നെടുങ്കണ്ടം: കഴിഞ്ഞ ദിവസം ഇടുക്കി കൂട്ടാറ്റിലുണ്ടായ വെള്ളപ്പൊക്കത്തില്‍ ട്രാവലര്‍ ഒഴുകിപ്പോയപ്പോള്‍ ഉപജീവനം ഇല്ലാതായത്‌ ഈ ട്രാവലറിനെമാത്രം ആശ്രയിച്ചിരുന്ന മൂന്ന്‌ കുടുംബങ്ങള്‍ക്കാണ്‌. എന്നാല്‍ ഇപ്പോള്‍ ഇവര്‍ക്ക്‌ അതിജീവനത്തിന്റെ പാതയൊരുക്കുകയാണ്‌ മൂന്ന്‌ സുഹൃത്തുക്കള്‍.
കഴിഞ്ഞ 18 ന്‌ നെടുങ്കണ്ടം മേഖലയിലുണ്ടായ പ്രളയ സമാനമായ മലവെള്ളപ്പാച്ചിലില്‍ വിനായക്‌ എന്ന 17 സീറ്റര്‍ ട്രാവലറാണ്‌ ഒഴുക്കില്‍പ്പെട്ടത്‌. ഫിനാന്‍സ്‌ വ്യവസ്‌ഥയില്‍ വാങ്ങിയ ഈ വാഹനത്തിന്‌ ഇനിയും അഞ്ചുലക്ഷം രൂപയോളം തിരിച്ചടയ്‌ക്കാനുണ്ട്‌. വാഹനത്തിന്റെ ഉടമയായ ഏളംതറയില്‍ റെജിക്കൊപ്പം ഡ്രെവര്‍മാരായ സന്തോഷിനും അപ്പുവിനും കൂടിയാണ്‌ ഉപജീവനം ഇല്ലാതായത്‌.
മാധ്യമ വാര്‍ത്തകളിലൂടെ സംഭവമറിഞ്ഞ സുഹൃത്തുക്കളാണ്‌ ഇവരെ സഹായിക്കുവാനായി എത്തിയത്‌. ബെംഗളുരുവില്‍ ഐ.ടി കമ്പനി ജീവനക്കാരായ കണ്ണൂര്‍ സ്വദേശികളായ സുബിന്‍, അഞ്‌ജലി എന്നീ സുഹൃത്തുക്കളും പേര്‌ വെളിപ്പെടുത്താന്‍ ആഗ്രഹിക്കാത്ത മറ്റൊരു സുഹൃത്തും ചേര്‍ന്ന്‌ ഇന്നലെ ഇവര്‍ക്ക്‌ പുതിയ ട്രാവലര്‍ സമ്മാനിച്ചു.വാഹനം വെള്ളത്തിലൂടെ ഒഴുകി പോകുന്നത്‌ മാധ്യമങ്ങളിലൂടെ അറിഞ്ഞതോടെ നിലവില്‍ ഉണ്ടായിരുന്ന മുഴുവന്‍ ബുക്കിങ്ങുകളും ഇല്ലാതായി. വാഹനം പുഴയില്‍ നിന്നും കരയ്‌ക്കെത്തിച്ചപ്പോള്‍ ജീവിതം അവസാനിച്ചതായി തോന്നിയെന്ന്‌ ൈഡ്രവര്‍ ആയ സന്തോഷ്‌ പറയുന്നു.
എങ്കിലും പുതിയ പ്രതീക്ഷയുടെ സന്തോഷത്തിലാണിവര്‍. ഇവരെ കൈപിടിച്ചു ഉയര്‍ത്തുവാന്‍ ഒപ്പമുണ്ടാകണമെന്ന അഭ്യര്‍ഥന മാത്രമാണ്‌ വാഹനം നല്‍കിയവര്‍ക്ക്‌ നാട്ടുകാരോടുള്ളത്‌.
ജോമോന്‍ താന്നിക്കല്‍
Comments