കൊപ്പല്: കര്ണാടകയിലെ കൊപ്പലില് തുംഗഭദ്രാ നദിക്കരയില്വെച്ച് അക്രമത്തിനും കൂട്ടബലാത്സംഗത്തിനും ഇരയായെന്ന പരാതിയുമായി ഇസ്രായേലില് നിന്നുള്ള ഒരു ടൂറിസ്റ്റ് ഉള്പ്പെടെ രണ്ടു സ്ത്രീകള്. തങ്ങളെ ലൈംഗികമായി ഉപദ്രവിക്കുകയും മര്ദ്ദിക്കുകയും ചെയ്തതായി ഇവര് പോലീസിന് നല്കിയ പരാതിയില് പറയുന്നു. കര്ണാടകയിലെ അനേഗുണ്ടിയില് നിന്നുള്ളയാളാണ് രണ്ടാമത്തെ സ്ത്രീ. വ്യാഴാഴ്ച രാത്രി ഒരു കൂട്ടം ഇന്ത്യന് വിനോദസഞ്ചാരികളാണ് അക്രമം നടത്തിയതെന്നും പറഞ്ഞു.
പ്രതികള് അമേരിക്കക്കാരനായ ഒരാള് ഉള്പ്പെടെ യാത്രക്കാരില് മൂന്ന് പേരെ കനാലില് തള്ളിയിടുകയും ചെയ്തതായി ഇവര് പറഞ്ഞു. അമേരിക്കയില് നിന്നുള്ള ഡാനിയേല്, മഹാരാഷ്ട്രയില് നിന്നുള്ള പങ്കജ്, ഒഡീഷയില് നിന്നുള്ള ബിബാഷ് എന്നിവരെയാണ് അക്രമികള് കനാലിലേക്ക് തള്ളിയിട്ടത്. അതിന് ശേഷമാണ് സ്ത്രീകളെ ലക്ഷ്യം വച്ചത്. കൊപ്പലിലെ ബാങ്കുകള്ക്ക് സമീപം വെച്ച് അക്രമികള് തങ്ങളെ മര്ദ്ദിക്കുകയും ലൈംഗികമായി പീഡിപ്പിക്കുകയും ചെയ്തതായി ഇരകള് പറഞ്ഞു.
സഞ്ചാരികളുടെ ബൈക്കില് നിന്നും പെട്രോള് തരാമോ എന്ന് ചോദിച്ചുകൊണ്ടാണ് പ്രതികള് ആദ്യം എത്തിയത്. തുടര്ന്ന് യാത്രക്കാരില് നിന്ന് 100 രൂപ ആവശ്യപ്പെട്ടു. എന്നാല് ഇത് നിരസിച്ചപ്പോള് അവര് അവരെ ആക്രമിക്കുകയും സ്ത്രീകളെ ആക്രമിക്കുകയും ചെയ്തുവെന്ന് പരാതിയില് പറയുന്നു. കുറ്റകൃത്യത്തിന് ശേഷം അവര് മോട്ടോര് സൈക്കിളില് രക്ഷപ്പെടുകയും ചെയ്തതായി പരാതിക്കാരന് ആരോപിച്ചു. സ്ത്രീകളെ ഗംഗാവതി താലൂക്ക് ആശുപത്രിയില് പ്രവേശിപ്പിച്ചിട്ടുണ്ട്, അവിടെ അവര് ചികിത്സയിലാണ്.
യാത്രക്കാരുടെ പരാതികളുടെ അടിസ്ഥാനത്തില് കേസെടുത്തു. കൂട്ടബലാത്സംഗം, പിടിച്ചുപറി, കവര്ച്ച, കൊലപാതകശ്രമം എന്നീ കുറ്റങ്ങള് ചുമത്തി പ്രതികള്ക്കെതിരെ കേസെടുത്തു. ഭാരതീയ ന്യായ സംഹിതയുടെ ഒന്നിലധികം വകുപ്പുകള് പ്രകാരം കേസ് രജിസ്റ്റര് ചെയ്തിട്ടുണ്ടെന്ന് കൊപ്പല് പോലീസ് സൂപ്രണ്ട് റാം എല് അരസിദ്ദി സ്ഥിരീകരിച്ചു. പ്രതിയെ കണ്ടെത്താന് ഞങ്ങള് ആറ് പ്രത്യേക സംഘങ്ങള് രൂപീകരിച്ചിട്ടുണ്ട്. സ്ത്രീകളുടെ പരാതിയെ തുടര്ന്ന് ഉടനടി നടപടി സ്വീകരിച്ചു, അന്വേഷണം ഊര്ജിതമായി പുരോഗമിക്കുന്നു,'' അദ്ദേഹം പറഞ്ഞു.
