കഴിഞ്ഞ കുറച്ചു നാളുകളായി മലയാള സിനിമ നീരാളി പിടുത്തത്തിൽ അകപ്പെട്ടത് പോലെയാണ്. ആദ്യം കേട്ടത് മീ ടു ആയിരുന്നു, പിന്നീടത് കാസ്റ്റിംഗ് കൗച്ചിലെത്തി. ഇപ്പോൾ എല്ലാം കഴിഞ്ഞ് എത്തി നില്ക്കുന്നത് ഡ്രഗ് മാഫിയയുടെ പിടിയിലാണ്. മലയാള സിനിമയിലെ യുവ നടന്മാരെല്ലാം ഡ്രഗ് അഡിക്ട്സ് ആണെന്ന വാർത്തകൾ കുറച്ചു നാളുകളായി പരക്കുന്നുണ്ട്.
അതിനടിയിൽ ഇക്കഴിഞ്ഞ ദിവസം ലഹരി ഉപയോഗിക്കുന്നവര്ക്കൊപ്പം ഇനി സിനിമ ചെയ്യില്ലെന്ന് യുവനടി വിൻസി അലോഷ്യസ് പറഞ്ഞത് വാർത്തകളിൽ നിറഞ്ഞു. ലഹരി ഉപയോഗിച്ച ഒരു നടനില് നിന്നും മോശം അനുഭവം ഉണ്ടായതിനാലാണ് തീരുമാനമെന്നുമുള്ള വിന്സിയുടെ വെളിപ്പെടുത്തലാണ് ചര്ച്ചകളിൽ നിറഞ്ഞത്. സഹതാരങ്ങളും നിരവധി ആരാധകരും വിൻസിയുടെ തുറന്നു പറച്ചിലിൽ ഒപ്പം നിന്നു.
ഇപ്പോഴിതാ സിനിമ സീരിയൽ താരം ശ്രുതി രജനികാന്ത് വിൻസിയെ പിന്തുണച്ചു ചെയ്ത വീഡിയോ സോഷ്യൽ മീഡിയയിൽ വൈറൽ ആകുകയാണ്. ലഹരി ഉപയോഗിക്കുന്ന തനിക്ക് അറിയുന്നവര്ക്കൊപ്പം അഭിനയിക്കില്ലെന്ന വിന്സിയുടെ തീരുമാനത്തിന് പിന്നാലെ അവര് നേരിട്ട സൈബര് ആക്രമണത്തെ അപലപിച്ചാണ് ശ്രുതി രംഗത്ത് വന്നത്. "പറയണോ എന്ന് പലതവണ ആലോചിച്ചതാണ്. എന്റെ ഒരു കാഴ്ചപ്പാട് പറയാന് പറ്റുന്ന ഒരു വിഷയവും മേഖലയുമാണ് ഇത്. വിന്സി അലോഷ്യസ് പറഞ്ഞ കാര്യമാണ് പറയാന് പോകുന്നത്. വിന്സി അലോഷ്യസ് ഒരു പ്രശസ്തയായ നടിയാണ്. എനിക്ക് ഭയങ്കര ഇഷ്ടമുള്ള നടിയാണ്. വിന്സി ഒരു നടി ആകുന്നതിനു മുന്നേ തന്നെ എനിക്ക് ഇഷ്ടമാണ്. വിന്സി ഇങ്ങനെ ഒരു അവസ്ഥ നേരിടേണ്ടിവന്നു എന്ന് പറയുന്നത് തന്നെ ഷോക്കിങ് ആയി തോന്നി. അവര് പറഞ്ഞ കാര്യത്തിന് ആളുകളില് നിന്നും വന്ന കമന്റുകള് കണ്ട് ആണ് ഞാന് ഞെട്ടിയത്.
