മലയാളികളുടെ മനസ്സിലെ എവര്ഗ്രീന് സിനിമകളില് ഒന്നാണ് മോഹൻലാൽ–പ്രിയദർശൻ കൂട്ടുകെട്ടിൽ പുറത്തിറങ്ങിയ ചിത്രം എന്ന സിനിമ. മലയാള സിനിമ ചരിത്രത്തിലെ എക്കാലത്തെയും വലിയ ബ്ലോക്ക്ബസ്റ്റർ സിനിമയാണിത്. ആ സിനിമ അന്ന് നേടിയ സാമ്പത്തിക നേട്ടമോ ഇന്നും നിലനില്ക്കുന്ന ജനപ്രീതിയോ മറ്റൊരു ചിത്രത്തിനും നേടാനായിട്ടില്ല എന്ന് നിസ്സംശയം പറയാം. കുസൃതിയും തമാശയും ചമ്മലും സെന്റിമെന്റ്സും ഒക്കെയുള്ള വിഷ്ണു എന്ന കഥാപാത്രമായി മോഹന്ലാല് എത്തിയപ്പോള് പ്രേക്ഷകര് അതിനൊപ്പം കൈയടിച്ചു, ചിരിച്ചു, കരഞ്ഞു, നെഞ്ചോടു ചേര്ത്തു.
അതിലെ ഓരോ കഥാപാത്രങ്ങളും ഇന്നും ജനമനസ്സുകളില് നിറഞ്ഞു നില്ക്കുന്നുണ്ട്. ഒരു നൂലില് കോര്ത്തെടുത്ത മുത്തുകള് പോലെ മറ്റെല്ലാ ചേരുവകള്ക്കുമൊപ്പം അതിലെ പാട്ടുകളും ആസ്വാദകമനസ്സില് നിറഞ്ഞു നില്ക്കുന്നതാണ്. അതിലെ ഓരോ ഗാനങ്ങളും ഇന്നും പ്രേക്ഷകരുടെ ഹിറ്റ് ലിസ്റ്റില് മുന്നില് തന്നെയുണ്ട്.
ഇപ്പോഴിതാ ചിത്രത്തിലെ പാട്ടുപാടി മോഹന്ലാലിനൊപ്പമുള്ള സഹതാരങ്ങളുടെ രസകരമായ ചാറ്റ് വീഡിയോയാണ് ആരാധകര് ഏറ്റെടുക്കുന്നത്. വീഡിയോയില് ചിരിച്ചും കുശലം പറഞ്ഞും പാട്ടു പാടിയുമൊക്കെയുള്ള താരങ്ങളെ കാണാം. ഹലോ മൈ ഡിയര് റോംഗ് നമ്പറിലെ ഒരു സംഭാഷണം പറയുന്നതാണ് വീഡിയോയുടെ തുടക്കം. പിന്നിടിവര് മൂന്നാളും നാദിര്ഷയും ചേര്ന്ന് ‘ചിത്ര’ത്തിലെ ദൂരെ കിഴക്കുദിക്കില് എന്ന പാട്ട് പാടുന്നത് കാണാം. പാട്ടെല്ലാം പാടിക്കഴിയുമ്പോഴാണ് തമാശ തുടങ്ങുന്നത്. ഒപ്പം പാടിയെങ്കിലും വരികളില് ചില സംശയങ്ങള് പ്രകടിപ്പിക്കുകയാണ് മോഹന്ലാല്.
‘‘ഹേയ്, ദൂരെ കിഴക്കുദിക്കും എന്നല്ലേ ?’’ എന്ന് ചോദിക്കുകയാണ് മോഹന്ലാല്, ‘അല്ല, ദൂരെ കിഴക്കുദിക്കില്...’ആണെന്ന് പറഞ്ഞ് തിരുത്തുന്ന സിദ്ദിഖിനെയും മനോജ് കെ ജയനെയും ദൃശ്യങ്ങളില് കാണാം. ‘‘അപ്പോ, ദൂരെ കിഴക്കുദിക്കും എന്ന് പാടിയത് ആരാ’യെന്ന് ചോദിക്കുകയാണ് മോഹന്ലാല്. അവസാനം പാട്ട് കൃത്യമാക്കി കൊടുക്കുകയാണ് ബാബുരാജ്. എല്ലാവരും ഒരുമിച്ച് പാട്ട് ശരിയായി പാടുന്നതും വീഡിയോയിലുണ്ട്. എല്ലാത്തിന്റെയും ഇടയില് താരങ്ങളുടെ പൊട്ടിച്ചിരിയും കളിതമാശകളും നര്മ്മസംഭാഷങ്ങളുമൊക്കെയുണ്ട്. വീഡിയോ ആരാധകര് ഏറ്റെടുത്തതോടെ കമന്റുകളും നിറയുന്നുണ്ട്. ‘പുള്ളി കംഫർട് സോൺ ല് എത്തുമ്പോ ഉള്ള വൈബ് നല്ല രസം ആണ്, അന്നും ഇന്നും എന്നും നമ്മുടെ സ്വന്തം ലാലേട്ടൻ, ഈ ഇരിക്കുന്ന മനുഷ്യൻ ആണി കേരളത്തിലെ ഏറ്റവും വലിയ ‘എല് ബ്രാന്ഡ്’എന്നിട്ടും എന്ത് സിമ്പിൾ ആണ് പുള്ളി, ലാലേട്ടന് വൈബ് സൂപ്പര്...’ എന്നതടക്കമാണ് കമന്റുകള്.
