പാലക്കാട്: രോഗ ലക്ഷണങ്ങളോടെ ആശുപത്രിയില് പ്രവേശിപ്പിച്ച പാലക്കാട് സ്വദേശിനിക്ക് നിപ സ്ഥിരീകരിച്ചതിനെ തുടര്ന്ന് മേഖലയില് നിയന്ത്രണമേര്പ്പെടുത്തി. രോഗിയുമായി സമ്പര്ക്കമുണ്ടായവരോട് നിരീക്ഷണത്തില് പോകാന് നിര്ദേശിച്ചു.
നാട്ടുക്കല് കിഴക്കുംപറം മേഖലയിലെ 3 കിലോമീറ്റര് പരിധി കണ്ടെയ്ന്മെന്റ് സോണ് ആയി പ്രഖ്യാപിച്ചു. പെരിന്തല്മണ്ണ സ്വകാര്യ ആശുപത്രിയിലാണ് രോഗി ചികിത്സയില് കഴിയുന്നത്. ഈ സംഭവത്തെ തുടര്ന്ന് തച്ഛനാട്ടുകര ഗ്രാമപഞ്ചായത്തിലെ 7,8,9,11 വാര്ഡുകളും കരിമ്പുഴ പഞ്ചായത്തിലെ 17, 18 വാര്ഡുകളും കണ്ടൈന്മെന്റ് സോണായി പ്രഖ്യാപിച്ചു.
കോഴിക്കോട് ബയോളജി ലാബില് നടത്തിയ പ്രാഥമിക പരിശോധനയില് നിപ പോസിറ്റീവായി കണ്ടെത്തിയതിന് പിന്നാലെ പൂനെ വൈറോളജി ലാബിലേക്ക് അയച്ച ഫലവും പോസിറ്റീവായി. പെരിന്തല്മണ്ണയിലെ സ്വകാര്യ ആശുപത്രിയില് ചികിത്സയിലുളള യുവതിയുടെ ആരോഗ്യനില ഗുരുതരമായി തുടരുകയാണ്. രോഗിയുമായി സമ്പര്ക്കമുണ്ടായവരെ നിരീക്ഷിച്ചുവരികയാണ്. രോഗത്തിന്റെ ഉറവിടം വ്യക്തമല്ല.
