ഹസാരിബാഗ്: മകന്റെ രോഗശാന്തിക്കായി അന്ധവിശ്വാസിയായ മാതാവ് മകളെ ബലി നല്കി. ജാര്ഖണ്ഡിലെ ഹസാരിബാഗ് ജില്ലയിലുള്ള കുസുംബ ഗ്രാമത്തിലാണ് നാടിനെ നടുക്കിയ ഈ പൈശാചിക കൃത്യം നടന്നത്. പതിമൂന്ന് വയസ്സുകാരിയായ മകളെ മന്ത്രവാദത്തിന്റെ പേരില് കൊലപ്പെടുത്തിയ കേസില് അമ്മ രശ്മി ദേവി (35), മന്ത്രവാദിനി ശാന്തി ദേവി (55), സഹായി ഭീം റാം (40) എന്നിവരെ അറസ്റ്റ് ചെയ്തു.
രശ്മി ദേവിയുടെ മകനുണ്ടായിരുന്ന മാനസിക-ശാരീരിക അവശതകള് മാറ്റാനാണ് ഇവര് മന്ത്രവാദിനിയെ സമീപിച്ചത്. മകന്റെ അസുഖം മാറണമെങ്കില് ഒരു 'കന്യകയെ' ബലി നല്കണമെന്ന് മന്ത്രവാദിനി ശാന്തി ദേവി രശ്മിയെ വിശ്വസിപ്പിച്ചു. മാര്ച്ച് 24-ന് അഷ്ടമി ദിനത്തില് ബലി നല്കിയാല് ഉദ്ദിഷ്ടകാര്യം നടക്കുമെന്ന് ഇവര് തീരുമാനിക്കുകയായിരുന്നു. രാംനവമി ഘോഷയാത്രകളുടെ ശബ്ദകോലാഹലങ്ങള്ക്കിടെയാണ് ഈ അതിക്രമം നടന്നത്. ഘോഷയാത്രയുടെ ശബ്ദം പുറത്തുകേള്ക്കുമ്പോള്, വീടിനുള്ളില് വെച്ച് അമ്മയും സഹായിയായ ഭീം റാമും ചേര്ന്ന് പെണ്കുട്ടിയെ ശ്വാസം മുട്ടിച്ചു കൊന്നു.
കൊലപാതക വേളയില് മന്ത്രവാദിനി പെണ്കുട്ടിയുടെ സ്വകാര്യഭാഗങ്ങളില് തടിക്കഷ്ണങ്ങള് കുത്തിക്കയറ്റി ക്രൂരമായി പീഡിപ്പിച്ചതായും പോലീസ് കണ്ടെത്തി. കൊലപാതകത്തിന് ശേഷം മൃതദേഹം അടുത്തുള്ള തോട്ടത്തില് കുഴിച്ചിട്ടു. തുടര്ന്ന്, മകളെ ആരോ തട്ടിക്കൊണ്ടുപോയി ബലാത്സംഗം ചെയ്ത് കൊലപ്പെടുത്തിയതാണെന്ന് രശ്മി പോലീസില് പരാതി നല്കി. എന്നാല്, പോസ്റ്റ്മോര്ട്ടം റിപ്പോര്ട്ടില് ലൈംഗിക അതിക്രമം നടന്നിട്ടില്ലെന്ന് വ്യക്തമായതോടെ അന്വേഷണം അമ്മയിലേക്ക് നീളുകയായിരുന്നു.
ഈ സംഭവത്തില് ജാര്ഖണ്ഡ് ഹൈക്കോടതി സ്വമേധയാ കേസെടുക്കുകയും ഡിജിപിക്കും ജില്ലാ ഭരണകൂടത്തിനും നോട്ടീസ് അയക്കുകയും ചെയ്തിട്ടുണ്ട്. അറസ്റ്റിലായ സഹായി ഭീം റാം നേരത്തെ രണ്ട് കൊലക്കേസുകളില് പ്രതിയാണെന്നും പോലീസ് അറിയിച്ചു. പ്രത്യേക അന്വേഷണ സംഘം രൂപീകരിച്ചാണ് പോലീസ് ഈ കേസില് അതിവേഗ നടപടികള് സ്വീകരിച്ചത്.
