തിരുവനന്തപുരം: ഇത്തവണ സിപിഐഎമ്മുകാര് പോലും ഇടതുപക്ഷം ഭരണത്തില് വരരുതെന്ന് ആഗ്രഹിക്കുന്നെന്നും പാര്ട്ടിയെ തിരുത്താന് പാര്ട്ടിക്കാര് തന്നെ റിബലായി മാറിയ തെരഞ്ഞെടുപ്പാണെന്നും ബിജെപി നേതാവും മുന് കേന്ദ്രമന്ത്രിയും കഴക്കൂട്ടത്തെ എന്ഡിഎ സ്ഥാനാര്ത്ഥിയുമായ വി. മുരളീധരന്. ഇത്തവണത്തെ സഭ ബിജെപിയ്ക്ക് സ്വാധീനമുള്ളതായിരിക്കുമെന്നും പ്രത്യാശ പ്രകടിപ്പിച്ചു.
കഴക്കൂട്ടത്ത് നടക്കുന്നത് ത്രികോണ മത്സരമാണെന്നും എന്നാല് വിജയം സുനിശ്ചിതമാണെന്നും അദ്ദേഹം പറഞ്ഞു. പ്രചരണത്തിന്റെ തുടക്കത്തില് നിര്ജ്ജീവമായിരുന്ന കോണ്ഗ്രസ് ഇപ്പോള് ശക്തമായി മുമ്പോട്ട് വന്നിട്ടുണ്ട്. കോണ്ഗ്രസ് സ്ഥാനാര്ത്ഥിക്ക് വോട്ടു കിട്ടുന്നത് പല സ്ഥലത്തും ബിജെപിയ്ക്ക് മുന്തൂക്കം കിട്ടാന് കാരണമാകും. സിപിഐഎമ്മിലെ ആള്ക്കാരും ഇത്തവണ പാര്ട്ടിക്കെതിരേ വോട്ടു ചെയ്യാനാണ് സാധ്യത. പ്രചരണത്തിനിടയില് ഇത്തവണ ഇടതുപക്ഷം അധികാരത്തില് വരരുതെന്ന് ആഗ്രഹിക്കുന്ന പാര്ട്ടിക്കാരെ കാണാനായി. പാര്ട്ടിയെ തിരുത്താന് വേണ്ടിയെങ്കിലും ഇത്തവണ ഭരണത്തില് നിന്നും മാറി നില്ക്കണമെന്ന വിചാരിക്കുന്നവര് ഏറെയാണെന്നും പറഞ്ഞു.
പാര്ട്ടി നാളെയും നിലനില്ക്കാന് വേണ്ടി പലരും എതിരേ വോട്ടു ചെയ്തേക്കാന് സാധ്യതയുണ്ട്. ഇതിനൊപ്പം തന്നെ ശബരിമല വിഷയം പോലെയുള്ള പ്രശ്നങ്ങളും ഇടതുപക്ഷത്തിന് വോട്ടു നഷ്ടപ്പെടുത്തും. ഇത്തരം അടിയൊഴുക്കുകള് ഈ തെരഞ്ഞെടുപ്പിലുണ്ടാകും. അത് എല്ലാ ഭാഗത്ത് നിന്നും ഉണ്ടാകാന് സാധ്യതയുണ്ട്. ഇവ മാധ്യമങ്ങളുടെ സര്വേയില് വ്യക്തമാകുകയില്ല. അതാണ് തെരഞ്ഞെടുപ്പ് ട്രന്റ്. ഭരണമാറ്റത്തിന് ഇത്തവണ സാധ്യത കൂടുതലായിരിക്കുമെന്നും നേമത്തും കഴക്കൂട്ടത്തും വലിയ രീതിയില് ബിജെപി ജയിക്കുമെന്നും ബിജെപിയ്ക്കും സ്വാധീനം ഉണ്ടാകുന്ന സഭയായിരിക്കും ഇത്തവണ നിലവില് വരികയെന്നും മുരളീധരന് പറയുന്നു.
