ടെലിവിഷനിലൂടെ തുടക്കം കുറിച്ച് പിന്നീട് ‘കാട്ടുചെമ്പകം’ എന്ന ചിത്രത്തിലൂടെ ബിഗ് സ്ക്രീനില് അഭിനേതാവായും ശേഷം തിരക്കഥാകൃത്തായും സംവിധായകനായും പ്രേക്ഷകരുടെ മനസ്സിലിടം നേടിയ താരമാണ് അനൂപ് മേനോന്. മികച്ച സിനിമകളില് പ്രേക്ഷകര് മനസ്സില് സൂക്ഷിക്കുന്ന ഒരുപാട് നല്ല കഥാപാത്രങ്ങള് അനൂപ് മേനോന് അവതരിപ്പിച്ചിട്ടുണ്ട്.
ഇപ്പോഴിതാ തന്റെ ഏറ്റവും പുതിയ ചിത്രമായ ‘വൈല്ഡി’ലെ ക്ലാസി ലുക്കിലുള്ള ചിത്രങ്ങള് പങ്കിടുകയാണ് താരം. കറുത്ത ഷർട്ടും സൺഗ്ലാസും വെള്ള നിറത്തിലുള്ള വാച്ചും ധരിച്ച് സ്റ്റൈലിഷ് ഗെറ്റപ്പിലുള്ള അനൂപ് മേനോനെയാണ് ചിത്രത്തില് കാണുന്നത്. ‘‘വൈൽഡി’ന്റെ സെറ്റുകളിൽ നിന്ന്...’’ എന്ന ക്യാപ്ഷന് നല്കിയാണ് താരം ചിത്രം പങ്കിട്ടിരിക്കുന്നത്. ചിത്രത്തിനു താഴെ താരത്തിന്റെ ലുക്കിനെ പ്രശംസിച്ച് ഒരുപാട് കമന്റുകള് വരുന്നുണ്ട്. ‘നാഗാർജുനയെ പോലെ ഉണ്ട്, ഹെയര് സ്റ്റൈല് പൊളിച്ചു, സൂപ്പർ... ഏയ്ജ് മൈനസ് 10, കൂടുതല് ചെറുപ്പമായി...’ എന്നിങ്ങനെ നീളുന്നു കമന്റുകള്.
അലി സഫറിന്റെ സംവിധാനത്തിൽ പോയിന്റ് ബ്ലാങ്ക് ഫിലിംസിന്റെ ബാനറില് ഒരുങ്ങുന്ന ഈ ചിത്രത്തിന്റെ ചിത്രീകരണം പുരോഗമിക്കുകയാണ്. ഇതിന്റെയൊരു പോസ്റ്റര് കുറച്ചു ദിവസം മുന്പ് അനൂപ് മേനോന് സോഷ്യല് മീഡിയയിലൂടെ പങ്കുവച്ചിരുന്നു. സാറ സ്റ്റീഫന് ആണ് നായികയായി എത്തുന്നതെന്നാണ് പുറത്തുവിട്ട പോസ്റ്ററിൽ നിന്നും വ്യക്തമായിരുന്നത്. കോണ്സെപ്റ്റ് പോസ്റ്റര് എന്ന തോന്നല് ഉളവാക്കുന്ന പോസ്റ്ററില് ഇതുവരെ കാണാത്ത ഗെറ്റപ്പിലാണ് അനൂപ് മേനോന് പ്രത്യക്ഷപ്പെട്ടിരുന്നത്.
എന്നാല് ഈ പോസ്റ്റര് വന്നതിനു പിന്നാലെ, ഇത് എഐ ഉപയോഗിച്ച് തയ്യാറാക്കിയതാണെന്ന് കമന്റ് ബോക്സില് പലരും പരിഹസിച്ചു. അതിനുള്ള മറുപടിയെന്നോണമാണ് ചിത്രത്തിന്റെ ലൊക്കേഷനില് നിന്നുള്ള തന്റെ ഒരു ചിത്രം താരമിപ്പോള് പങ്കിട്ടിരിക്കുന്നത്. സോഷ്യല് മീഡിയയിലൂടെ സിനിമയുടെ ചിത്രീകരണം കൂർഗിൽ പുരോഗമിച്ചു വരുകയാണെന്ന് അനൂപ് മേനോൻ നേരത്തെ വ്യക്തമാക്കിയിരുന്നു. ചിത്രത്തെക്കുറിച്ച് മറ്റ് വിവരങ്ങളൊന്നും പുറത്ത് വിട്ടിട്ടില്ല.
രതീഷ് നെടുമങ്ങാട് സംവിധാനം ചെയ്ത ‘ഈ തനിനിറം’ എന്ന ചിത്രമാണ് അനൂപ് മേനോന്റേതായി ഏറ്റവുമൊടുവില് റിലീസ് ചെയ്തത്. എസ്. ഐ. ഫെലിക്സ് ലോപ്പസ് എന്ന കേന്ദ്ര കഥാപാത്രത്തെ അനൂപ് മേനോൻ അവതരിപ്പിച്ച ചിത്രത്തില് നോബി, രമേശ് പിഷാരടി, ജി. സുരേഷ് കുമാർ, പ്രസാദ് കണ്ണൻ, ദീപക് ശിവരാമൻ, ശൈലജ അമ്പു തങ്കച്ചൻ വിതുര, ആജിത്, രമ്യാ മനോജ്, അനഘ അജിത്, രോഹൻ ലോണ, ആദർശ് ഷേണായ്, രതീഷ് വെഞ്ഞാറമൂട്, രഞ്ജൻ ദേവ്, ആദർശ് ഷാനവാസ്, ഗൗരി ഗോപൻ, ആതിര എന്നിവരും പ്രധാന വേഷങ്ങളിലെത്തിയിരുന്നു.
മോഹന്ലാലിനെ നായകനാക്കി അനൂപ് മേനോന് ഒരു ചിത്രം സംവിധാനം ചെയ്യാന് ഒരുങ്ങുന്നുവെന്ന് നേരത്തേ പ്രഖ്യാപനം എത്തിയിരുന്നു. എന്നാല് ഇത് സംബന്ധിച്ച് പിന്നീട് അപ്ഡേറ്റുകളൊന്നും എത്താതായപ്പോള് ഇത് ഉപേക്ഷിച്ചു എന്ന തരത്തില് സിനിമാപ്രേമികള്ക്കിടയില് പ്രചരണം നടന്നിരുന്നു. എന്നാല് ചിത്രം ഉപേക്ഷിച്ചിട്ടില്ലെന്നും സമയമെടുത്ത് ചെയ്താല് മതിയെന്നാണ് മോഹന്ലാലിന്റെയും അഭിപ്രായം എന്നുമാണ് അടുത്തിടെ ഒരു പ്രൊമോഷന് അഭിമുഖത്തില് അനൂപ് മേനോന് പറഞ്ഞത്.
