ഗാനഗന്ധർവൻ കെ.ജെ യേശുദാസിന്റെ മകനെന്ന നിലയിലാണ് പിന്നണി ഗാനരംഗത്തേക്ക് എത്തിയതെങ്കിലും ചുരുക്കം ഗാനങ്ങള് കൊണ്ട് തന്നെ തന്റേതായ ഇരിപ്പിടം നേടിയെടുത്ത ഗായകനാണ് വിജയ് യേശുദാസ്. അപ്പയ്ക്കൊപ്പമാണ് താന് ആദ്യം പാടിയതെന്ന് വിജയ് തന്നെ പല പ്രാവശ്യം പറഞ്ഞിട്ടുണ്ട്. ‘ഓ മുംബൈ...’ എന്ന ഗാനം ഇരുവരും ഒന്നിച്ചാണ് ആലപിച്ചത്. ‘ലൈഫ് ഈസ് ബ്യൂട്ടിഫുള്’ എന്ന ചിത്രത്തിലും വിജയ് പാടിയിരുന്നു. നിവേദ്യത്തിലെ കോലക്കുഴല് ആലപിച്ചതോടെ വിജയ് യേശുദാസിനെ മലയാളക്കര ഏറ്റെടുത്തു.
ഇപ്പോഴിതാ ഗായകൻ വിജയ് യേശുദാസിന് സർപ്രൈസ് പിറന്നാൾ ആഘോഷമൊരുക്കുന്ന സുഹൃത്തുക്കളുടെ വീഡിയോയാണ് സോഷ്യല് മീഡിയയില് നിറയുന്നത്. വിജയ്യുടെ സുഹൃത്തായ ആദർശ് സേതുവാണ് പിറന്നാളാഘോഷത്തിന്റെ വിഡിയോ സോഷ്യല് മീഡിയയില് പങ്കുവച്ചത്. കേക്കുമായി രഞ്ജിനി ജോസ് എത്തുമ്പോൾ ആശ്ചര്യത്തോടെ നോക്കുന്ന വിജയ് യേശുദാസിനെ വിഡിയോയിൽ കാണാം. പിറന്നാളാശംസകൾ നേരാൻ അച്ഛൻ യേശുദാസ് വിഡിയോ കോൾ ചെയ്യുന്നതും വിഡിയോയിലുണ്ട്. ഗായിക രഞ്ജിനി ജോസ്, മാധവ് സുരേഷ്, നരേൻ അടക്കമുള്ള താരങ്ങളും ആഘോഷത്തിൽ പങ്കെടുത്തിട്ടുണ്ട്. ആശംസകൾ നേർന്നും കേക്ക് പങ്കുവച്ചും വിജയ് പിറന്നാളാഘോഷിക്കുന്നതും വിഡിയോയിലുണ്ട്.
വീഡിയോ സോഷ്യല് മീഡിയയില് എത്തിയതിനു പിന്നാലെ ആരാധകരും സഹതാരങ്ങളും ഗായകന് പിറന്നാളാശംസകള് കുറിക്കുന്നുണ്ട്. ഗായിക സയനോര, വിവേക് ഗോപൻ, മീനാക്ഷി എന്നിവരടക്കം നിരവധി സെലിബ്രിറ്റികളും ആരാധകരും കമന്റ് ബോക്സില് ആശംസകള് നേരുന്നുണ്ട്.
വിജയ് യേശുദാസ് പാട്ടില് മാത്രമല്ല അഭിനയത്തിലും കഴിവ് തെളിയിച്ചിട്ടുണ്ട്. പോസിറ്റീവും നെഗറ്റീവുമായിട്ടുള്ള കഥാപാത്രങ്ങളെ അവതരിപ്പിക്കാന് കഴിയുമെന്ന് വിജയ് തെളിയിച്ചിരുന്നു. പാട്ട് പോലെ തന്നെ അഭിനയവും പാഷനാണ് വിജയ്യ്ക്ക്.
