ന്യൂഡല്ഹി: വ്യാപാര ചര്ച്ചകള്ക്കായുള്ള അമേരിക്കന് സംഘത്തിന്റെ ഇന്ത്യാ സന്ദര്ശനം റദ്ദാക്കി. ഓഗസ്റ്റ് 25 മുതല് 29 വരെ ഇന്ത്യയില് നടത്താന് നിശ്ചയിച്ചിരുന്ന യുഎസ് സംഘത്തിന്റെ വ്യാപാര ചര്ച്ചകള് മാറ്റിവെച്ചതായി ദേശീയ മാധ്യമങ്ങള് റിപ്പോര്ട്ട് ചെയ്തു. തീരുവ വര്ധനയ്ക്കു പിന്നാലെ നിലനില്ക്കുന്ന സാമ്പത്തിക സംഘര്ഷത്തിന്റെ സാഹചര്യത്തിലാണ് നടപടിയെന്നാണ് റിപ്പോര്ട്ടുകള്.
എന്നാല് ചര്ച്ചകള് മറ്റൊരവസരത്തില് നടന്നേക്കുമെന്നും റിപ്പോര്ട്ടുകളുണ്ട്. ഉഭയകക്ഷി വ്യാപാര കരാര് സംബന്ധിച്ച് യുഎസും ഇന്ത്യയും തമ്മിലുള്ള ആറാം റൗണ്ട് ചര്ച്ചകള്ക്കു വേണ്ടിയായിരുന്നു യുഎസ് സംഘത്തിന്റെ സന്ദര്ശനം. കൂടാതെ 25% അധിക തീരുവ ഓഗസ്റ്റ് 27ന് പ്രാബല്യത്തില് വരുമെന്നിരിക്കെ ചര്ച്ച നടക്കുന്ന തീയതികളും പ്രധാനപ്പെട്ടതായിരുന്നു. ഇതാണ് ഇപ്പോള് മാറ്റിവച്ചിരിക്കുന്നത്.
