യുവനടിമാരിൽ ശ്രദ്ധേയയാണ് നടി നിരഞ്ജന അനൂപ്. തന്റെ അച്ഛന്റെയും അമ്മയുടെയും വിവാഹ വാർഷിക ആഘോഷത്തിൽ നിന്നുള്ള മനോഹരമായൊരു വീഡിയോ പങ്കുവച്ചിരിക്കുകയാണ് നിരഞ്ജന ഇപ്പോൾ.
‘അച്ഛനും അമ്മയും ഒന്നിച്ചു കഴിഞ്ഞ 29 വർഷങ്ങൾ... കുട്ടിക്കാലത്ത് പലപ്പോഴും ഞാൻ കരുതിയിരുന്നു, ഒരുപക്ഷേ ഞങ്ങൾ മൂന്നുപേർക്കും ഒരു കുടുംബമായി മുന്നോട്ട് പോകാൻ കഴിയില്ലെന്ന്.ഈ രണ്ട് പ്രിയപ്പെട്ട മനുഷ്യരുടെ ഏറ്റവും വലിയ പ്രത്യേകത, ഒരു കുടുംബമായി മുന്നോട്ട് പോകുന്നതും വിവാഹജീവിതവും എത്രത്തോളം പ്രയാസകരമാണെന്ന കാര്യത്തിൽ അവർ എന്നോട് ഒരിക്കലും കള്ളം പറഞ്ഞിട്ടില്ല എന്നതുമാണ്. സന്തോഷം നിറഞ്ഞ ഒരു കൃത്രിമ ചിത്രം അവർ ഒരിക്കലും എന്റെ മുന്നിൽ കെട്ടിച്ചമച്ചില്ല.
വർഷങ്ങൾക്കിപ്പുറം, ആ സത്യസന്ധത ഞങ്ങളെ മറ്റാരെക്കാളും അധികം അടുപ്പിച്ചു. ഒരേ മേൽക്കൂരയ്ക്ക് കീഴിൽ യാതൊരു മറകളുമില്ലാതെ സ്വന്തം വ്യക്തിത്വം നിലനിർത്തിക്കൊണ്ട് തന്നെ സമാധാനവും സന്തോഷവും കണ്ടെത്താൻ ഇന്ന് ഞങ്ങൾ മൂന്നുപേർക്കും സാധിക്കുന്നുണ്ട്.
കുടുംബം എന്നത് എപ്പോഴും അത്ര എളുപ്പമുള്ള ഒന്നല്ല. എന്നാൽ പ്രതിസന്ധികളിൽ തളരാതെ, സത്യസന്ധതയോടെ തിരമാലകളെ മുറിച്ചു കടന്നാൽ, ആ ജീവിതം ഒരു ഫെയറി ടെയിലിനേക്കാൾ മനോഹരമായി മാറും.
എന്നും നിങ്ങളുടേത്, എന്നും എന്റേത്, എന്നും നമ്മുടേത്.ജീവിതകാലം മുഴുവൻ...ഞങ്ങൾ മൂന്നുപേർ മാത്രം,’ എന്നാണ് വീഡിയോ പങ്കുവച്ച് നിരഞ്ജന കുറിച്ചത്.
നൃത്തത്തിന്റെ ലോകത്തു നിന്നുമാണ് നിരഞ്ജനയും സിനിമയിലേക്ക് എത്തിയത്. നാല് വയസ്സ് മുതൽ കുച്ചിപ്പുടി അഭ്യസിക്കാൻ തുടങ്ങിയതാണ് നിരഞ്ജന. അമ്മ നാരായണിയുടെ നൃത്ത വിദ്യാലയത്തിന്റെ പ്രവർത്തനങ്ങളിലും സജീവമാണ് നിരഞ്ജന. കൊച്ചിയിൽ സ്ഥിതി ചെയ്യുന്ന നൃത്ത വിദ്യാലയത്തിന്റെ പേര് പുനർജനിയെന്നാണ്.
ലോഹം എന്ന രഞ്ജിത്ത് ചിത്രത്തിലൂടെയായിരുന്നു നിരഞ്ജനയുടെ അരങ്ങേറ്റം. ബി.ടെക്, പുത്തൻ പണം, കെയര് ഓഫ് സൈറ ബാനു, ചതുര്മുഖം, ദി സീക്രട്ട് ഓഫ് വുമൺ, ഗൂഢാലോചന, ലളിതം സുന്ദരം, ടർബോ, പടക്കളം എന്നിവയാണ് നിരഞ്ജനയുടെ ശ്രദ്ധേയമായ മറ്റു ചിത്രങ്ങൾ. ആട് 3യിൽ ആണ് ഒടുവിൽ നിരഞ്ജന അഭിനയിച്ചത്.
