കോഴിക്കോട്: ബസില്വെച്ച് ലൈംഗികാതിക്രമം നടത്തിയെന്ന ആരോപത്തെ തുടര്ന്ന് യുവാവ് ജീവനൊടുക്കിയ സംഭവത്തില് പ്രതിയായ ഷിംജിതയുടെ ജാമ്യാപേക്ഷ ഇന്ന് പരിഗണിക്കും. ബസില് വെച്ച് ലൈംഗികാതിക്രമം നടന്നെന്ന ആരോപണത്തില് ഉറച്ചു നില്ക്കുന്ന ഷിംജിത അതേ നിലപാട് കോടതിയിലും സ്വീകരിക്കും. കുന്നമംഗലം കോടതിയാണ് ജാമ്യാപേക്ഷ പരിഗണിക്കുക.
അതിനിടയില് ബസ് യാത്രയില് ഒരാള് ലൈംഗിക ഉദ്ദേശത്തോടെ സമീപിച്ചുവെന്നും പയ്യന്നൂര് സ്റ്റാന്റിലേക്കുള്ള ബസ് യാത്രയില് ഒരാള് ലൈംഗിക ഉദ്ദേശത്തോടെ ശരീരത്തില് സ്പര്ശിച്ചുവെന്നും ആരോപിച്ച് ഷിംജിതയുടെ സഹോദരന് പോലീസില് പരാതി നല്കിയിട്ടുണ്ട്. പരാതിയില് ആരുടെയും പേര് വ്യക്തമാക്കിയിട്ടില്ല. ഇ-മെയില് വഴി ഇന്നാണ് പൊലീസില് പരാതി നല്കിയത്.
സംഭവം നടന്ന ബസിലെ സിസിടിവിയില് നിന്നും അസ്വാഭാവികമായി ഒന്നും കണ്ടെത്തിയില്ലെന്നാണ് പൊലീസിന്റെ റിപ്പോര്ട്ട്. ഇത് പ്രോസിക്യൂഷനും ചൂണ്ടിക്കാട്ടും. കണ്ണൂരിലേക്കുള്ള യാത്രയില് ബസില്വെച്ച് കോഴിക്കോട് ഗോവിന്ദപുരം സ്വദേശി ദീപക് അപമര്യാദയായി പെരുമാറിയെന്ന തരത്തില് വീഡിയോ സഹിതം ഷിംജിത മുസ്തഫ സമൂഹമാധ്യമത്തില് ആരോപണം ഉന്നയിച്ചിരുന്നു. ദീപക്കിനെതിരെ വ്യാപക സൈബര് ആക്രമണം നടക്കുകയും ചെയ്തിരുന്നു.
ഇതിനിടെ ഞായറാഴ്ചയാണ് ദീപക്കിനെ വീട്ടില് മരിച്ചനിലയില് കണ്ടെത്തിയത്. ദീപക്കിന്റെ കുടുംബത്തിന്റെ പരാതിയില് ഷിംജിതക്കെതിരെ കേസ് എടുക്കുകയായിരുന്നു. കുന്നമംഗലം ഒന്നാം ക്ലാസ് മജിസ്ട്രേറ്റ് കോടതി 14 ദിവസത്തേക്ക് ഷിംജിതയെ റിമാന്ഡ് ചെയ്തിരിക്കുകയാണ്. ഷിംജിതയുടെ മൊബൈല് ഫോണും പൊലീസ് പിടിച്ചെടുത്തിരുന്നു.
ലൈംഗികാതിക്രമം നേരിട്ടുവെന്ന ഷിംജിതയുടെ ആരോപണത്തെ തള്ളുന്ന വിവരങ്ങളാണ് റിമാന്ഡ് റിപ്പോര്ട്ടിലുള്ളത്. ബസില്വെച്ച് ദീപക്കിനെ ഉള്പ്പെടുത്തിയുള്ള ഏഴോളം വീഡിയോകളാണ് ഷിംജിത മൊബൈലില് ചിത്രീകരിച്ചത്. ഇവ ഫേസ്ബുക്ക്, ഇന്സ്റ്റഗ്രാം തുടങ്ങിയ സോഷ്യല്മീഡിയ പ്ലാറ്റ്ഫോമുകളില് പങ്കുവെച്ചതായും കണ്ടെത്തിയെന്നാണ് റിമാന്റ് റിപ്പോര്ട്ടിലുള്ളത്.
