ഓണ് സ്ക്രീന് പ്രകടനങ്ങളിലൂടെ മാത്രമല്ല ജീവിതത്തിലെ നിലപാടുകളിലൂടേയും താപ്സി പന്നു വാര്ത്തകളില് ഇടം നേടാറുണ്ട്. സിനിമാ മേഖലയില് നിന്നും തനിക്ക് നേരിടേണ്ടി വന്ന പല ദുരനുഭവങ്ങളും താപ്സി പന്നു തുറന്നു പറഞ്ഞിട്ടുണ്ട്. തന്റെ ചുരുണ്ട മുടി കാരണം നഷ്ടപ്പെട്ട അവസരങ്ങളെക്കുറിച്ച് സംസാരിക്കുകയാണ് താപ്സി പന്നു. തന്നോട് മുടി സ്ട്രെയ്റ്റ് ചെയ്യാന് പലരും പറഞ്ഞിട്ടുണ്ടെന്നാണ് താപ്സി പന്നു പറയുന്നത്.
''ഏറെക്കാലം എല്ലാ സംവിധായകരും എന്റെ മുടി നേരെയാക്കാന് ആഗ്രഹിച്ചിരുന്നു. കാരണം നീളന് മുടിയാണ് സെക്സിയെന്നാണ് അവര് വിശ്വസിച്ചിരുന്നത്. റിബലായ കഥാപാത്രങ്ങള്ക്കും ചീത്ത പെണ്കുട്ടികള്ക്കുമാണ് ചുരുണ്ട മുടിയുണ്ടാവുക എന്നാണ് അവര് കരുതിയത്. സംവിധായകന് പറഞ്ഞതൊക്കെ ഞാനും സമ്മതിച്ചു. പതിയെ എന്റെ മുടിയെ പരിചരിക്കാന് ഞാന് പഠിച്ചു. മുടി തിരിച്ച് എന്നേയും സ്നേഹിച്ചു. പതിയെ പല സംവിധായകരും ഈ മുടി ഒരു അനുഗ്രഹമാണെന്ന് തിരിച്ചറിഞ്ഞു. ഇപ്പോള് എല്ലാ സംവിധായകരും പറയുന്നത് ചുരുണ്ട മുടി തന്നെ മതിയെന്നാണ്'' താപ്സി പറയുന്നു.
''വര്ഷങ്ങളോളം എന്നേയും എന്റെ മുടിയേയും അംഗീകരിക്കുന്ന ബ്രാന്റുകളെയാണ് ഞാന് നോക്കി നടന്നത്. പക്ഷെ എല്ലായിപ്പോഴും നിരാശപ്പെട്ടു. എന്നെ തേടി വന്ന ബ്രാന്റുകള്ക്കൊക്കെ എന്നെ മതിയായിരുന്നു, എന്റെ മുടിയെ വേണ്ടായിരുന്നു'' എന്നും താരം പറയുന്നുണ്ട്.
''അവര് എന്റെ മുടി നേരെയാക്കണമെന്ന് പറഞ്ഞു. കാരണം ഇന്ത്യയില് സുന്ദരമായ മുടിയെന്നാല് നീളന് മുടി എന്നായിരുന്നു അവര് കരുതിയിരുന്നത്. അത് പലപ്പോഴും എന്നെ വേദനിപ്പിച്ചു. വളരെ ചുരുക്കം ചിലര് മാത്രമേ ചുരുണ്ട മുടിയ്ക്കായി പ്രൊഡക്ടുകള് ഉണ്ടാക്കിയിരുന്നുള്ളൂ'' എന്നും താരം പറയുന്നു. താനും ഒരു ഘട്ടത്തില് ചുരുണ്ട മുടിയെ വെറുത്തിരുന്നുവെന്നാണ് താപ്സി പറയുന്നത്.
