വിജയവാഡ: വൈ.എസ്.ആര് കോണ്ഗ്രസ് എം.എല്.എയും നടിയുമായ ആര്.കെ റോജയെ പോലീസ് കസ്റ്റഡിയില് എടുത്തു. ദേശീയ വനിതാ പാര്ലമെന്റില് പങ്കെടുക്കുന്നതിന് എത്തിയ റോജയെ വിജയവാഡ എയര്പോര്ട്ടില് വച്ചാണ് പോലീസ് കസ്റ്റഡിയില് എടുത്തത്. അസിസ്റ്റന്റ് കമ്മീഷണറുടെ നേതൃത്വത്തിലുള്ള പോലീസ് സംഘമാണ് റോജയെ കസ്റ്റഡിയില് എടുത്തത്.
വനിതാ പാര്ലമെന്റ് നടക്കുന്ന ഹോട്ടലിലേക്ക് കൊണ്ടു പോകാനെന്ന പേരില് പോലീസ് കൂട്ടിക്കൊണ്ട് പോകുകയും അന്യായമായി തടഞ്ഞു വയ്ക്കുകയുമായിരുന്നെന്ന് റോജ ആരോപിച്ചു. ഒരു നിയമസഭാംഗം ക്ഷണിച്ചത് പ്രകാരമാണ് താന് വനിതാ പാര്ലമെന്റില് പങ്കെടുക്കാന് എത്തിയതെന്ന് റോജ പറഞ്ഞു. ഇപ്രകാരം ചെയ്യാനാണെങ്കില് തന്നെ എന്തിനാണ് പരിപാടിയിലേക്ക് ക്ഷനിച്ചതെന്ന് റോജ ചോദിച്ചു.
ടി.ഡി.പിക്ക് തന്നെ ഭയമാണെന്നും റോജ ആരോപിച്ചു. 11 കോടി രുപ ചെലവഴിച്ച് നടക്കുന്ന വനിതാ പാര്ലമെന്റിലേക്ക് രാജ്യത്തിന്റെ എല്ലാ ഭാഗത്ത് നിന്നുമുള്ള എം.എല്.എമാരെ ക്ഷണിച്ചിരുന്നു. എന്നാല് തന്നെ മാത്രം പരിപാടിയില് പങ്കെടുക്കാന് അനുവദിച്ചില്ല. അവര്ക്ക് തന്നെ ഭയമാണെങ്കില് എന്തിന് ക്ഷണിച്ചുവെന്നും റോജ ചോദിച്ചു.
