ഒരു കാലത്ത് ബോളിവുഡില് ഏറെ ആരാധകരുള്ള പ്രണയജോഡികളായിരുന്നു ഷാഹിദ് കപൂറും കരീന കപൂറും. ഇവരുടെ ഓണ്സ്ക്രീന് കെമിസ്ട്രി പോലെ തന്നെ ഓഫ് സ്ക്രീന് പ്രണയവും ഒരു സമയത്ത് ഗോസിപ്പുകോളങ്ങളില് ഇടം പിടിച്ചിരുന്നതാണ്. പലയിടങ്ങളിലും ഒരുമിച്ചെത്തിയ ഇവര് രണ്ടാളും പ്രണയം പറയാതെ പറഞ്ഞിട്ടുണ്ട്, സമ്മതിച്ചിട്ടുമുണ്ട്. എന്നാല് എന്തൊക്കെയോ പ്രശ്നങ്ങള് കാരണം ഇവര് ബ്രേക്കപ്പായി.
പിന്നീട് ഷാഹിദ് മീര രാജ്പുതിനെയും കരീന സെയ്ഫ് അലി ഖാനെയും വിവാഹം ചെയ്തു. രണ്ടു പേരും കരിയറിലും സ്വകാര്യ ജീവിതത്തിലും നല്ല തിരക്കിലുമായി. എങ്കിലും ഇന്നും കരീനയും ഷാഹിദും ഒരുമിച്ചിരുന്നെങ്കിലെന്ന് ആശിച്ച ആരാധകര് ഒരുപാടുണ്ട്.
ഇപ്പോഴിതാ ഒരു വേദിയില് ഒരുമിച്ചെത്തി പരസ്പരം കുശലം പറഞ്ഞും കെട്ടിപ്പിടിച്ചും വിശേഷങ്ങള് പങ്കുവച്ചുമുള്ള കരീനയുടെയും ഷാഹിദിന്റെയും വീഡിയോയാണ് സോഷ്യല് മീഡിയ ഏറ്റെടുക്കുന്നത്. ഇടയ്ക്ക് കുറച്ചു നാള് പരസ്പരം പേരു പോലും പറയാതിരുന്ന ഇവര് എല്ലാം മറന്ന് സംസാരിക്കുന്ന വീഡിയോ കണ്ട സന്തോഷത്തിലാണ് ആരാധകര്. സെലിബ്രിറ്റികള്ക്കിടയില് ഇണക്കങ്ങളും പിണക്കങ്ങളും സര്വ്വസാധാരണമായതു കൊണ്ടു തന്നെ ഈ വീഡിയോ ആരാധകരെ അതിശയിപ്പിക്കുന്നില്ല എന്നുള്ളതും മറ്റൊരു സത്യം.
തരംഗമായി മാറിയ വീഡിയോയ്ക്ക് താഴെ ആരാധകര് കമന്റുകളും കുറിക്കുന്നുണ്ട്. ‘ജബ് വീ മെറ്റ് ജോഡികള് ഒന്നിച്ചതില് സന്തോഷം, 2025 ൽ ഗീതും ആദിത്യയും, ഇപ്പോഴുമത് കാണാന് കാത്തിരിക്കുന്നു, ഒരു ഫ്രെയിം, രണ്ട് നക്ഷത്രങ്ങൾ, ആയിരം ഓർമ്മകൾ..’ എന്നിങ്ങനെ പോകുന്നു കമന്റുകള്.
കഴിഞ്ഞ ദിവസം പഴയ പ്രണയ ജോഡികളായിരുന്ന ശില്പ്പ ഷെട്ടിയും അക്ഷയ് കുമാറും ഒരുമിച്ച് വേദി പങ്കിട്ടതും അവരുടെ സൂപ്പര്ഹിറ്റ് ഗാനമായ ‘ചൂരാ കെ ദില് മേരാ’യ്ക്ക് ചുവടു വച്ചതുമൊക്കെ സോഷ്യല് മീഡിയ ഏറ്റെടുത്തതാണ്. അതിനു പിന്നാലെയാണ് ഷാഹിദും കരീനയും ഒരുമിച്ചുള്ള വീഡിയോ സോഷ്യല് മീഡിയയില് തരംഗമാകുന്നത്.
