സോഷ്യല് മീഡിയ തുറന്നു കഴിഞ്ഞാല് പുതിയ ഫാഷന് ട്രെന്ഡുകളുടെ ഒരു ലോകം തന്നെയാണ് തുറന്നുവച്ചിരിക്കുന്നത്. ഇതില് ഏറ്റവും പുതിയതാണ് വണ് ലെഗ്ഡ് ജീന്സ്. (one legged jeans). വില ഇത്തിരി കൂടും 38,330 രൂപ (അതായത് 440 ഡോളര്) മാത്രം. ഫ്രഞ്ച് ഫാഷന് ബ്രാന്ഡായ കോപര്ണിയാണ് ഫാഷന് പ്രേമികള്ക്കായി ഈ വണ് ലെഗ്ഡ് ജീന്സ് ഏറ്റെടുത്തു കഴിഞ്ഞു. പക്ഷേ, പ്രായോഗികമതികള്ക്ക് സംഗതി അത്രയ്ക്ക് രുചിച്ച മട്ടില്ല. അവര് ഈ വസ്ത്രത്തിന്റെ പ്രായോഗികതയെയും ഈട് നില്ക്കുന്നതിനെ കുറിച്ചും സംശയങ്ങള് പ്രകടിപ്പിച്ച് കഴിഞ്ഞു.
ടിക് ടോക്കില് 16 ദശലക്ഷവും ഇന്സ്റ്റാഗ്രാമില് 7 ദശലക്ഷത്തിലധികവും ഫോളോവേഴ്സുള്ള ക്രിസ്റ്റി സാറ, ഈ ഒറ്റക്കാലന് ജീന്സിനെ സമൂഹ മാധ്യമങ്ങള്ക്ക് പരിചയപ്പെടുത്തി. 'ഇന്റര്നെറ്റിലെ ഏറ്റവും വിവാദപരമായ ജീന്സ്' എന്ന വിശേഷണത്തോടെയാണ് ജീന്സിനെ പരിചയപ്പെടുത്തിയത്. ക്രിസ്റ്റി ജീന്സിനെ പരിചയപ്പെടുത്തുന്നതിനിടെ ഫ്രെയിമിലേക്ക് കയറിവന്ന ഭര്ത്താവ് തന്നെ ജീന്സിനെതിരെ രംഗത്തെത്തി. ആരും അത് ധരിക്കില്ലെന്ന് അദ്ദേഹത്തിന് അത്രയ്ക്ക് ഉറപ്പുണ്ട്. നിരവധി പേര് ക്രിസ്റ്റിയുടെ ഭര്ത്താവിന്റെ അഭിപ്രായത്തോട് യോജിച്ചു. വിചിത്രമെന്നും പരിഹാസ്യമെന്നുമുള്ള കുറിപ്പുകളും പിന്നാലെ എത്തി.
റുപോള്സ് ഡ്രാഗ് റേസ്, ക്വീര് ഐ ഫോര് ദി സ്ട്രെയിറ്റ് ഗൈ എന്നിവയിലൂടെ പ്രശസ്തനായ എമ്മി അവാര്ഡ് നേടിയ സ്റ്റൈലിസ്റ്റായ കാര്സണ് ക്രെസ്ലിയ്ക്കും മറ്റൊന്നല്ല അഭിപ്രായം. ആ ജീന്സില് ഉറച്ച് നില്ക്കാന് ഒരു കാല് പോലും ഉണ്ടാകില്ലെന്ന് പ്രതീക്ഷിക്കുന്നതായി കാര്സണ് ന്യൂയോര്ക്ക് പോസ്റ്റിനോട് പറഞ്ഞു. അതേസമയം ഫ്രഞ്ച് ആഡംബര ബ്രാന്ഡായ കോപ്പര്ണി 'വണ്-ലെഗ് ഡെനിം ട്രൗസര്' എന്ന പേരില് ഡെനിം പീസ് ലഭ്യമായ എല്ലാ അളവിലും മാര്ക്കറ്റിലെത്തിക്കുകയും വിറ്റ് തീര്ക്കുകയും ചെയ്തു. സമൂഹ മാധ്യമങ്ങളില് വിമര്ശനം ഉയരുന്നുണ്ടെങ്കിലും ഇത്തരത്തില് പാതിയായ വസ്ത്രങ്ങള്ക്ക് ഫാഷന് വിപണയില് വന് ഡിമാന്റാണ്.
