കണ്ണൂര്: കൊടുംകുറ്റവാളി ഗോവിന്ദച്ചാമി ജയില് ചാടിയതില് അന്വേഷണ റിപ്പോര്ട്ട് ഇന്ന് ജയില് മേധാവിയ്ക്ക് സമര്പ്പിക്കും. ജയില് ഡിഐജി വി. ജയകുമാറിന്റെ അന്വേഷണ റിപ്പോര്ട്ട് ജയില് മേധാവി ബല്റാം കുമാര് ഉപാധ്യായക്കാണ് സമര്പ്പിക്കുക. റിപ്പോര്ട്ടിലെ വിവരങ്ങളുടെ അടിസ്ഥാനത്തില് കൂടുതല് ഉദ്യോ?ഗസ്ഥര്ക്കെതിരെ നടപടിയുണ്ടാകാന് സാധ്യതയുണ്ട്.
സംഭവത്തില് സംശയങ്ങളും ദുരൂഹതകളും ഇപ്പോഴും ബാക്കിയാണ്. ജയില് ജീവനക്കാരുടെ മൊഴി പൊലീസ് ഇന്ന് രേഖപ്പെടുത്തും. ജയിലില് നിന്നും പുറത്ത് കടക്കാന് ഗോവിന്ദച്ചാമിക്ക് ഏന്തെങ്കിലും സഹായം ലഭിച്ചോ എന്നതായിരിക്കും പ്രധാനമായും അന്വേഷിക്കുക. സഹതടവുകാരില് നിന്നും സഹായം ലഭിച്ചിട്ടുണ്ടോ എന്നതും അന്വേഷണ സംഘം പരിശോധിക്കും.
സെല് മുറിച്ച് പുറത്തെത്തിയ ശേഷം 3 മിനുട്ട് നേരം ജയിലിന്റെ വരാന്തയില് നിന്നത് സിസിടിവിയില് ദൃശ്യമായിട്ടും അറിഞ്ഞില്ലെന്ന ജയിലര്മാരുടെ വാദവും അന്വേഷണ പരിധിയില് ഉള്പ്പെടും. പൊലീസ് കോടതിയില് നല്കിയ തടവ് ചാടല് വകുപ്പ് മാത്രം ഉള്പ്പെടുത്തിയ എഫ്ഐആറില് പൊതു മുതല് നശിപ്പിച്ച വകുപ്പ് കൂടെ ചേര്ക്കാന് പൊലീസ് കോടതിയില് അപേക്ഷ നല്കിയിട്ടുണ്ട്.