ചില ആളുകള് ജീവിതത്തിലെ നിരാശ ഇങ്ങനെ പറഞ്ഞു തീര്ക്കുന്നതാകാം അല്ലെങ്കില് ചിലര് ചുമ്മാ നെഗറ്റീവ് പറഞ്ഞാല് കമന്റ്സിന് ലൈക്ക് കിട്ടും എന്നുകരുതി ആയിരിക്കും. അതെല്ലാം ഓരോരുത്തരുടെ വ്യക്തിസ്വാതന്ത്ര്യമാണ്.
സിനിമയോ അല്ലെങ്കില് മറ്റേതെങ്കിലും മേഖലയോ ആകട്ടെ നമ്മള് കാണുന്ന ആളുകളല്ല ജീവിതത്തിലേക്ക് വരുമ്പോൾ.
ഞാന് എല്ലാ സിനിമയും മുടങ്ങാതെ പോയി തിയറ്ററില് കാണുന്ന ഒരാളായിരുന്നു. അതുപോലെതന്നെ സിനിമ എന്ന് പറയുമ്പോൾ കണ്ണില് ഒരു അദ്ഭുതവും ഒക്കെ ഉള്ള ഒരാളായിരുന്നു. പക്ഷെ ഇപ്പോ ഞാന് സിനിമ കാണുന്നത് ചുരുങ്ങി. ചിലരുടെ പടം വന്നാല് ഞാന് കാണാതായി. അതിനൊക്കെ ഓരോ കാരണങ്ങള് ഉണ്ട്. ചിലത് ദൂരെനിന്ന് കാണുമ്പോൾ ഭയങ്കര ഭംഗിയായിരിക്കും. അടുത്തു വരുമ്പോഴേ അതിന്റെ കുറ്റങ്ങള് മനസ്സിലാകൂ. അതുപോലെയാണ് ഇപ്പോള് വിന്സി പറഞ്ഞ കാര്യം. നമുക്ക് വെളിയില്നിന്ന് കാണുമ്പോൾ ഭയങ്കര ആഡംബര ജീവിതം, അവരുടെ അഭിനയിക്കാനുള്ള കഴിവ്, സ്റ്റാര്ഡം. ഇതെല്ലാം കണ്ടാല് എന്ത് അടിപൊളിയാ എന്ന് തോന്നിപ്പോകും. പക്ഷേ അവരൊന്നും അങ്ങനെയല്ല.
ഇത്രയധികം സ്റ്റാര്ഡം ഉണ്ടായിട്ടും വിനയത്തോടെ പെരുമാറുന്നവരുണ്ട്. അല്ലെങ്കില് നമ്മള് ഭയങ്കര അഹങ്കാരി ആയിരിക്കും എന്നു വിചാരിച്ച് അടുത്ത് ചെന്ന് കഴിഞ്ഞ് ഒരുപാട് മനസ്സിലാക്കി കഴിയുമ്പോൾ അയ്യോ ഇതൊരു പാവമാണല്ലോ എന്ന് ചിന്തിക്കുന്ന ആളുകളും ഉണ്ട്. അതുപോലെ തന്നെ ഒരുപാട് ആരാധിച്ച് നമ്മള് അടുത്തറിഞ്ഞു കഴിഞ്ഞപ്പോള് ദൈവമേ ഇതിനെ പരിചയപ്പെടേണ്ടായിരുന്നു, എന്റെ ജീവിതത്തില് ഇനി ഇയാളെ കാണാന് താല്പര്യമില്ല എന്ന് തീരുമാനിച്ച ആളുകളും ഇന്ഡസ്ട്രിയില് ഉണ്ടായിട്ടുണ്ട്.
