കൊച്ചി: മുസ്ലിം സമുദായത്തിനെതിരായ അധിക്ഷേപ പരാമര്ശത്തില് വെള്ളാപ്പള്ളിയുടെ പ്രസ്താവന വര്ഗ്ഗീയവേര്തിരിവ് സൃഷ്ടിക്കല് ലക്ഷ്യമിട്ടെന്നും കടുത്ത ഗുരുനിന്ദയാണെന്നും ശ്രീനാരായണ സേവാസംഘം. സാമൂഹീക നീതിയുടെ കാവല്ഭടന്മാരായി നിലകൊണ്ടിട്ടുള്ള പാരമ്പര്യമാണ് മുസ്ലിം സമുദായത്തിനും ലീഗിനുമുള്ളതെന്നും സേവാസംഘം ഭാരവാഹികള് അഭിപ്രായപ്പെട്ടു.
മകന് കേന്ദ്രത്തില് അധികാരം നേടുന്നതിന് ബിജെപിയെ പ്രീണിപ്പിക്കുവാന് നടത്തുന്ന കുടിലതന്ത്രങ്ങളുടെ ഭാഗമാണ് ഇതെന്നും ആരോപിച്ചു. സമുദായത്തിന്റെ അന്തകനാണ് വെള്ളാപ്പള്ളിയെന്നും വെള്ളാപ്പള്ളിയുടെ കഴിഞ്ഞ 29 വര്ഷത്തെ കിരാത വാഴ്ചയിലൂടെ എസ്എന്ഡിപി യോഗത്തിനും എസ്എന് ട്രസ്റ്റിനുമുണ്ടായിട്ടുള്ള അപചയവും അധഃപതനവും വിവരണാതീതമാണെന്നും പറഞ്ഞു.
അദ്ദേഹം നടത്തുന്ന പ്രസ്താവന കടുത്ത ഗുരുനിന്ദയും വര്ഗീയ വേര്തിരിവ് സൃഷ്ടിക്കുന്നതാണെന്നും ബിജെപിയെ പ്രീണിപ്പിക്കാന് നടത്തുന്ന പ്രസ്താവനകളുടെ ദുരന്തഫലങ്ങള് അനുഭവിക്കേണ്ടിവരുന്നത് ഈഴവ സമുദായമാണെന്നും പറഞ്ഞു. എസ്എന് ട്രസ്റ്റിന്റെ മൂന്ന് ആശുപത്രികള് വിറ്റുതുലച്ചു. മൈക്രോ ഫിനാന്സ് വായ്പാ തട്ടിപ്പുകള് ഉള്പ്പെടെ നിരവധി ക്രിമിനല് കേസുകളില് പ്രതിയാണെന്നും വെള്ളാപ്പള്ളി നടേശന്റെ വലയില് കുടുങ്ങിയ രാഷ്ട്രീയ നേതാക്കള് വാഴ്ത്തുപാട്ടുകാരായി മാറിയിരിക്കുകയാണെന്നും പറഞ്ഞു.
കേരളത്തില് ജനാധിപത്യമല്ല, നടക്കുന്നത് മതാധിപത്യമാണെന്നും കേരളം വൈകാതെ മുസ്ലിം ഭൂരിപക്ഷ നാടായി മാറുമെന്നും മുസ്ലിം ഭൂരിപക്ഷമായി സ്ഥലമായി ഇവിടം മാറുമെന്ന മുന് മുഖ്യമന്ത്രി വി എസ് അച്യുതാനന്ദന് നേരത്തെ പറഞ്ഞ കാര്യം 40 വര്ഷം പോലും വേണ്ടി വരില്ലെന്നും നടത്തിയ പരാമര്ശം വിവാദമായിരുന്നു. ഇതോടെയാണ് വെള്ളാപ്പള്ളിയെ തള്ളി ശ്രീനാരായണ സേവാസംഘം രംഗത്ത് വന്നത്.
