തിരുവനന്തപുരം: കേരളം ഉള്പ്പെടെയുള്ള സംസ്ഥാനങ്ങളില് ബിജെപി കരുത്താര്ജ്ജിച്ചു വരികയാണെന്നും ഭാരതത്തിലെ ജനങ്ങള്ക്ക് പ്രധാനമന്ത്രി നരേന്ദ്ര മോദിയില് ഉറച്ച വിശ്വാസമാണുള്ളതെന്നും ബിജെപി ദേശീയ സെക്രട്ടറി അനില് ആന്റണി. ബിജെപി അപകടകാരികള് ആണെന്ന മുതിര്ന്ന കോണ്ഗ്രസ് നേതാവ് എ.കെ ആന്റണിയുടെ പ്രസ്താവനയെ അനില് ആന്റണി തള്ളി.
പിതാവിന്റെ അഭിപ്രായത്തില് രാഷ്ട്രീയത്തില് ഓരോരുത്തര്ക്കും വ്യത്യസ്തമായ അഭിപ്രായങ്ങള് ആണ് ഉള്ളതെന്ന് പറഞ്ഞു. കേരളത്തില് പിണറായി സര്ക്കാര് മൂന്നാം തവണ അധികാരത്തില് വരില്ല. എല്ഡിഎഫിനും യുഡിഎഫിനും കൃത്യമായ ബദലായി ബിജെപി മാറിയെന്നും ഇടതുപക്ഷം ഭരണത്തില് നിന്ന് പുറത്തുപോയാലും ഇത്തവണ യുഡിഎഫിന് അധികാരത്തിലെത്താന് കഴിയില്ലെന്നും പറഞ്ഞു.
തിരഞ്ഞെടുപ്പ് കാലത്തെ 'ഡീല്' ആരോപണങ്ങള് വെറും പുകമറ മാത്രമാണ്. ബിജെപിക്ക് ജനങ്ങളുമായി മാത്രമേ ഉടമ്പടിയുള്ളൂ. കേരളത്തിന് പുറത്ത് ഇന്ത്യാ മുന്നണിയുടെ ഭാഗമായി കോണ്ഗ്രസും സിപിഎമ്മും ഒന്നിച്ചാണെന്നും കേരളത്തിലെ ഇവരുടെ പോരാട്ടം ജനങ്ങളെ വഞ്ചിക്കാനാണെന്നും അനില് ആന്റണി ആരോപിച്ചു. എഫ്സിആര്എ, വഖഫ് ബില്ലുകളെ പ്രതിപക്ഷം രാഷ്ട്രീയ ആയുധമാക്കാന് ശ്രമിക്കുകയാണ്. പൗരത്വ ഭേദഗതി നിയമത്തിന്റെ കാര്യത്തിലെന്നപോലെ ജനങ്ങളെ തെറ്റിദ്ധരിപ്പിക്കാനാണ് ഇപ്പോഴത്തെയും നീക്കം. ഈ നിയമങ്ങളൊന്നും ഒരു മതത്തിനും എതിരല്ലെന്നും ആരുടെയും അവകാശങ്ങള് ഇല്ലാതാക്കില്ലെന്നും അദ്ദേഹം വ്യക്തമാക്കി.
തിരുവനന്തപുരത്ത് മാധ്യമങ്ങളോട് സംസാരിക്കവെയാണ് അനില് ആന്റണി തന്റെ രാഷ്ട്രീയ നിലപാടുകള് വ്യക്തമാക്കിയത്. വരാനിരിക്കുന്ന തിരഞ്ഞെടുപ്പില് ബിജെപിയുടെ ശക്തരായ സ്ഥാനാര്ത്ഥികള് വലിയ മുന്നേറ്റം നടത്തുമെന്നും അദ്ദേഹം പ്രത്യാശ പ്രകടിപ്പിച്ചു. മറ്റു മുന്നണികള് അനാവശ്യ വിവാദങ്ങളും വര്ഗീയതയും ചര്ച്ച ചെയ്യുമ്പോള് ബിജെപി വികസന രാഷ്ട്രീയത്തിലാണ് ഊന്നല് നല്കുന്നത്. കോണ്ഗ്രസ് ഭരിക്കുന്ന ഹിമാചല് പ്രദേശില് ശമ്പളം നല്കാന് പോലും കഴിയാത്ത അവസ്ഥയാണെന്നും അദ്ദേഹം പരിഹസിച്ചു.
