തിരുവനന്തപുരം; ജനന സര്ട്ടിഫിക്കറ്റിലെ പേരുമാറ്റത്തിനുള്ള നിബന്ധനകളില് സമൂലമായ ഇളവുകള് നല്കാന് സര്ക്കാര് തീരുമാനിച്ചതായി മന്ത്രി എം ബി രാജേഷ്. കേരളത്തില് ജനനം രജിസ്റ്റര് ചെയ്ത ആര്ക്കും, ഗസ്റ്റ് വിജ്ഞാപനം വഴി മാറ്റം വരുത്തിയ പേര്, ഇനി ജനന രജിസ്്ട്രേഷനില്
ഒറ്റത്തവണ മാറ്റം വരുത്താനാവും. വര്ഷങ്ങളായി നിലനിന്ന സങ്കീര്ണതക്കാണ് സര്ക്കാര് പരിഹാരം കണ്ടിരിക്കുന്നതെന്നും മന്ത്രി അറിയിച്ചു.
നിലവില് കേരളത്തിലെ പൊതുമേഖലയില് വിദ്യാഭ്യാസം ലഭിച്ച കുട്ടികള്ക്ക് ഗസറ്റ് വിജ്ഞാപനത്തിന്റെ അടിസ്ഥാനത്തില് എസ്എസ്എല്സി സര്ട്ടിഫിക്കറ്റിലും സ്കൂള് രേഖകളിലും പേരില് മാറ്റം വരുത്താനും, തുടര്ന്ന് ഈ സ്കൂള് രേഖകളുടെ അടിസ്ഥാനത്തില് മാത്രം ജനന സര്ട്ടിഫിക്കറ്റ് തിരുത്താനുമാണ് അവസരമുണ്ടായിരുന്നത്. ഇത് പല സങ്കീര്ണതകള്ക്കും വഴിവെച്ചിരുന്നു. സി.ബി.എസ്.ഇ/ ഐസിഎസ്ഇ സ്കൂളുകളില് പഠിച്ചവര്ക്കും, രാജ്യത്തിന് പുറത്ത് പഠനം നടത്തിയവര്ക്കും ഗസറ്റ് വിജ്ഞാപനം വഴി പേര് തിരുത്തിയാലും അതുവെച്ച് സ്കൂള് രേഖകളില് മാറ്റം വരുത്താനാകാത്തതിനാല് ജനന സര്ട്ടിഫിക്കറ്റില് പേര് തിരുത്താന് സാധിക്കുന്നുണ്ടായിരുന്നില്ല.