വിന്സിയോ നീ വല്യ സൂപ്പര് സ്റ്റാറോ, നിനക്കിപ്പോ സിനിമ വല്ലതും ഉണ്ടോ, എന്നൊക്കെ ചോദിക്കുന്നവര് ഉണ്ട്. സത്യം പറഞ്ഞാല് അവരോടൊന്നും എനിക്ക് ഒരു ബഹുമാനവും ഇല്ല അവരെയൊന്നും ഞാന് ഒരു വ്യക്തിയായി കണക്കാക്കുന്നതുമില്ല. ഇവര്ക്കൊക്കെ വിദ്യാഭ്യാസം ഇല്ലെന്നു പറയണോ അതോ വിദ്യാഭ്യാസം കൂടിപോയതുകൊണ്ടാണ് എന്ന് പറയണോ എന്ന് അറിയില്ല. വിന്സി പറഞ്ഞ ഒരു കാര്യം സത്യമാണ്, ഒരുപക്ഷേ പടം ഇല്ലായിരിക്കാം. എന്നോട് കുറേ പേര് അടുത്ത പ്രോജക്റ്റ് ഏതാ എന്ന് ചോദിച്ചാല് പറയാന് എനിക്ക് പ്രോജക്റ്റ് ഇല്ല.
പ്രോജക്റ്റ് എന്നത് തുരുതുരാ വന്നുകൊണ്ടിരിക്കുന്ന സാധനം അല്ല. വരുന്നതൊക്കെ നമുക്ക് ഇഷ്ടപ്പെടണം എന്നുമില്ല. ഭയങ്കര മത്സരമുള്ള ഫീല്ഡ് ആണ്, എന്തും എങ്ങനെയും ചെയ്യാന് തയാറായ ആള്ക്കാരുണ്ട്, അങ്ങനെ അല്ലാത്തവരും ഉണ്ട്. ഇതൊരു ഭയങ്കര വിശാലമായ കാര്യമാണ്.
പ്രോജക്റ്റ് ഇല്ലാത്ത കഴിവ് ഇല്ലാത്തതുകൊണ്ടാണ് എന്ന് വിന്സിയെപോലെ ഒരു ആര്ട്ടിസ്റ്റിന്റെ മുഖത്ത് നോക്കി എങ്ങനെ പറയാന് പറ്റും ഒരിക്കലും പറയാന് പറ്റില്ല. അപ്പോള് നിങ്ങള് ചിന്തിക്കേണ്ടത് തിരിച്ചാണെന്നാണ്, കാരണം വിന്സിക്കൊക്കെ പടം കിട്ടുന്നില്ല എന്നുണ്ടെങ്കില് അവിടെ എന്തോ കുഴപ്പമുണ്ട് എന്നാണ് ചിന്തിക്കേണ്ടത്.
വിഡിയോയുടെ താഴെയുള്ള കുറെ കമന്റുകള് കണ്ടു, ഇങ്ങനെ പലരും മുന്നോട്ടു വന്നാല് തീരാവുന്ന പ്രശ്നമേ ഉള്ളൂ എന്ന്. മുന്നോട്ടു വന്നതുകൊണ്ട് കാര്യമില്ല നിങ്ങളും ഓരോരുത്തരും മുന്നോട്ടു വരണം. എന്തുകൊണ്ട് ചില ആര്ട്ടിസ്റ്റുകള്ക്ക് ഇപ്പോള് അവസരം കിട്ടുന്നില്ല, എന്തുകൊണ്ട് ഇന്ന ആര്ട്ടിസ്റ്റിനെ ഇപ്പോള് കാണുന്നില്ല എന്നുള്ളത് ചികഞ്ഞു പോകാന് ആളുകള് ഉണ്ടെങ്കില് ഈ ആര്ട്ടിസ്റ്റുകള് ഒക്കെ മുന്നോട്ട് വരും. നമ്മള് പറയില്ലേ മിന്നുന്നതെല്ലാം പൊന്നല്ല എന്ന്, അതുപോലെ തന്നെയാണ് എനിക്ക് പറയാനുള്ളത്, നമ്മള് ഈ കാണുന്നതൊന്നുമല്ല യാഥാര്ഥ്യം. അത് എല്ലാവരും മനസ്സിലാക്കുക. പലര്ക്കും പല രീതിയിലുള്ള മോശം അനുഭവങ്ങളും ഉണ്ടായിട്ടുണ്ടാവും, സാധാരണക്കാരന് ആണെങ്കിലും ഇപ്പോ ഇന്ഡസ്ട്രിയില് നില്ക്കുന്നവരാണെങ്കിലും ഒക്കെ.
