ബോളിവുഡിന് ഏറെ പ്രിയപ്പെട്ട നിര്മ്മാതാവും സംവിധായകനുമാണ് രാകേഷ് റോഷന്. തന്റെ മകന് ഹൃത്വിക് റോഷന്റെ അരങ്ങേറ്റ ചിത്രമുള്പ്പടെ ഒരുപാട് മികച്ച സിനിമകള് രാകേഷ് റോഷന്റെ സംവിധാനത്തില് പ്രേക്ഷകര്ക്ക് മുന്നിലെത്തിയിട്ടുണ്ട്. സോഷ്യല് മീഡിയയില് സജീവമായ താരം 2018 ല് തനിക്ക് തൊണ്ടയില് കാൻസർ സ്ഥിരീകരിച്ചത് തുറന്നു പറഞ്ഞിരുന്നു. കാൻസറിനെതിരായ പോരാട്ടത്തിന് പിന്നാലെ ആരോഗ്യകാര്യങ്ങളിലും ഫിറ്റ്നസിലും താരം കൂടുതല് ശ്രദ്ധിക്കാൻ തുടങ്ങിയിരുന്നു.
ഇപ്പോഴിതാ 75 വയസ്സുള്ള താരത്തിന്റെ പുതിയ ഫിറ്റ്നെസ്സ് വര്ക്കൗട്ട് വീഡിയോയാണ് സോഷ്യല് മീഡിയയിലൂടെ ശ്രദ്ധിക്കപ്പെടുന്നത്. തന്റെ കഠിനമായ വ്യായാമ സെഷന്റെ വീഡിയോയാണ് താരം പങ്കുവച്ചത്. പഞ്ചുകൾ, വെയ്റ്റഡ് സ്ക്വാറ്റുകൾ, ഏതൊരു പ്രൊഫഷണൽ അത്ലറ്റിനെയും കവച്ചുവെക്കാൻ കഴിയുന്ന ഉയർന്ന തീവ്രതയുള്ള പരിശീലനം എന്നിവ നിറഞ്ഞ ഒരു റീല് വീഡിയോയാണത്. ‘‘ആരോഗ്യവാനായിരിക്കുകയല്ല, ഓരോ ദിവസവും ഏറ്റവും മികച്ചതായി തോന്നുകയാണ് വേണ്ടത്...’’ എന്ന ക്യാപ്ഷന് നല്കിയാണ് രാകേഷ് റോഷന് വീഡിയോ പങ്കിട്ടത്.
വീഡിയോയിൽ, രാകേഷ് വിവിധ വ്യായാമങ്ങളിലൂടെ ശക്തി നേടുന്നത് കാണാം. ബോക്സിംഗ് ഡ്രില്ലുകൾ, ലെഗ് പ്രസ്സുകൾ, ബാറ്റിൽ റോപ്പുകൾ, ഭാരോദ്വഹനം. അത് തോളിൽ കയറ്റിയ സ്ക്വാറ്റുകളായാലും കോർ കേന്ദ്രീകരിച്ചുള്ള സ്ഥിരത ദിനചര്യകളും ഓരോ ചലനവും കൃത്യതയോടെയും ദൃഢനിശ്ചയത്തോടെയും ചെയ്തു.
തന്റെ 75-ാം വയസിലും നൂറ് ശതമാനം ഫിറ്റാണെന്ന് തെളിയിച്ചുകൊണ്ടാണ് രാകേഷ് റോഷൻ ഹെവി വർക്ക് ഔട്ട് ചെയ്യുന്ന വീഡിയോ പങ്കുവെച്ചത്. സെലിബ്രിറ്റികള് ഉള്പ്പെടെ ഒട്ടേറെ പേർ വീഡിയോയ്ക്ക് താഴെ കമന്റുകളുമായെത്തി. മകനും ബോളിവുഡ് താരവുമായ ഹൃത്വിക് റോഷനും പിതാവിന്റെ വർക്ക് ഔട്ട് വീഡിയോയോട് പ്രതികരിച്ചു. ‘വളരെ നന്നായിട്ടുണ്ട് പപ്പാ...’ എന്നായിരുന്നു ഹൃത്വിക്കിന്റെ കമന്റ്. ഒപ്പം തീ ഇമോജിയും ഉണ്ടായിരുന്നു. നടന്മാരായ സുനില് ഷെട്ടി, രവി ബെഹല്, ആക്ഷൻ കൊറിയോഗ്രാഫർ ഷാം കൗഷ എന്നിവരും വീഡിയോയ്ക്ക് താഴെ കമന്റ് ചെയ്തിട്ടുണ്ട്.
