തിരുവനന്തപുരം: വയനാട് ദുരന്തത്തിനിരയായ മാതാപിതാക്കള് നഷ്ടമായ കുട്ടികളുടെ പഠനാവശ്യത്തിനായി 10 ലക്ഷം രൂപ വീതം അനുവദിക്കും. ഇന്ന് ചേര്ന്ന മന്ത്രിസഭായോഗത്തിലാണ് തീരുമാനം. പുനരധിവാസത്തിന് ഏറ്റെടുക്കുന്ന ഭൂമിയ്ക്ക് നഷ്ടപരിഹാരം നല്കാനും പ്രാജക്ട് സ്പെഷ്യല് ഓഫീസറുടെ ചുമതലയ്ക്ക് കീഴില് ടൗണ്ഷിപ്പിന്റെ കാര്യങ്ങള് നിര്വ്വഹിക്കാനും തീരുമാനിച്ചിട്ടുണ്ട്.
മേപ്പാടി പഞ്ചായത്തിലെ ഉരുള്പൊട്ടലില് മാതാപിതാക്കള് നഷ്ടമാത് ഏഴു കുട്ടികള്ക്കാണ്. മാതാപിതാക്കളില് ഒരാളെ നഷ്ടപ്പെട്ടത് 14 കുട്ടികള്ക്കുമാണ്. മുഖ്യമന്ത്രിയുടെ ദുരിതാശ്വാസ നിധിയില് നിന്നും 10 ലക്ഷം ഇവര്ക്ക് നല്കും. അതേസമയം 18 വയസ്സിന് ശേഷം കുട്ടികള്ക്ക് ഈ തുക പിന്വലിക്കാന് കഴിയുന്ന രീതിയിലായിരിക്കും സഹായം ക്രമീകരിക്കുക. തുക ജില്ലാ കളക്ടറുടെ അക്കൗണ്ടില് നിക്ഷേപിച്ച് പ്രതിമാസ പലിശ ബന്ധപ്പെട്ട കുട്ടിയുടെ രക്ഷകര്ത്താവിന് ഓരോ മാസവും നല്കും. വനിതശിശു വികസന വകുപ്പ് അനുവദിച്ച സഹായത്തിന് പുറമെയാണിത്.
ടൗണ്ഷിപ്പ് നിര്മ്മാണത്തിനായി എല്സ്റ്റോണ് എസ്റ്റേറ്റില് നിന്ന് 64 ഹെക്ടര് ഭൂമിയിലേറെയാണ് ഏറ്റെടുക്കുന്നത്. 26.56 കോടി രൂപയാണ് എസ്റ്റേറ്റിന് നല്കുക. മുഖ്യമന്ത്രിയുടെ ദുരിതാശ്വാസ നിധിയില് നിന്നാണ് ഈ തുകയും അനുവദിക്കുന്നത്. പദ്ധതികളുടെ നടത്തിപ്പിനായി രൂപീകരിച്ച പദ്ധതി നിര്വ്വഹണ യൂണിറ്റില് വിവിധ തസ്തികള് അനുവദിച്ചു. അക്കൗണ്ട്സ് ഓഫീസര്, സിവില് എന്ജിനീയര് തസ്തികകളും സൃഷ്ടിക്കും.
ഫിനാന്സ് & അക്കൗണ്ട്സ് ഓഫീസര് എന്ന തസ്തിക ഫിനാന്സ് ഓഫീസര് എന്ന് പുനര്നാമകരണം ചെയ്യും. സ്റ്റാഫിന്റെ നിയമനം നടത്തുവാനുള്ള നടപടികള് സ്വീകരിക്കുവാന് വയനാട് ടൗണ്ഷിപ്പ് പ്രോജക്ട് സ്പെഷ്യല് ഓഫീസര്ക്ക് അനുമതി നല്കും. പ്രോജക്ട് ഇംപ്ലിമെന്റേഷന് യൂണിറ്റിന്റെ തലവനായി വയനാട് ടൗണ്ഷിപ്പ് പ്രോജക്ട് സ്പെഷ്യല് ഓഫീസറെ ചുമതലപ്പെടുത്തും.