ഞാന് നേരിട്ട ഒരനുഭവം ഉണ്ട്. ഒരു സാഹചര്യത്തില് എന്നോടു വളരെ മോശമായി പെരുമാറുന്നത് കണ്ടപ്പോള് ഞാന് അവിടെനിന്ന് ഇറങ്ങിപ്പോയി. സിനിമയില് വലിയ ഒരു പൊസിഷനില് നില്ക്കുന്ന ഒരാള് അപ്പോ എന്നോട് ചോദിച്ച ഒരു ചോദ്യമുണ്ട് 'നീ ആരാ മമ്മൂട്ടിയോ എന്റെ മുമ്പിൽ നിന്ന് ഇങ്ങനെ ഇറങ്ങി പോകാന്, വാക്ക്ഔട്ട് നടത്താന്' എന്ന്. ഒരു കാര്യം എല്ലാവരും മനസ്സിലാക്കേണ്ട കാര്യമുണ്ട്, മമ്മൂട്ടി ആണേലും മോഹന്ലാല് ആണേലും, ഞാന് അവരെ ഒരുപാട് ബഹുമാനിക്കുന്നുണ്ട്. പക്ഷേ ഒരാള്ക്ക് ബഹുമാനം കിട്ടണമെങ്കില് അത്രയും വലിയ സൂപ്പര്സ്റ്റാര് ആകണമെന്നില്ല. നമ്മളോട് മോശമായി പെരുമാറുന്ന ഇടത്തുനിന്ന് ഇറങ്ങിപോകാനും തിരിച്ചുപറയാനുമുള്ള സ്വാതന്ത്ര്യം നിങ്ങള്ക്കുണ്ട്.
വ്യക്തിപരമായി നമ്മള് ആരാണ് എന്നുള്ളിടത്ത് നമ്മള് നില്ക്കണം. അതായത് ഒരു വ്യക്തി എന്നുള്ള നിലയില് ഞാന് ആരാണെന്നുള്ളതും എന്നെ എങ്ങനെ ട്രീറ്റ് ചെയ്യണം എന്നുള്ളതിലും എനിക്കൊരു അതിരുണ്ട്. അത് തെറ്റിക്കുമ്പോൾ ആരായാലും പ്രതികരിക്കും. ഇപ്പോള് വിന്സി പറഞ്ഞ കാര്യത്തില് എനിക്ക് അദ്ഭുതം ഒന്നുമില്ല. മദ്യപിച്ചിട്ടോ ലഹരി പദാര്ത്ഥങ്ങള് ഉപയോഗിച്ചിട്ടോ മോശമായി പെരുമാറുമ്പോൾ മറ്റുള്ളവരുടെ അവസ്ഥ ഓര്ത്ത് നമുക്ക് ഒന്നും പറയാതെ അവിടെ നില്ക്കേണ്ടി വന്നിട്ടുണ്ട്, അത്തരം അനുഭവം എനിക്കും ഉണ്ടായിട്ടുണ്ട്. അത് കാരണം ഷൂട്ട് മുടങ്ങുന്നതും ഞാന് കണ്ടിട്ടുണ്ട്. അതുകൊണ്ട് തന്നെ വിന്സി പറഞ്ഞ കാര്യത്തെ ഞാന് പിന്തുണയ്ക്കുന്നു.
ആരുടേയും വ്യക്തിപരമായ ജീവിതത്തില് നമ്മള് ഇടപെടില്ല. പക്ഷേ ജോലി ചെയ്യുന്നിടത്ത് ഈ മാതിരി ലഹരി വസ്തുക്കള് ഉപയോഗിച്ച് വന്നിട്ട് അത് വന്നവരെയും നിന്നവരെയും ചുറ്റും വര്ക്ക് ചെയ്യുന്നവരെയും എല്ലാം ബുദ്ധിമുട്ടിലാക്കുന്ന കാര്യമായി മാറുന്നത് തെറ്റ് തന്നെയാണ്. എന്തുകൊണ്ട് ഇത് വീണ്ടും സഹിക്കുന്നു, ഇത്രയധികം ആളുകള് ഇവിടെ ഇല്ലാഞ്ഞിട്ടാണോ എത്രയോ പേര് അഭിനയിക്കാന് താല്പര്യമുള്ള ആളുകള് അത്രയും കഴിവുള്ള ആളുകള് ഉണ്ടായിട്ടും എന്തുകൊണ്ട് ഈ പറയുന്ന കാര്യങ്ങള് ഉപയോഗിക്കുന്നവരെ സപ്പോര്ട്ട് ചെയ്യുന്നത് എന്നുള്ളത് നിങ്ങള് ഓരോരുത്തരുമാണ് ചിന്തിക്കേണ്ടത്.
