കണ്ണൂര്: പയ്യന്നൂരില് വ്യാജ ആധാര് കാര്ഡുകള് നിര്മ്മിക്കുന്നുവെന്ന ഗൗരവതരമായ പരാതിയില് കേന്ദ്ര തിരഞ്ഞെടുപ്പ് കമ്മീഷന് ഇടപെടുന്നു. സംഭവ ത്തില് അടിയന്തര അന്വേഷണം നടത്തി ഇന്ന് രാത്രിയോടെ റിപ്പോര്ട്ട് സമര്പ്പിക്കാന് മുഖ്യ തിരഞ്ഞെടുപ്പ് കമ്മീഷന് കണ്ണൂര് ജില്ലാ കളക്ടര്ക്ക് നിര്ദ്ദേശം നല്കി. എ.ഐ.സി.സി ജനറല് സെക്രട്ടറി കെ.സി. വേണുഗോപാല് ആണ്് സി.പി.ഐ.എമ്മിനെതിരെ അതീവ ഗുരുതരമായ ആരോപണങ്ങള് ഉന്ന യിച്ചത്. റിപ്പോര്ട്ട് ലഭിച്ചാലുടന് കര്ശനമായ തുടനടപടികള് സ്വീകരിക്കുമെന്ന് മുഖ്യതെരഞ്ഞെടുപ്പ് ഓഫീസര് രത്തന് യു. ഖേല്ക്കര് വ്യക്തമാക്കി.
പയ്യന്നൂര്, കല്ല്യാശേരി മണ്ഡലങ്ങളില് വ്യാപകമായി ഇരട്ട വോട്ടുകള് ചേര്ത്തതായും വ്യാജ രേഖകള് ചമച്ചതായും കാണിച്ച് കെ.പി.സി.സി നല്കിയ പരാതിയിലാണ് കമ്മീഷന്റെ അടിയന്തര ഇടപെടല്. സി.പി.ഐ.എം പയ്യന്നൂര് ഏരിയ കമ്മിറ്റി ഓഫീസിന്റെ മൂന്നാം നില കേന്ദ്രീകരിച്ചാണ് വ്യാജ ആധാര് കാര്ഡുകളുടെ നിര്മ്മാണം നടക്കുന്നതെന്നാണ് ആരോപണം.
സി.പി.ഐ.എം വിറളിപൂണ്ടിരിക്കുകയാണെന്നും ഭയപ്പെടുത്തുന്ന രാഷ്ട്രീയം കൊണ്ടാണ് തിരഞ്ഞെടുപ്പിനെ നേരിടുന്നതെന്നും കെ.സി. വേണുഗോപാല് കുറ്റപ്പെടുത്തി. തിരഞ്ഞെടുപ്പിലെ പരാജയഭീതി മൂലം പഴയ കള്ളവോട്ട് തന്ത്രങ്ങള് സി.പി.ഐ.എം വീണ്ടും പുറത്തെടുക്കുകയാണെന്ന് അദ്ദേഹം ആരോപിച്ചു. പരാതിയില് വസ്തുതയുണ്ടെന്ന് കണ്ടാല് വലിയ നിയമനടപടികള്ക്ക് സാധ്യതയുണ്ട്. ജില്ലാ കളക്ടറുടെ റിപ്പോര്ട്ട് പുറത്തുവരുന്നതോടെ പയ്യന്നൂരിലെ വ്യാജ ആധാര് വിവാദത്തില് കൂടുതല് വ്യക്തത കൈവരും.
കള്ളവോട്ട് തടയുന്നതിനായി വോട്ടര് പട്ടികയിലെ ക്രമക്കേടുകള് പരിശോധിക്കാനും ബൂത്ത് തലത്തില് കര്ശന നിരീക്ഷണം ഏര്പ്പെടുത്താനും കമ്മീഷന് ആലോചിക്കുന്നുണ്ട്. ഇന്നലെയായിരുന്നു കെ.സി. വേണുഗോപാല് ഈ ആരോപണം ഉന്നയിച്ചത്.
