിയിരുന്നു. തന്റെയും ഭർത്താവിന്റെയും പേര് ആലേഖനം ചെയ്ത വളകളായിരുന്നു അത്. വളകള് സമ്മാനിക്കുന്നതിന് മുൻപ് രവീണ അവയില് ചുംബിക്കുകയും വധുവിനെ ആലിംഗനം ചെയ്യുകയും ചെയ്ത വീഡിയോയും ശ്രദ്ധിക്കപ്പെട്ടിരുന്നു.