ഞാന് വിന്സിക്കു പിന്തുണ കൊടുക്കും, വിന്സിയെ ഓര്ത്ത് എനിക്ക് അഭിമാനം ഉണ്ട്. എനിക്ക് ഒരുപാട് ഇഷ്ടമുള്ള ആർട്ടിസ്റ്റാണ് വിന്സി, വിന്സി ഇത്തരത്തില് തുറന്നു പറഞ്ഞത് ഓര്ത്ത് എനിക്ക് അഭിമാനമുണ്ട്. വിന്സി എപ്പോഴും തുറന്നു പറയുന്ന ആളാണ്, എനിക്ക് ഒരുപാട് അവസരങ്ങള് കിട്ടാറില്ല, സെലക്ട് ചെയ്ത് എടുക്കണം എങ്കില് ഒരുപാട് അവസരങ്ങള് വരണം എന്നൊക്കെ. അതാണ് യാഥാര്ഥ്യം. സിനിമാ മേഖലയില് നമ്മള് ഓരോരുത്തരും ഒരു പാസിങ് ക്ലോസ്ഡ് ആണ്. ഇത് എത്രയും പെട്ടെന്ന് മനസ്സിലാക്കുന്നോ അത്രയും നല്ലത്. ഈ സംഭവം മുന്നില് നിര്ത്തിക്കൊണ്ട് തന്നെ എനിക്ക് ഒരു കാര്യം പറയാനുള്ളത് എനിക്കറിയാവുന്നവരും എനിക്ക് മെസ്സേജ് അയക്കുന്നവരും സുഹുത്തുക്കളും ഒക്കെ അതുമാത്രമേ ചെയ്യൂ എന്ന് പറഞ്ഞ് ഒന്നും ചെയ്യാതിരിക്കരുത്.
നിങ്ങളുടെ ജീവിതം വെറുതെ നശിപ്പിച്ചു കളയരുത്. വരാനുള്ളത് വരും. അഭിനയം ഒരു പാഷന് ആയി നോക്കിക്കൊള്ളൂ. പക്ഷേ പ്രഫഷനല് ആയി എന്തെങ്കിലും ഒരു സ്ഥിരവരുമാനം കണ്ടെത്തണം. സിനിമയുടെ അകത്തുനിന്ന് കണ്ടു മനസിലാക്കിയതുകൊണ്ടു പറയുകയാണ് ഇതൊരു പാസിങ് ക്ലൗഡ് മാത്രമാണ്. ഇന്ന് വര്ക്ക് ഉണ്ടാകും ഇന്ന് വാനോളം പുകഴ്ത്തും എന്ന് കരുതി നാളെ അത് ഉണ്ടാകണം എന്നില്ല. നാളെ പണവും പ്രശസ്തിയും ഇല്ലാതാകുമ്പോൾ നമുക്ക് ജീവിക്കാനുള്ളത് നമ്മള് കണ്ടെത്തിയേ മതിയാകൂ. എനിക്ക് അഭിനയം മാത്രമേ അറിയൂ എന്ന് പറഞ്ഞിരിക്കരുത്, നമ്മള് പഠിച്ച എന്തെങ്കിലും പ്രാവര്ത്തികമാക്കി ഒരു സ്ഥിരവരുമാനം കണ്ടെത്തണം. അല്ലെങ്കില് ജീവിതം മുഴുവന് ഒരു പ്രഷര് കുക്കറില് ആയിരിക്കും. ഒരു പ്രൊഫഷനും ചെറുതല്ല. എല്ലാത്തിനും അതിന്റേതായ റെസ്പെക്ടുണ്ട്. ഞാന് ഒരു ആര്ട്ടിസ്റ്റ് ആണ്, ഞാന് ദുബായിലേക്ക് ജോലിക്ക് വന്നപ്പോള് എല്ലാവരും ചോദിക്കുന്നുണ്ട് ആക്ടിങ് നിര്ത്തിയോ എന്ന്. ഒരിക്കലുമില്ല അഭിനയം എന്നും എന്റെ പാഷന് ആയിരിക്കും.
