കൊച്ചി: ആവേശത്തിലൂന്നിയ തെരഞ്ഞെടുപ്പ് പ്രചാരണങ്ങള്ക്കൊടുവില് തദ്ദേശ സ്ഥാപനങ്ങളിലേക്കുള്ള വോട്ടെടുപ്പ് ഏഴ് ജില്ലകളില് തുടങ്ങി. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം എന്നീ ജില്ലകളിലെ വോട്ടര്മാരാണ് പോളിങ് ബൂത്തിലേക്ക് നീങ്ങുന്നത്. വടക്കന് ജില്ലകളില് വ്യാഴാഴ്ചയാണ് വോട്ടെടുപ്പ്. ഇന്ന് വൈകിട്ടോടെ പരസ്യപ്രചരണം അവസാനിക്കും.
ആകെ 36,630 സ്ഥാനാര്ത്ഥികളാണ് ഒന്നാം ഘട്ടത്തില് ജനവിധി തേടുന്നത്. 1.32 കോടിയിലധികം വോട്ടര്മാര്ക്കായി 15, 432 പോളിങ് സ്റ്റേഷനുകളാണ് ഒരുക്കിയിരിക്കുന്നത്. ദക്ഷിണ കേരളത്തിലെ 471 ഗ്രാമപഞ്ചായത്തുകള് 75 ബ്ളോക്ക് പഞ്ചായത്തുകള് ,39 മുന്സിപ്പാലിറ്റികള് 7 ജില്ലാ പഞ്ചായത്തുകള്, 3 കോര്പ്പറേഷനുകള് എന്നിവിടങ്ങളിലെ 11168 വാര്ഡുകളിലെ വോട്ടര്മാരാണ് ഇന്ന് പോളിങ്ങ് ബൂത്തിലെത്തുന്നത്.
രാവിലെ 7 മുതല് വൈകിട്ട് 6 വരെയാണ് വോട്ടെടുപ്പ്. 6 മണിക്ക് മോക് പോളിങ്ങ് തുടങ്ങും. ഒന്നാംഘട്ടത്തില് 7 ജില്ലകളിലായി 6251219 പുരുഷന്മാരും 7032444 സ്ത്രീകളും 126 ട്രാന്സ്ജെന്ഡറുകളും ഉള്പ്പെടെ 13283789 വോട്ടര്മാരാണ് സമ്മതിദാനാവാകാശം വിനിയോഗിക്കുന്നത്. രാവിലെ മുതല് പോളിംഗ് സ്റ്റേഷനുകളില് നീണ്ട ക്യൂ ഉണ്ട്. ജോലിക്ക് പോകുന്നവര് രാവിലെ തന്നെയെത്തി വോട്ട് ചെയ്ത് മടങ്ങുകയാണ്.
ആദ്യ ഘട്ടത്തില് വോട്ടെടുപ്പ് നടക്കുന്ന ജില്ലകളില് 480 പ്രശ്നബാധിത ബൂത്തുകള് ഉണ്ട്. തിരുവനന്തപുരം ജില്ലയിലാണ് ഏറ്റവും അധിക പ്രശ്നബാധിത ബൂത്തകളുളളത്. ജില്ലയിലെ 186 ബൂത്തുകളിലാണ് പ്രശ്നസാധ്യതയുളളത്. പ്രശ്നബാധിത ബൂത്തുകളില് അധികസുരക്ഷയും വെബ് കാസ്റ്റിങ്ങും ഏര്പ്പെടുത്തിയിട്ടുണ്ട്. ഒന്നാം ഘട്ട വോട്ടെടുപ്പിനായി 15432 പോളിങ്ങ് ബൂത്തുകള് സജ്ജമാക്കിയിട്ടുണ്ട്.