നല്ല ആളുകള് എല്ലായിടത്തും ഉണ്ട്. ഞാന് അനൂപ് മേനോന്റെ ഒക്കെ സെറ്റില് വര്ക്ക് ചെയ്തപ്പോള് ആ സെറ്റ് എനിക്ക് ഒരുപാട് ഇഷ്ടമായിരുന്നു. നമുക്ക് കൂടുതല് മനസിലാക്കാനും പഠിക്കാനും പറ്റുന്ന ഒരു സെറ്റ് ആയിരുന്നു. അങ്ങനെ നല്ല ആളുകളും എല്ലായിടത്തും ഉണ്ട്. ഞാന് ഇവിടെ വന്നത് എനിക്ക് ആര്ജെ ആയി നല്ല ഒരു സാലറി പാക്കേജ് ആയി നല്ല ഒരു അവസരം കിട്ടിയതുകൊണ്ടാണ്. ഒരു സ്ഥിരവരുമാനം ഉണ്ടാകുമല്ലോ. ഇതിനിടയില് എനിക്ക് നല്ല സിനിമകളും ഷോയും ഒക്കെ വരുകയാണെങ്കില് ഞാന് നാട്ടിലേക്ക് വന്ന് അത് ചെയ്തിട്ട് തിരിച്ചുവരും. ഞാന് ഇപ്പോഴും ഓഡിഷന് വേണ്ടി അപേക്ഷ അയക്കാറുണ്ട്. നന്നായി കഠിനാധ്വാനം ചെയ്താലേ എപ്പോഴും വീണാല് നാല് കാലില് വീഴാന് പറ്റൂ. ഇതാരും മറന്നുപോകരുത്... " ശ്രുതി പറഞ്ഞു.
മയക്കുമരുന്ന് ഉപയോഗിക്കുന്നുവെന്ന് താന് മനസിലാക്കിയവര്ക്കൊപ്പം ഇനി അഭിനയിക്കില്ലെന്നാണ് വിന്സി അലോഷ്യസ് കുറച്ചുദിവസങ്ങള്ക്കുമുന്പ് പറഞ്ഞത്. തുടര്ന്ന് ഏത് സാഹചര്യത്തിലാണ് താനങ്ങനെ പറഞ്ഞതെന്നും വിന്സി വിശദീകരിച്ചിരുന്നു.
അന്ന് നടന്റെ പേര് വിൻസി വെളിപ്പെടുത്തിയിരുന്നില്ല. പിന്നാലെ ഇപ്പോള് ഷൈൻ ടോം ചാക്കോയ്ക്കെതിരെ വിന്സി ഫിലിം ചേംബറിന് നല്കി. 'സൂത്രവാക്യം' എന്ന സിനിമയുടെ ലൊക്കേഷനില് വെച്ച് ഷെെൻ ടോം ചാക്കോയില് നിന്നും മോശം അനുഭവം നേരിടേണ്ടി വന്നുവെന്ന് ചൂണ്ടികാട്ടിയാണ് വിൻസി ഫിലിം ചേംബറിന് പരാതി നല്കിയത്. സിനിമയുടെ ആഭ്യന്തര പരാതി കമ്മിറ്റിക്കും പരാതി നല്കിയിട്ടുണ്ട്.
